ଭୋଗରାଇ, ୩।୩(ଡି.ଏନ.ଏ.):ବାଲେଶ୍ୱର ଜିଲା ଭୋଗରାଇ ବ୍ଲକ ବନ୍ୟା ପ୍ରତିରୋଧକ ଭୂଆବନ୍ଧ ଏବେ ନୂଆ ରୂପ ନେବାକୁ ଯାଉଛି। ବ୍ରିଟିଶ୍ ଅମଳ ଏବଂ ମରହଟ୍ଟା ଅମଳର ନିର୍ମିତ ଏହି ଭୂଆବନ୍ଧ ଦକ୍ଷିଣଭୋଗରାଇ ୩୨ ପଞ୍ଚାୟତକୁ ବନ୍ୟା ଦାଉରୁ ରକ୍ଷା ପାଇଁ ପାଚେରି ଭଳି ଉଭା ହୋଇଥିବା ବେଳେ ଦୀର୍ଘବର୍ଷ ଧରି ଏହି ବନ୍ଧରେ ଆଖିଦୃଶିଆ ରାସ୍ତା ନ ହେବାରୁ ବର୍ଷାଦିନେ ରାସ୍ତା ଶୋଚନୀୟ ହୋଇପଡ଼ି ଦୁର୍ଗମ ରାସ୍ତାରେ ପରିଣତ ହେଉଥିଲା। ସ୍ଥାନୀୟ ଲୋକଙ୍କ ଦୀର୍ଘଦିନର ଏହି ରାସ୍ତା ମରାମତି ସହ ଉନ୍ନତମାନର ସ୍ଥାୟୀ ନିର୍ମାଣ କରିବାକୁ ଦାବି ହୋଇଆସୁଥିବା ବେଳେ ରାଜ୍ୟ ସରକାର ସେଚ ବିଭାଗକୁ ଉକ୍ତ ବନ୍ୟା ପ୍ରତିରୋଧକ ବନ୍ଧ ଖୁବ୍ଶୀଘ୍ର ନିର୍ମାଣ ପାଇଁ ଆର୍ଥିକ ଅନୁଦାନ ପ୍ରଦାନ କରିଛନ୍ତି। ପ୍ରଥମ ପର୍ଯ୍ୟାୟରେ ଭୁଆବନ୍ଧର ଲକ୍ଗେଟ୍ଠାରୁ ଜୟରାମପୁର-ବଣବାଡ଼ି ପର୍ଯ୍ୟନ୍ତ ୪କୋଟି ୨୮ଲକ୍ଷ ଟଙ୍କା ଅନୁଦାନର କାର୍ଯ୍ୟ ଆରମ୍ଭ ହୋଇଛି। ଗୋଟିଏ ମାସ ପରେ ଭୂଷଣ୍ଡେଶ୍ୱର ଏବଂ ଚନ୍ଦନେଶ୍ୱର ଚଡ଼କମେଳା ଶୁଭାରମ୍ଭ ହେବାକୁ ଯାଉଥିବା ବେଳେ ଉତ୍ତର ଭୋଗରାଇର ୫ ପଞ୍ଚାୟତ ସହ ଦକ୍ଷିଣ ଭୋଗରାଇର ବହୁ ପଞ୍ଚାୟତ ଦୁଇ ପ୍ରସିଦ୍ଧ ଶୈବପୀଠ ଚଡ଼କମେଳା ଦର୍ଶନ ଏବଂ ଆରାଧନା ନିମନ୍ତେ ଗମନାଗମନର ବାଟ ସୁଗମ ହେବାକୁ ଯାଉଛି। ଦ୍ୱିତୀୟ ପର୍ଯ୍ୟାୟରେ ବାଟଗ୍ରାମଠାରୁ ଲକ୍ଗେଟ୍ ଓ ଓଡ଼ିଶା ସୀମାନ୍ତ ନସରବାଦଠାରୁ ବାଟଗ୍ରାମ ପର୍ଯ୍ୟନ୍ତ ରାସ୍ତା ଉନ୍ନତି କାର୍ଯ୍ୟ ଆରମ୍ଭ ହୋଇଛି। ଭୁଆବନ୍ଧକୁ ଜୀବନ୍ତ ଆକର୍ଷଣ କରିବା ପାଇଁ ସେଚବିଭାଗ ପକ୍ଷରୁ ବନ୍ଦର ଉଭୟ ପାର୍ଶ୍ୱରେ ବଉଳ ଗଛ ଲଗାଯାଇ ପଥଚାରୀଙ୍କୁ ଆକୃଷ୍ଟ କରାଯିବ ବୋଲି ସେଚ ବିଭାଗୀୟ ପକ୍ଷରୁ ସୂଚନା ଦିଆଯାଇଛି। ବନ୍ଧ କାର୍ଯ୍ୟ ସମ୍ପୂର୍ଣ୍ଣ ହେଲେ ଓଡ଼ିଶା ଓ ପଶ୍ଚିମବଙ୍ଗରୁ ଗମନାଗମନ, ବାଣିଜ୍ୟ ବ୍ୟବସାୟରେ ଲୋକେ ସମସ୍ୟାର ସମ୍ମୁଖୀନ ହେବେ ନାହଁି ବୋଲି ସ୍ଥାନୀୟ ଲୋକେ ମତପ୍ରକାଶ କରିଛନ୍ତି।
