ଢେଙ୍କାନାଳ ଅଫିସ,୨୦।୨: ଆଖିରେ ଆଖିଏ ସ୍ବପ୍ନ, ମନରେ ଅସୁମାରୀ ଆଶା ନେଇ ମାତ୍ର ୩ଦିନ ତଳେ ଆରମ୍ଭ କରିଥିଲେ ନୂଆ ଜୀବନ। ଲିଭି ନ ଥିଲା ପାଦର ଅଳତା କି ଫିକା ପଡ଼ି ନ ଥିଲା ହାତର ମେହେନ୍ଦି। ହେଲେ ସବୁ କିଛି ଓଲଟପାଲଟ ହୋଇଗଲା। ଚତୁର୍ଥୀ ହୋମ ଜଳିବା ଆଗରୁ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଲେ ନବବଧୂ। ଝୁଲନ୍ତା ଅବସ୍ଥାରେ ବନ୍ଦ କୋଠାରିରୁ ମିଳିଲା ମୃତଦେହ। ସୁହାସିନୀ ସାଜି ମଧୁଶଯ୍ୟାରୁ ମଶାଣିକୁ ଗଲା ନବ ବିବାହିତାଙ୍କ ମୃତଦେହ। ଢେଙ୍କାନାଳ ସଦର ଥାନା ବିଦାବନ୍ଧ ଗ୍ରାମରେ ଶନିବାର ଘଟିଥିବା ଏଭଳି ଏକ ଦୁଃଖଦ ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
ହିନ୍ଦୋଳ ଥାନା କଲଣ୍ଡା ଗ୍ରାମର ହରିହର ନାୟକଙ୍କ ଝିଅ ଝରଣା ବିଦାବନ୍ଧ ଗ୍ରାମର ମୁରଲୀଧର ନାୟକଙ୍କ ବଡ଼ପୁଅ ମଦନମୋହନଙ୍କୁ ଗତ ୧୭ତାରିଖରେ ବିବାହ କରିଥିଲେ। ଶନିବାର ଥିଲା ଚତୁର୍ଥୀ। ସକାଳୁ ଝରଣା ଉଠି ନ ଥିଲେ। ପରିବାର ଲୋକେ କବାଟ ପିଟି ଥିଲେ ମଧ୍ୟ ପ୍ରକୋଷ୍ଠରୁ କୌଣସି ଉତ୍ତର ମିଳି ନ ଥିଲା। ସ୍ବାମୀ ମଦନମୋହନ ଏବଂ ପରିବାରର ଅନ୍ୟ ସଦସ୍ୟ କବାଟ ଭାଙ୍ଗି ଭିତରେ ପଶିବା ବେଳକୁ ଝରଣାଙ୍କ ମୃତଦେହ ଫ୍ୟାନ୍ରେ ଝୁଲୁଥିଲା। ସେ ନିଜ ଶାଢ଼ିରେ ଆତ୍ମହତ୍ୟା କରିଥିଲେ। ତାଙ୍କୁ ତୁରନ୍ତ ଜିଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସୂଚନା ପାଇ ସଦର ଥାନା ପୋଲିସ ପହଞ୍ଚତ୍ ତଦନ୍ତ କରିବା ସହ ମୃତଦେହ ଜବତ କରି ବ୍ୟବଚ୍ଛେଦ ଲାଗି ପଠାଇଥିଲା। ଏ ସଂକ୍ରାନ୍ତରେ ନଂ. ୯/୨୧ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ଝରଣାଙ୍କ ବାପା ହରିହର ନାୟକଙ୍କ କହିବା କଥା, ୧୦ମ ଶ୍ରେଣୀରେ ପଢୁଥିବାବେଳେ ଝିଅଙ୍କ ମୁଣ୍ଡଦୋଷ ବାହାରିଥିଲା। ମଝିରେ ମଝିରେ ସେ ହିତାହିତ ଜ୍ଞାନ ହରାଇ ବସୁଥିଲେ। ହିନ୍ଦୋଳ ଉପଖଣ୍ଡ ଚିକିତ୍ସାଳୟରେ ତାଙ୍କର ଚିକିତ୍ସା କରାଯାଇଥିଲା। ୧୨ ଦିନ ତଳେ ବିବାହ ପ୍ରସ୍ତାବ ଆସିବାରୁ ସମସ୍ୟା ବିଷୟରେ ବରପକ୍ଷଙ୍କୁ ନ ଜଣାଇ ଝିଅଙ୍କ ବିବାହ କରିଦେଇଥିଲୁ। ଏଥିରେ ଶାଶୁଘର ପକ୍ଷର କେହି ଦାୟୀ ନୁହନ୍ତି ବୋଲି ହରିହର ଥାନାରେ ଲିଖିତ ଭାବେ ଜଣାଇଛନ୍ତି। ଏ ସଂକ୍ରାନ୍ତରେ ମଦନମୋହନ କୁହନ୍ତି, ଶନିବାର ବିବାହର ଚତୁର୍ଥୀ ଥିଲା। ସେ ଝିଅଙ୍କ ସହ କଥାବାର୍ତ୍ତା ମଧ୍ୟ କରିନାହାନ୍ତି। ଏଭଳି ଘଟଣା କାହିଁକି ଘଟିଲା ସେ ସମ୍ପର୍କରେ କିଛି କହିପାରିବେ ନାହିଁ ବୋଲି ସେ ସୂଚନା ଦେଇଛନ୍ତି।
