ଭୁବନେଶ୍ୱର,୫।୮: ମନ୍ତ୍ରୀ, ନେତା ଓ ବରିଷ୍ଠ ପ୍ରଶାସକଙ୍କୁ ସୁବିଧାରେ ବିମାନ ସେବା ଯୋଗାଇଦେବାକୁ ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି)ର ବ୍ୟବସ୍ଥା ରହିଛି। ଏହିକ୍ରମରେ ଯଦି କୌଣସି ମନ୍ତ୍ରୀ, ନେତା ଓ ପ୍ରଶାସକ ସରକାରୀ କାର୍ଯ୍ୟରେ ବିମାନ ଯାତ୍ରା କରନ୍ତି, ତେବେ ବିଭାଗୀୟ ଅନୁରୋଧକ୍ରମେ ସେମାନଙ୍କ ପାଇଁ ଓଟିଡିସି ପକ୍ଷରୁ ଟିକେଟ କରାଯାଇଥାଏ। ଆଉ ଏହି ଟିକେଟର ଦେୟ ସମ୍ପୃକ୍ତ ବିଭାଗ ପକ୍ଷରୁ ୩ମାସ ମଧ୍ୟରେ ଓଟିଡିସି ନିକଟରେ ପଇଠ କରାଯାଇଥାଏ। ନଚେତ୍ ସମ୍ପୃକ୍ତ ବିଭାଗକୁ ନୋଟିସ କରାଯାଇ ଟଙ୍କା ଆଦାୟ କରାଯାଇଥାଏ। ହେଲେ ଆର୍ଟିଆଇ ତଥ୍ୟରୁ ମିଳିଥିବା ସୂଚନା ଅନୁସାରେ କିଛି ବିଭାଗର ମନ୍ତ୍ରୀ ଓ ପୂର୍ବତନ ମନ୍ତ୍ରୀଙ୍କ ଉପରେ ୪ଲକ୍ଷ ୬୨ହଜାର ୨୭୧ଟଙ୍କା ଦୀର୍ଘ ବର୍ଷ ଧରି ବକେୟା ପଡ଼ି ରହିଥିବା ଜାଣିବାକୁ ମିଳିଛି।
୨୦୨୨ ଜୁଲାଇ ୧୧ରେ ଆର୍ଟିଆଇ ସୂତ୍ରରୁ ମିଳିଥିବା ସୂଚନାନୁସାରେ ପୂର୍ବତନ ପର୍ଯ୍ୟଟନ, ଭାଷା ଓ ସଂସ୍କୃତି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ୨୦୧୯ ଜୁଲାଇ ୧ରୁ ୨୦୨୧ ସେପ୍ଟେମ୍ବର ୧୯ ମଧ୍ୟରେ ୫ଥର ବିମାନ ଯାତ୍ରା କରିଛନ୍ତି। ତାଙ୍କର ୫୫ ହଜାର ୪୩୩ଟଙ୍କା ବାକି ରହିଛି। ପୂର୍ବତନ ବିଜ୍ଞାନ ଓ କାରିଗରି ବିଭାଗ, ସାଧାରଣ ଉଦ୍ୟୋଗ ଏବଂ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ୨୦୧୫ ସେପ୍ଟେମ୍ବର ୧୫ରୁ ୨୦୧୯ ମାର୍ଚ୍ଚ ୨ ମଧ୍ୟରେ ୧୨ଥର ବିଭିନ୍ନ ସ୍ଥାନକୁ ଯାତ୍ରା କରିଛନ୍ତି। ତାଙ୍କ ନାମରେ ୧ଲକ୍ଷ ୩୦ହଜାର ୮ଟଙ୍କା ବାକି ପଡ଼ିଛି। ଏହି ୨ମନ୍ତ୍ରୀ ସଂସ୍କୃତି ଓ ପର୍ଯ୍ୟଟନ ବିଭାଗର ପୂର୍ବତନ ମନ୍ତ୍ରୀ ଥିଲେ। ସେବା ଉପଲବ୍ଧି