ଖଇରପୁଟ,୨୮ା୪(ସ୍ବ.ପ୍ର.): ମାଲକାନଗିରି ଜିଲା ଖଇରପୁଟ ବ୍ଲକ ଅନ୍ତର୍ଗତ ଅଣ୍ଡ୍ରାହାଲ ପଞ୍ଚାୟତରେ ଏପରି କିଛି ଗ୍ରାମ ଅଛି ଯେଉଁଠି ଲୋକେ ଏଯାଏ ମୌଳିକ ସୁବିଧା ଟିକେ ପାଇପାରିନାହାନ୍ତି। ଗ୍ରାମରେ ଲାଗିରହିଛି ପାନୀୟଜଳ, ସ୍ବାସ୍ଥ୍ୟସେବା, ଶିକ୍ଷା ଓ ରାସ୍ତାଘାଟ ସମସ୍ୟା। ବର୍ଷାଦିନେ ଗ୍ରାମଗୁଡିକ ବାହ୍ୟଜଗତରୁ ବିଚ୍ଛିନ୍ନ ହୋଇପଡିଥାଏ। ଏପରି ଦେଖିବାକୁ ମିଳିଛି ବଣ୍ଡାଘାଟିର ପାତ୍ରପୁଟ ଗ୍ରାମ ସମେତ ଅନ୍ୟ କେତେକ ଗ୍ରାମ କ୍ଷେତ୍ରରେ।
ପାତ୍ରପୁଟ ଗ୍ରାମରେ ଶିକ୍ଷାଲାଭ ପାଇଁ ବିଦ୍ୟାଳୟ ଅଛି ମାତ୍ର ଗ୍ରାମକୁ ଆସିବାକୁ ରାସ୍ତା ନ ଥିବାରୁ ଅନେକ ସମୟରେ ଶିକ୍ଷକ ଆସିପାରନ୍ତି ନାହିଁ। ଅଙ୍ଗନଓ୍ବାଡି କେନ୍ଦ୍ରଟିଏ ମଧ୍ୟ ଗ୍ରାମରେ ନାହିଁ । ପାନୀୟ ଜଳ ପାଇଁ ନାଳପାଣି ଭରସା। ରହିଥିବା ନଳକୂପ ଅଚଳ ହୋଇପଡିଛି। ଖରାଦିନେ ଲୋକେ ନାଳପାଣି ବ୍ୟବହାର କରନ୍ତି। ବର୍ଷାଦିନେ ପାନୀୟ ଜଳ ପାଇବା କଷ୍ଟକର ହୋଇପଡେ। ଜଳଯୋଗାଣ ପାଇଁ ଗ୍ରାମକୁ ଓପିଲିପି ପକ୍ଷରୁ ପାଇପ ଆସିଥିଲେ ମଧ୍ୟ କାମ ନ ହୋଇ ଏହା କେଉଁଠି ଲୋକଙ୍କ ବାଡ ତିଆରିରେ ଲାଗିଛି ତ କେଉଁଠି ବର୍ଷ ବର୍ଷ ଧରି ଅଦରକାରୀ ଭାବେ ପଡିରହିଛି ।
ଗ୍ରାମକୁ ରାସ୍ତା ନ ଥିବାରୁ ଏଠାରେ ବସୁଥିବା ହାଟ ବନ୍ଦ ହୋଇଯାଇଛି। ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ପାଇଁ ହଇରାଣ ହେଉଛନ୍ତି ଏଠାକାର ବାସିନ୍ଦା। ସରକାରୀ ଅଧିକାରୀମାନଙ୍କ ପାଦ ଏଠାରେ ପଡେ ନାହିଁ। ଅଞ୍ଚଳର ସମସ୍ୟା ସମାଧାନ ନେଇ ବାରମ୍ବାର ଲୋକ ପ୍ରତିନିଧିମାନେ ପ୍ରଶାସନ ନିକଟରେ ଦାବି କରୁଥିଲେ ମଧ୍ୟ କିଛି ସୁଫଳ ମିଳୁନାହିଁ ବୋଲି କହିଛନ୍ତି ଅଣ୍ଡ୍ରାହାଲ ପଞ୍ଚାୟତର ପୂର୍ବତନ ସରପଞ୍ଚ ସୋମନାଥ ଶିଶା। ପାତ୍ରପୁଟ ଭଳି ଏଠାରେ ଥିବା ଅନ୍ୟ ଗ୍ରାମଗୁଡିକର ବାସିନ୍ଦା ମଧ୍ୟ ମୌଳିକ ସୁବିଧା ସୁଯୋଗ ପାଇବାରୁ ବଞ୍ଚତ୍ତ ହେଉଥିବା ସ୍ବୀକାର କରିଛନ୍ତି ଖଇରପୁଟ ବ୍ଳକ ଅଧ୍ୟକ୍ଷ ବିଘ୍ନ କିର୍ଷାନି। ଗ୍ରାମକୁ ରାସ୍ତା ନ ଥିବାରୁ ବିକାଶମୂଳକ କାର୍ଯ୍ୟ ହୋଇପାରୁ ନ ଥିବା ବେଳେ ଆଗାମୀ ଦିନରେ ଲୋକଙ୍କ ସମସ୍ୟାକୁ ପ୍ରାଥମିକତା ଦେଇ କାର୍ଯ୍ୟ କରାଯିବ ବୋଲି କହିଛନ୍ତି ବ୍ଳକ ଅଧ୍ୟକ୍ଷ କିର୍ଷାନି। ଅନ୍ୟପକ୍ଷରେ ବଣ୍ଡାଘାଟି ଅଞ୍ଚଳର ଉନ୍ନତି ପାଇଁ ଥିବା ବଣ୍ଡା ଉନ୍ନୟନ ସଂସ୍ଥା (ବିଡିଏ) ବଣ୍ଡା ଜନଜାତିଙ୍କ କି ପ୍ରକାର ବିକାଶ କରୁଛି ତାହା ଦେଖିବାକୁ ମିଳୁନାହିଁ ବୋଲି ସାଧାରଣରେ ଆଲୋଚନା ହେଉଛି। ଏଥିପ୍ରତି ଦୃଷ୍ଟି ଦେଇ ଜିଲା ପ୍ରଶାସନ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
