ପ୍ରତିଦିନ ପେଟ୍ରୋଲ ଦର ହୁ ହୁ ହୋଇ ବଢ଼ିଚାଲିଛି। ଏଥିରୁ ରକ୍ଷା ପାଇବା ପାଇଁ ମଧ୍ୟପ୍ରଦେଶ ବୈତୁଲର ଜଣେ ବ୍ୟକ୍ତି ଏହାର ଏକ ବିକଳ୍ପ ବାହାର କରିଛନ୍ତି। ଉଷାକାନ୍ତ ନାମକ ଜଣେ ଇଞ୍ଜିନିୟର ନିଜର ପୁରୁଣା ବାଇକ୍କୁ ଇଲେକ୍ଟ୍ରିକ୍ ବାଇକ୍କୁ ପରିବର୍ତ୍ତନ କରିଦେଇଛନ୍ତି। ଯାହା କି ପ୍ରଦୂଷଣ ରୋକିବା ସହ ବିନା ପେଟ୍ରୋଲରେ ଗଡୁଛି।
ଉଷାକାନ୍ତ ବିଜୁଳି ବଭାଗରେ ଲାଇନମ୍ୟାନ ଭାବରେ କାମ କରନ୍ତି। ସେ ଏପରି ଭିନ୍ନ ଧରଣର ବାଇକ୍ ତିଆରି କରିଛନ୍ତି। ସେ କହିଛନ୍ତି, ମୋ ପାଖରେ ୧୮ ବର୍ଷର ଏକ ବାଇକ୍ ଥିଲା। ଏହାକୁ ମୁଁ ଇଲେକ୍ଟ୍ରିକ୍ ବାଇକ୍ କରିଦେଇଛି। ଏଥିରେ ୧୨ ଓ୍ବାଟର ୪ଟି ବ୍ୟାଟେରୀ ଲାଗିଛି। ଏହା ସହ ଗୋଟିଏ ମୋଟର ବି ଲାଗିଛି। ଯେଉଁଥିରେ ବାଇକ୍ଟି ଚାଲୁଛି। ବାଇକ୍ଟି ୬ ଘଣ୍ଟାରେ ଚାର୍ଜ ହେଉଛି। ଏଥିରେ ମାତ୍ର ଗୋଟିଏ ୟୁନିଟ୍ ବିଜୁଳି ଖର୍ଚ୍ଚ ହେଉଛି। ଥରେ ଚାର୍ଜ ହେଲେ ଏହା ୩୫ କିଲୋମିଟର ଗତି କରିଥାଏ। ସବୁଠୁ ଆଶ୍ଚର୍ଯ୍ୟର କଥା ହେଲା ମାତ୍ର ୭ ଟଙ୍କାରେ ଗୋଟିଏ ୟୁନିଟ୍ ବିଜୁଳିରେ ୩୫ କିଲୋମିଟର ଯାଇଥାଏ।
ଉଷାକାନ୍ତଙ୍କ ଜଣେ ବନ୍ଧୁ କୁହନ୍ତି, ବାଇକ୍ କିଣିବାକୁ ହେଲେ ଅତି କମ୍ରେ ୯୦୦୦୦ ଟଙ୍କାରୁ ୧ ଲକ୍ଷ ଟଙ୍କା ଦରକାର। ଏଥିପାଇଁ ଉଷାକାନ୍ତ ପୁରୁଣା ବାଇକ୍କୁ ନୂଆ ରୂପ ଦେଇଛନ୍ତି। ଯାହା ଦ୍ୱାରା ପ୍ରଦୂଷଣ କମିବ ଆଉ ପେଟ୍ରୋଲରୁ ମଧ୍ୟ ରକ୍ଷା ମିଳିବ। ଉଷାଙ୍କ ଏପରି ବୁଦ୍ଧିକୁ ବିଭିନ୍ନ ମହଲରୁ ପ୍ରଶଂସା କରାଯାଉଛି।
