ବଜରଙ୍ଗ ପଦକ ଶୂନ୍ୟ
8:13 amOctober 7, 2023October 7, 2023 / 04

ହାଙ୍ଗ୍‌ଝୋ, ୭ା୧୦ (ପି.ଟି.): ସିଲେକ୍ସନ ଟ୍ରାଏଲ୍‌ ବିନା ଏସିଆନ ଗେମ୍ସରେ ଭାଗ ନେଇଥିବା କୁସ୍ତିଯୋଦ୍ଧା ବଜରଙ୍ଗ ପୁନିଆଙ୍କୁ ଏସିଆନ ଗେମ୍ସରୁ ବିନା ପଦକରେ ଲଜ୍ଜାଜନକ ବିଦାୟ ନେବାକୁ ପଡ଼ିଛି। ଅନ୍ୟପକ୍ଷରେ ପ୍ରତିଭାସମ୍ପନ୍ନ ଅମନ ଶେରାଓ୍ବତଙ୍କ ସମେତ ଅନ୍ୟ ୩ ଭାରତୀୟ ବ୍ରୋଞ୍ଜ ଜିତିବାରେ ସଫଳ ହୋଇଛନ୍ତି। ଚଳିତବର୍ଷ ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫ୍‌ଆଇ) ମୁଖ୍ୟ ବ୍ରିଜ ଭୂଷଣ ଶରଣ ସିଂଙ୍କ ବିପକ୍ଷରେ ବିକ୍ଷୋଭ ପ୍ରଦର୍ଶନରେ ବହୁ ସମୟ ବ୍ୟୟ କରିଥିବା ବଜରଙ୍ଗ ଦୁଇଟି ବିଜୟ ସହ ଭଲ ଆରମ୍ଭ କରିଥିଲେ। ମାତ୍ର ଇରାନର ରହମନ ଆମୋଜାଦଖାଲିଲି ଓ ଜାପାନର କାଇକି ୟାମାଗୁଚିଙ୍କଠାରୁ ପରାଜିତ ହୋଇଯାଇଥିଲେ। ସୂଚନାଯୋଗ୍ୟ, ବିଶାଳ କାଲିରମନ ଏସିଆନ ଗେମ୍ସ ଟ୍ରାଏଲ୍ସ ଜିତିଥିଲେ। ଭୂପିନ୍ଦର ସିଂ ବାଜଓ୍ବାଙ୍କ ନେତୃତ୍ୱରେ ଭାରତୀୟ ଅଲିମ୍ପିକ ଆାସୋସିଶନ (ଆଇଓଏ) ଆଡହକ୍‌ କମିଟି କିନ୍ତୁ ବଜରଙ୍ଗଙ୍କୁ ସିଧାସଳଖ ଏଣ୍ଟ୍ରି ଦେଇଥିଲେ। ତାଙ୍କର ଏହି ନିଷ୍ପତ୍ତି କୁସ୍ତି ମହଲରେ ସମାଲୋଚିତ ହୋଇଥିଲା। ବାଜଓ୍ବାଙ୍କ ନେତୃତ୍ୱାଧୀନ ପ୍ୟାନେଲର ନିଷ୍ପତ୍ତି ଭୁଲ ଥିଲା ବୋଲି ପ୍ରମାଣିତ ହୋଇଥିଲା। ବିକ୍ଷୋଭରେ ସାମିଲଥିବା ଅନ୍ୟ ଜଣାଶୁଣା କୁସ୍ତିଯୋଦ୍ଧା ଭିନେଶ ଫୋଗଟଙ୍କୁ ମଧ୍ୟ ଟ୍ରାଏଲ୍ସରୁ ଛାଡ଼ ମିଳିଥିଲା। ମାତ୍ର ସେ ଆଘାତପ୍ରାପ୍ତ ହେବାରୁ ତାଙ୍କ ସ୍ଥାନରେ ଭାଗ ନେଇଥିବା ଅନ୍ତିମ ପଙ୍ଗାଲ ବ୍ରୋଞ୍ଜ ଜତିବାରେ ସଫଳ ହୋଇଛନ୍ତି।