ମହିମା ସେତୁ ନାମରେ ନାମିତ ହେଲା ବ୍ରାହ୍ମଣୀ ଉପରେ ନିର୍ମିତ ସେତୁ
4:58 pmMay 29, 2023May 29, 2023 / 05

ଢେଙ୍କାନାଳ ଅଫିସ,୨୯ା୫: ସୋମବାର ମଧ୍ୟାହ୍ନରେ ୫-ଟି ସଚିବ ଭି.କେ ପାଣ୍ଡିଆନ ଯୋରନ୍ଦା ମହିମା ପୀଠରେ ପହଞ୍ଚିଥିଲେ। ହେଲିକପ୍ଟର ଯୋଗେ ଯୋରନ୍ଦା ହାଇ ସ୍କୁଲ ପଡ଼ିଆରେ ଅବତରଣ କରିବା ପରେ ସ୍ବତନ୍ତ୍ର ଗାଡ଼ିରେ ଆସି ଗାଦି ମନ୍ଦିର ନିକଟରେ ପହଞ୍ଚିବା ପରେ ମନ୍ଦିରକୁ ଯାଇଥିଲେ। କୌପିନୀ ସମାଜଙ୍କୁ ପ୍ରଦତ୍ତ ଜାଗା ଉପରେ ନିର୍ମିତ ସଭାସ୍ଥଳକୁ ଆସି ମୁଖ୍ୟମନ୍ତ୍ରୀ ତାଙ୍କୁ ଯୋରନ୍ଦା ପଠାଇ ସାଧୁମାନଙ୍କ ସମସ୍ୟା ବିଷୟରେ ବୁଝିବାକୁ କହିଛନ୍ତି ବୋଲି କହିଥିଲେ। ମହିମା ପୀଠର ସର୍ବାଙ୍ଗୀନ ଉନ୍ନତି ପାଇଁ ଯାହା ଆବଶ୍ୟକ ରହିଛି ତାକୁ ପୂରଣ କରାଯିବ ବୋଲି ସାଧୁମାନଙ୍କୁ କହିଥିଲେ। କଲୁରିଆଠାରେ ବ୍ରାହ୍ମଣୀ ନଦୀ ଉପରେ ନିର୍ମିତ ପୋଲକୁ ମହିମା ସେତୁ ରୂପରେ ମୁଖ୍ୟମନ୍ତ୍ରୀ ନାମିତ କରିଥିବା ସଚିବ କହିଥିଲେ। କୌପିନୀଧାରୀଙ୍କ ମଠକୁ ଯାଇ ସାଧୁଙ୍କ ଆର୍ଶୀବାଦ ନେବା ପରେ ବକ୍କଳ ସମାଜଙ୍କ ବତୀ ମନ୍ଦିର, ଧୂନି ମନ୍ଦିର, କାଗଜ ଘର ଆଦି ପରିଦର୍ଶନ କରିବା ପରେ ବକ୍କଳ ସାଧୁଙ୍କ ବିଶ୍ୱନାଥ ବାବାଙ୍କ ଆମ୍ବମୂଳ ଆଶ୍ରମରେ ଭିକ୍ଷା ଅର୍ଥାତ ଭୋଜନ କରିବା ପରେ ଭୁବନେଶ୍ୱର ଫେରିଯାଇଛନ୍ତି। ରାଜ୍ୟ ସରକାର ଯୋରନ୍ଦା ପୀଠକୁ ବିଶ୍ୱ ସ୍ତରୀୟ ପର୍ଯ୍ୟଟନ ସ୍ଥଳୀରେ ରୂପାନ୍ତରିତ କରିବାକୁ ୧୦ କୋଟି ଟଙ୍କା ପ୍ରଦାନ କରାଯାଇଛି। ବିଧାୟକ ସୁଧୀର ସାମଲ ଓ ପ୍ରଣବ ପ୍ରକାଶ ଦାଶ ସଚିବଙ୍କ ପାଇଁ ସମସ୍ତ ବନ୍ଦୋବସ୍ତର ବ୍ୟବସ୍ଥା କରିଥିଲେ। ସଚିବ ରୁପା ରୋଶନ ସାହୁ, ଜିଲାପାଳ ସରୋଜ ସେଠୀ ସଚିବଙ୍କ ସହ ରହି କାର୍ଯ୍ୟକ୍ରମ ତଦାରଖ କରିଥିଲେ। ଶାନ୍ତିଶୃଙ୍ଖଳା ପାଇଁ ଉତ୍ତର କେନ୍ଦ୍ରାଞ୍ଚଳ ଡିଆଇଜି, ଜିଲା ଏସ୍‌ପି ଉପସ୍ଥିତ ରହି ଭିଡ଼ ନିୟନ୍ତ୍ରଣ କରୁଥିଲେ। ୩ ପ୍ଲାଟୁନ ପୋଲିସ ମୁତୟନ ହୋଇଥିଲେ। ତେବେ ଉଭୟ ବକ୍କଳ ଓ କୌପିନୀ ସମାଜ ସାଧୁମାନେ ବେଶ ଆଶାବାଦୀ ଅଛନ୍ତି ବୋଲି କହିଛନ୍ତି।