ବାରଙ୍ଗ,୨୮।୧୦(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନରେ ବୁଧବାର ଏକ ଅଘଟଣ ଦେଖିବାକୁ ମିଳିଛି। ଅପରାହ୍ନ ସମୟରେ ଭାଲୁ ସଫାରିରେ ଯାଇଥିବା ଜଣେ ଗାଇଡ୍ ଭାଲୁକୁ ଖାଦ୍ୟ ଦେଉଥିବାବେଳେ ହଠାତ ଭାଲୁଟି ଗାଇଡ୍ଙ୍କ ହାତକୁ କାମୁଡ଼ି ଦେଇଛି। ସୌଭାଗ୍ୟବଶତଃ ଗାଇଡ୍ ଜଣଙ୍କ ବଞ୍ଚତ୍ୟାଇଥିଲେ ମଧ୍ୟ ନନ୍ଦନକାନରେ ଏହି ଘଟଣାକୁ ନେଇ ପର୍ଯ୍ୟଟକମାନେ ଆତଙ୍କିତ ହୋଇପଡ଼ିଥିଲେ।
ବୁଧବାର ପର୍ଯ୍ୟଟକଙ୍କ ମନୋରଞ୍ଜନ ପାଇଁ ଭାଲୁ ସଫାରିକୁ ବାଲିଆ, କାଳିଆ ଓ ବାସନ୍ତୀ ନାମକ ଭାଲୁକୁ ଛଡ଼ାଯାଇଥିଲା। ଅପରାହ୍ନ ସାଢେ ୪ଟାରେ ଓଡି୦୨-ଏଜେଡ୍-୨୭୪୭ନଂ ସଫାରି ବସଟି ପର୍ଯ୍ୟଟକ ନେଇ ଭାଲୁ ସଫାରିକୁ ବୁଲିବାକୁ ଯାଇଥିଲା। ସେହି ବସ୍ରେ ଥିଲେ ଦାରୁଠେଙ୍ଗ ଗ୍ରାମର ଟୁଲୁ ବେହେରା ନାମକ ଗାଇଡ୍। ବସ୍ଟି ସଫାରି ମଧ୍ୟରେ ଯାଉଥିବା ବେଳେ ରାସ୍ତାକଡ଼ରେ ବାଲିଆ ନାମକ ଅଣ୍ଡିରା ଭାଲୁଟି ବସିଥିଲା। ଏହାଦେଖି ଗାଇଡ୍ଜଣଙ୍କ ବସ୍ଚାଳକଙ୍କୁ ରୋକିବାକୁ କହିଥିଲେ। ଚାଳକ ବସ୍ଟିକୁ ଭାଲୁ ପାଖରେ ରୋକିବା ପରେ ଟୁଲୁ ଧରିଥିବା ଏକ ପଲିଥିନରେ ଥିବା ପନିର ପଛ ସିଟର ଝରକା ବାଟେ ଖାଇବାକୁ ଦେଇଥିଲେ। କିନ୍ତୁ ବାଲିଆ ପଲିଥିନରେ ଥିବା ଖାଦ୍ୟ ସହ ଟୁଲୁଙ୍କ ଡାହାଣହାତ ପାପୁଲିକୁ କାମୁଡ଼ି ଧରିଥିଲା। ଖାଇବାକୁ ଦେଉଥିବାର ମଜା ପର୍ଯ୍ୟଟକମାନେ ଉଠାଉଥିବାବେଳେ ହଠାତ ପରିସ୍ଥିତି ବଦଳିଯାଇଥିଲା। ଟୁଲୁଙ୍କ ଚିତ୍କାର ଶୁଣି ସାଙ୍ଗରେ ଥିବା ସମ୍ପର୍କୀୟ ଆସି ବାଲିଆ ମୁହଁକୁ ଗୋଇଠା ମାରିବାରୁ ଭାଲୁଟି ଛାଡ଼ିଦେଇ ଚାଲିଯାଇଥିଲା। ଏହାପରେ ସଫାରି ବସ୍ଟି ପର୍ଯ୍ୟଟକଙ୍କୁ ନେଇ ବାହାରକୁ ପଳାଇଆସିଥିଲା। ସଫାରି ବାହାରକୁ ଆସିବା ପରେ ଟୁଲୁଙ୍କୁ ସଫାରିର କର୍ମଚାରୀମାନେ ଚିକିତ୍ସା ପାଇଁ ଘରୋଇ ଡାକ୍ତରଖାନାରେ ଭର୍ତ୍ତିି କରିଥିଲେ। ସଫାରି ବୁଲିବା ସମୟରେ ପର୍ଯ୍ୟଟକ ଓ ଗାଇଡ୍ କ’ଣ କରିବେ ଓ ନ କରିବେ ସେନେଇ ପଦକ୍ଷେପ ନିଆଯିବ। ଏ ସମ୍ପର୍କରେ ସଫାରିକୁ ଠିକାରେ ନେଇଥିବା ସଂସ୍ଥା ସହ ଗୁରୁବାର ଆଲୋଚନା କରାଯିବ ବୋଲି ନନ୍ଦନକାନନ ଉପନିର୍ଦ୍ଦେଶକ ସଞ୍ଜିତ କୁମାର କହିଛନ୍ତି।
