ନିକଟରେ ଭୂମିକମ୍ପ ସିରିୟାରେ ମୃତ୍ୟୁର ତାଣ୍ଡବ କରିଛି, ଯାହାକୁ ଦେଖି ସାରା ବିଶ୍ୱ ସ୍ତବ୍ଧ ଓ ଭୟରେ ଶିହରି ଯାଉଛି। ରାତିରେ ଶୋଇବାକୁ ମଣିଷ ଡରୁଛି। କାଳେ ଶୋଇଥିବା ସମୟରେ ହିଁ ମଣିଷ ଚାଲିଯିବ ମୃତ୍ୟୁର କୋଳକୁ। ତେଣୁ ଆଖିରୁ ନିଦ ହଜି ଯାଇଛି। ଏଭଳି ସ୍ଥିତିକୁ ନଜରରେ ରଖି ଲୋକଙ୍କ ସୁରକ୍ଷା ପାଇଁ ବୈଜ୍ଞାନିକମାନେ ଏବେ ଡିଜାଇନ୍ କରିଛନ୍ତି ଏଭଳି ଖଟ, ଯାହା ଲୋକଙ୍କୁ ଭୂମିକମ୍ପରୁ ସୁରକ୍ଷା ପ୍ରଦାନ କରିବ। ଏହି ଖଟର ବିଶେଷତ୍ୱ ହେଉଛି ଯେ, ଘର ଭୁଶୁଡୁଥିବା ସମୟରେ ଉକ୍ତ ଖଟ ଲୋକଙ୍କ ଜୀବନ ରକ୍ଷା କରିବ। ଅର୍ଥକ୍ୱେକ୍ ପ୍ରୁଫ ନାମକ ଏହି ଖଟ ଧାତୁରେ ତିଆରି। ଏହାର ଉଚ୍ଚତା ଅଧିକ ଓ ଏଥିରେ ସେନ୍ସର ଲାଗିଛି। ଭୂମିକମ୍ପ ହେବାମାତ୍ରେ ଖଟର ମଝିଭାଗରୁ ଖୋଲିଯାଏ। ଫଳରେ ଶୋଇଥିବା ବ୍ୟକ୍ତି ଖଟ ଭିତରକୁ ପଶିଯିବେ। ଆଉ ଖୋଲାଥିବା ଖଟର ଅଂଶ ସଙ୍ଗେ ସଙ୍ଗେ ବନ୍ଦ ହୋଇଯିବ। କେବଳ ସେତିକି ନୁହେଁ ଖଟ ଭିତରେ ଖାଦ୍ୟ, ପାନୀୟ ରଖିବାର ସ୍ଥାନ ମଧ୍ୟ ଅଛି। ତେଣୁ ଖଟ ଭିତରେ ଥିବା ବ୍ୟକ୍ତି ଭୋକ ଶୋଷରେ ମରିବେ ନାହିଁ। ଆଉ ଖଟ ଉପରେ ଗଦା ହୋଇଥିବା ଘରର ଭଗ୍ନାବଶେଷକୁ ବାହାର କରି ଉଦ୍ଧାର କରିବା ପର୍ଯ୍ୟନ୍ତ ସେମାନେ ଖଟ ଭିତରେ ଆରାମରେ ରହିପାରିବେ। ତେବେ ଏହି ଖଟ ପ୍ରକୃତରେ କେତେ କାମ କରିବ ତାହା କେବଳ ଖଟଟି ତିଆରି ହେବାପରେ ହିଁ ଜଣାପଡିବ।
