ଅମ୍ବାଭୋନା,୧୫ା୧(ଡି.ଏନ୍.ଏ.): ବରଗଡ଼ ଜିଲା ଅମ୍ବାଭୋନା ଥାନା ଅନ୍ତର୍ଗତ ଡୁଙ୍ଗୁରୀ ଦେଚୁଆଁ ପାହାଡ଼ ମଧ୍ୟରେ ରହିଥିବା ମାତାବନ୍ଧ ନିକଟସ୍ଥ ଏକ ଗଛରୁ ଶନିବାର ପ୍ରେମୀଯୁଗଳଙ୍କ ଝୁଲନ୍ତା ମୃତଦେହକୁ ପୋଲିସ ଜବତ କରିଛି। ମୃତକଦ୍ୱୟ ହେଲେ, ଡୁଙ୍ଗୁରୀ ଗ୍ରାମର ପାଣ୍ଡବ ବାଗ(୪୫) ଓ ସୁବାସିନୀ ମେହେର(୪୫)। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବରଗଡ଼ ଡାକ୍ତରଖାନାକୁ ପଠାଇଛି। ଏ ନେଇ ଅମ୍ବାଭୋନା ପୋଲିସ କେସ୍ ନଂ ୧/୨୨ରେ ଏକ ଅପମୃତ୍ୟୁ ମାମଲା ରୁଜୁ କରି ଅଧିକ ତଦନ୍ତ କରୁଛି ।
ସୂଚନାଯୋଗ୍ୟ, ମୃତ ପ୍ରେମୀଯୁଗଳ ବିବାହିତ। ତେବେ ଦୀର୍ଘଦିନ ହେବ ସୁବାସିନୀଙ୍କ ସ୍ବାମୀଙ୍କ ଦେହାନ୍ତ ହୋଇଯାଇଛି। ପରେ ପାଣ୍ଡବଙ୍କ ସହିତ ସୁବାସିନୀଙ୍କ ପ୍ରେମସମ୍ପର୍କ ଗଢ଼ି ଉଠିଥିବା ଜଣାପଡ଼ିଥିଲା। ଗତ ୩ଦିନ ତଳୁ ଉଭୟେ ଘରୁ ଅନ୍ୟତ୍ର ଚାଲି ଯାଇଥିଲେ। ଶନିବାର ଗ୍ରାମଠାରୁ ପ୍ରାୟ ୫ କି.ମି ଦୂର ମାତାବନ୍ଧ ନିକଟସ୍ଥ ଏକ ଗଛରୁ ଉଭୟଙ୍କ ମୃତଦେହ ଝୁଲୁଥିବା ଦେଖିବାକୁ ମିଳିଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି।
