ବରୀ,୨୬ା୮(ଡି.ଏନ.ଏ.): ବରୀ ବ୍ଲକ ଏକ କୃଷିବହୁଳ ଅଞ୍ଚଳ। ବିଭିନ୍ନ ସମୟରେ ବନ୍ୟା, ବାତ୍ୟା, ମରୁଡି କୃଷକଙ୍କ ମେରୁଦଣ୍ଡକୁ ଦୋହଲାଇ ଦେଇଥାଏ। ତେବେ ସରକାରଙ୍କ ତରଫରୁ କୃଷକଙ୍କ ଆର୍ଥିକ ମେରୁଦଣ୍ଡକୁ ସୁଦୃଢ଼ କରିବା ନିମନ୍ତେ କାଳିଆ ଯୋଜନା, ବଳିଆ ଯୋଜନା ଓ କ୍ଷତିଗ୍ରସ୍ତ ଚାଷୀଙ୍କୁ କୃଷି ବୀମା ଅର୍ଥରାଶି ଆଦି ପ୍ରଦାନ କରାଯାଉଛି। ସରକାରଙ୍କ ପକ୍ଷରୁ ଚାଷୀଙ୍କୁ ସହାୟତା ରାଶି ବ୍ୟାଙ୍କ ଆକାଉଣ୍ଟ୍ ମାଧ୍ୟମରେ ଦିଆଯାଉଛି। ମାତ୍ର ଏହାର ସୁଯୋଗରେ ଚାଷୀମାନଙ୍କ ଉକ୍ତ ସହାୟତା ରାଶିକୁ ଋଣ ବାବଦକୁ ବ୍ୟାଙ୍କ କର୍ତ୍ତୃପକ୍ଷ କାଟି ରଖୁଥିବା ଅଭିଯୋଗ ହୋଇଛି। ବ୍ଲକ୍ ଅଧୀନରେ ଥିବା ବାଲିଆ, କମ୍ପଗଡ଼, ରାମଚନ୍ଦ୍ରପୁର, ବରୀ ଓ ରାଜାତୋଟା କଳିଙ୍ଗ ଗ୍ରାମ୍ୟ ବ୍ୟାଙ୍କ ଶାଖାରେ ଏପରି କରାଯାଉଥିବା ଚାଷୀମାନେ ଅଭିଯୋଗ କରିଛନ୍ତି। ସେହିପରି ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା(ଏମ୍ଜିଏନ୍ଆର୍ଇଜିଏସ୍) ଯୋଜନା ଓ ବାର୍ଦ୍ଧକଭତ୍ତା ଯୋଜନାରେ ଗ୍ରାହକଙ୍କ ଜମା ଖାତାକୁ ଆସୁଥିବା ଅର୍ଥରାଶିକୁ ମଧ୍ୟ କାଟି ରଖାଯାଉଛି।
ରତ୍ନଗିରି ପଞ୍ଚାୟତ ପଟଣା ଓ ରତ୍ନଗିରି ଗ୍ରାମର ଦୁଇଟି ନାମକୁ ଉଦାହରଣ ଭାବେ ନିଆଯାଇପାରେ। ପଟଣାଗ୍ରାମର କାଶୀନାଥ ପାତ୍ରଙ୍କ ବାପା ଗୋପୀନାଥ ବାର୍ଦ୍ଧକ୍ୟ ଭତ୍ତା ପାଉଥିବାରୁ ତାଙ୍କ ବ୍ୟାଙ୍କ୍ ଜମା ବହିରେ ଅର୍ଥରାଶି ଜମା ହୋଇଥିଲା। ଅପରପକ୍ଷରେ ସେହି ପଞ୍ଚାୟତର ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟରତ ଥିବା ପର୍ଶୁରାମ ମଲିକଙ୍କ ବାପା ଗୋଲେଖ ଶ୍ରମିକ ଭାବେ କାର୍ଯ୍ୟ କରିଥିବାରୁ ତାଙ୍କ ଆକାଉଣ୍ଟକୁ ଟଙ୍କା ଆସିଥିଲା। ତେଣୁ ଟଙ୍କା ଉଠାଣ କରିବାକୁ ସେମାନେ କମ୍ପଗଡ଼ କଳିଙ୍ଗ ଗ୍ରାମ ବ୍ୟାଙ୍କ ଶାଖାକୁ ଯାଇଥିବା ବେଳେ ଶାଖା ପରିଚାଳକ ତାଙ୍କ ନାମରେ ଋଣ ଥିବାରୁ ସେହି ଅର୍ଥକୁ ଋଣ ଶୁଝାଯାଇଛି ବୋଲି କହିଥିଲେ। ତେଣୁ ଆକାଉଣ୍ଟରୁ ପଇସା ଦେବାକୁ ମନା କରିଥିଲେ। ଏ ସମ୍ପର୍କରେ କମ୍ପଗଡ଼ ଶାଖା ପରିଚାଳକ ଶିବପ୍ରସାଦ ପାଢ଼ୀଙ୍କୁ ପଚାରିବାରେ ସେ କହିଛନ୍ତି, ଋଣଗ୍ରସ୍ତ କୃଷକ ହୁଅନ୍ତୁ ବା ଭତ୍ତା ହିତାଧିକାରୀ ସେମାନଙ୍କ ନାମରେ ଋଣ ଥିଲେ ତାଙ୍କ ଜମା ବହିରୁ ଅର୍ଥ ରାଶି କାଟିବା ପାଇଁ ଉପରିସ୍ଥ କର୍ତ୍ତୃପକ୍ଷଙ୍କ ତରଫରୁ ନିର୍ଦ୍ଦେଶ ରହିଛି ବୋଲି କହିଥିଲେ। ଏ ସମ୍ପର୍କରେ କଳିଙ୍ଗ ଗ୍ରାମ୍ୟ ବ୍ୟାଙ୍କ୍ର ରିଜିଓନାଲ ମ୍ୟାନେଜର ଚନ୍ଦନ କୁମାରଙ୍କୁ ପଚାରିବାରେ ସେ କହିଛନ୍ତି, ସରକାରଙ୍କ ତରଫରୁ ଏଭଳି କ୍ଷେତ୍ରରେ ଜମା ବହିରୁ ଅର୍ଥ ରାଶି କାଟିବାର ନିୟମ ନାହିଁ। ଯଦି ଏଭଳି କାର୍ଯ୍ୟ କୌଣସି ଶାଖା ପରିଚାଳକ କରିଥାନ୍ତି ତେବେ ଲିଖିତ ଅଭିଯୋଗ ଆସିଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି। ଅନ୍ୟପକ୍ଷରେ ଯେଉଁମାନଙ୍କ ଟଙ୍କା କଟା ଯାଇଛି ତାହା ତୁରନ୍ତ ଫେରସ୍ତ କରିବାକୁ ଦାବି ହୋଇଛି।
