ବାରିପଦା ଅଫିସ,୧୭ା୩: ମୟୂରଭଞ୍ଜ ଜିଲାର ତିନୋଟି ବାଲି ସଇରାତରେ ନ୍ୟାସନାଲ ଗ୍ରୀନ ଟ୍ରିବ୍ୟୁନାଲର ଛାଟ ପରେ ମଧ୍ୟ ଚୋରା ଚାଲାଣ ରୋକିବାରେ ପ୍ରଶାସନ ବିଫଳ ହୋଇଛି। ଫଳରେ ଅପରାଧ ମୂଳକ କାର୍ଯ୍ୟକଳାପ ବୃଦ୍ଧି ପାଇବାରେ ଲାଗିଛି। ଚୋରାରେ ବାଲି ପରିବହନ କରିବାକୁ ନେଇ ଦୁଇ ଗୋଷ୍ଠୀଙ୍କ ମଧ୍ୟରେ ଗଣ୍ଡଗୋଳ ଘଟି ଜଣେ ଗୁରୁତର ହୋଇଛନ୍ତି। ତାଙ୍କୁ ବାରିପଦାସ୍ଥିତ ପିଆର୍ଏମ୍ ମେଡିକାଲରେ ଭର୍ତ୍ତି କରାଯାଇଛି। ଏଭଳି ଘଟଣା ଦେଖିବାକୁ ମିଳିଛି ବଡ଼ସାହି ତହସିଲ ଅଧୀନ ବର୍ତ୍ତନା ଗ୍ରାମରେ। ବଡ଼ସାହି ପୋଲିସ ଜଣଙ୍କୁ ଅଟକ ରଖି ପଚରାଉଚୁରା ଜାରି ରଖିଛି। ଅନ୍ୟ ପକ୍ଷରେ ବିନା ପଞ୍ଜୀକରଣରେ କୃଷି କାର୍ଯ୍ୟଲାଗି ଋଣରେ ନିଆଯାଇଥିବା ଟ୍ରାକ୍ଟର ଯୋଗେ ଚୋରା ବାଲି ପରିବହନ ହେଉଥିବା ନଜରକୁ ଆସୁଛି। ଏନେଇ ବେତନଟୀ ଥାନାରେ ଏକ ମାମଲା ରୁଜୁ ହୋଇ ତଦନ୍ତ ଜାରି ରହିଛି।
ସୂଚନାଯୋଗ୍ୟ, ଜିଲାରେ ୬୦ରୁ ଉର୍ଦ୍ଧ୍ୱ ବାଲି ସଇରାତ ପ୍ରଶାସନ ପକ୍ଷରୁ ନିଲାମ ପ୍ରକ୍ରିୟା କରାଯାଇ ନାହିଁ। ଏହାର ସୁଯୋଗ ନେଇ ବାଲି ମାଫିଆମାନେ ବୁଢ଼ାବଳଙ୍ଗ ନଦୀରୁ ବେଆଇନ ବାଲି ଉତ୍ତୋଳନ କରି ଚୋରା ଚାଲାଣ କରୁଛନ୍ତି। ରାଜସ୍ବ ବିଭାଗ କିମ୍ବା ପୋଲିସ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ଚୋରା ଚାଲାଣ ଦିନକୁ ଦିନ ବୃଦ୍ଧି ପାଉଛି। ଏପରିକି ଅଧିକ ଲାଭ ଆଶାରେ କିଛି ଲୋକ କୃଷି ଋଣ ଆକାରରେ ବିଭିନ୍ନ କମ୍ପାନୀର ଟ୍ରାକ୍ଟର ଆଣି ଚୋରାରେ ବାଲି ପରିବହନ କାର୍ଯ୍ୟରେ ଲଗାଉଛନ୍ତି। ଚୋରା ପରିବହନ କରୁଥିବା ଏକ ନୂଆ ଟ୍ରାକ୍ଟର ବେତନଟୀ ପୋଲିସ ଧରିବା ପରେ ଘଟଣା ପଦାକୁ ଆସିଛି। ଜବତ ଟ୍ରାକ୍ଟରଟି ୧୫ଦିନ ପୂର୍ବରୁ ଏହି କାର୍ଯ୍ୟରେ ଲିପ୍ତ ରହିଥିଲା। ଅଦ୍ୟାବଧି ଏହି ଟ୍ରାକ୍ଟରର ଇଞ୍ଜିନ ଓ ଡାଲାର ପରିବହନ ନମ୍ବର ପଞ୍ଜୀକରଣ କରାଯାଇ ନାହିଁ। ପରିବହନ ବିଭାଗର ନିୟମ ଅନୁଯାୟୀ ବିନା ପଞ୍ଜୀକରଣରେ କୌଣସି ଯାନବାହାନ ଚଳାଚଳ କରିପାରିବ ନାହିଁ ବୋଲି ଅଧିକାରୀମାନେ ପ୍ରକାଶ କରିଛନ୍ତି। ତେବେ ଟ୍ରାକ୍ଟରଟି ଜବତ କରିବା ସମୟରେ ଡ୍ରାଇଭର ଫେରାର ହୋଇଯିବାରୁ ଇଞ୍ଜିନ ନମ୍ବର ଅନୁଯାୟୀ ଅଜଣା ମାଲିକଙ୍କ ନାମରେ ମାମଲା ରୁଜୁ କରାଯାଇଥିବା ଥାନାଧିକାରୀ ସସ୍ମିତା ମହାନ୍ତ ପ୍ରକାଶ କରିଛନ୍ତି। ଟ୍ରାକ୍ଟରଟି ବାଲେଶ୍ୱରର କମ୍ପାନୀ ଅଧିକୃତ ଶୋ’ରୁମରୁ କିଣାଯାଇଛି। ଏ ନେଇ ବାଲେଶ୍ୱର ଆଞ୍ଚଳିକ ପରିବହନ ଅଧିକାରୀ କୁହନ୍ତି, ଘଟଣା ସମ୍ପର୍କରେ କୌଣସି ଅଭିଯୋଗ ହୋଇନାହିଁ। ତେବେ କମ୍ପାନୀର ଏଭଳି କାର୍ଯ୍ୟକଳାପକୁ ନେଇ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେହିପରି ମୟୂରଭଞ୍ଜ ଆଞ୍ଚଳିକ ପରିବହନ ଅଧିକାରୀ ବିଶ୍ୱଜିତ ବେହେରା କୁହନ୍ତି, ବିନା ପଞ୍ଜୀକରଣରେ ଗାଡି ବିକିବା ଧର୍ତ୍ତବ୍ୟ ଅପରାଧ। ଏଥି ପାଇଁ ଉଭୟ କ୍ରେତା ଓ ବିକ୍ରେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ନିୟମ ରହିଛି। ଟ୍ରାକ୍ଟର ଜବତ ହେବା ନେଇ ଦୁଇ ଗୋଷ୍ଠୀଙ୍କ ମଧ୍ୟରେ ତିକ୍ତତା ଆରମ୍ଭ ହୋଇଥିଲା। ଗୁରୁବାର ସକାଳେ ବଚସା ହେବାରୁ ଗଣ୍ଡଗୋଳର ସୂତ୍ରପାତ ହୋଇଥିଲା। ଗୋଟିଏ ଗୋଷ୍ଠୀର ମରଣାନ୍ତକ ଆକ୍ରମଣରେ ବର୍ତ୍ତନା ଗ୍ରାମର ବନ୍ଧନ ଜେନା ଗୁରୁତର ହୋଇ ଚିକିତ୍ସାଧୀନ ରହିଛନ୍ତି। ଜିଲା ପ୍ରଶାସନ ତୁରନ୍ତ ପଦକ୍ଷେପ ଗ୍ରହଣ କରିବା ଲାଗି ଦାବି ହେଉଛି।