ବିଭାଗର ଉଭୟେ ମନ୍ତ୍ରୀ ହୋଇଥିଲେ ମଧ୍ୟ ବକେୟା ଅର୍ଥ ସଂଗ୍ରହ ହୋଇ ନ ପାରିବା ପ୍ରଶ୍ନବାଚୀ ସୃଷ୍ଟି କରୁଛି। ସେହିପରି ପୂର୍ବତନ ଶ୍ରମ ମନ୍ତ୍ରୀ ସୁଶାନ୍ତ ସିଂ ୨୦୨୧ ନଭେମ୍ବର ୨୧ରୁ ୨୩ମଧ୍ୟରେ ୪ଥର ବିମାନ ଯାତ୍ରା କରିଥିବାବେଳେ ତାଙ୍କ ନାମରେ ୮୫,୯୭୪ଟଙ୍କା ବକେୟା ରହିଥିବାବେଳେ ପୂର୍ବତନ ଅର୍ଥମନ୍ତ୍ରୀ ଶଶିଭୂଷଣ ବେହେରାଙ୍କ ନାମରେ ୨୦୧୭ ରୁ ୨୦୧୯ ମଧ୍ୟରେ ୬୯,୮୫୧ଟଙ୍କା, ପୂର୍ବତନ ସ୍କୁଲ ଓ ଗଣଶିକ୍ଷା ମନ୍ତ୍ରୀ ବଦ୍ରି ନାରାୟଣ ପାତ୍ରଙ୍କ ନାମରେ ୨୦୧୮ରେ ଥରେ ଯାତ୍ରା କରି ୩୯,୭୨୪ଟଙ୍କା, ପୂର୍ବତନ ମନ୍ତ୍ରୀ ବିକ୍ରମ କେଶରୀ ଆରୁଖ ୨୦୧୯ରୁ ୨୧ମଧ୍ୟରେ ୨ଥର ଯାତ୍ରା କରି ୧୦,୧୦୭ଟଙ୍କା, ଦିବଂଗତ ମନ୍ତ୍ରୀ କଳ୍ପତରୁ ଦାସ ୨୦୧୪ରେ ଯାତ୍ରା କରିଥିବାବେଳେ ତାଙ୍କ ନାମରେ ୨୭,୩୬୧ଟଙ୍କା, ମନ୍ତ୍ରୀ ସମୀର ରଞ୍ଜନ ଦାଶ ୨୦୧୯ରେ ୨ଥର ଯାତ୍ରା କରିଥିବାବେଳେ ୧୩,୬୫୬ଟଙ୍କା, ମନ୍ତ୍ରୀ ଚନ୍ଦ୍ର ସାରଥି ବେହେରା ୨୦୧୮ରେ ଥରେ ଗସ୍ତ କରି ୧୬, ୮୫୧ଟଙ୍କା ଓ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ୨୦୨୧ରେ ଥରେ ଗସ୍ତ କରି ତାଙ୍କ ନାମରେ ୧୩,୩୦୬ଟଙ୍କା ଅର୍ଥ ବାକି ରହିଥିବା ଜଣାପଡ଼ିଛି। ଏ ନେଇ ଓଟିଡିସିର ବିମାନ ସେବା ପରିଚାଳକ ରଞ୍ଜନ କୁମାର ମିଶ୍ରଙ୍କୁ ପଚାରିବାରେ ସେ କହିଛନ୍ତି, ବାକି ରହିଥିବା ଅର୍ଥ ପାଇଁ ୩ମାସ ପରେ ବିଭାଗକୁ ନୋଟିସ କରାଯାଇଥାଏ। ପ୍ରାୟ ସଂଗ୍ରହ ହୋଇ ଯାଇଥାଏ। କେତେବେଳେ ନିର୍ବାଚନ ତ ଆଉ କେତେବେଳେ କୌଣସି ମନ୍ତ୍ରୀଙ୍କ ବିଭାଗ ପରିବର୍ତ୍ତନ ସମୟରେ ସଂଗ୍ରହ କରିବାରେ ବିଳମ୍ବ ହେଉଛି। ତେବେ ବର୍ତ୍ତମାନ ବିମାନ ସେବା କିପରି ଚାଲିଛି ବୋଲି ପ୍ରଶ୍ନର ଉତ୍ତରରେ ଲାଭରେ ଚାଲିଛି ବୋଲି ମିଶ୍ର କହିଛନ୍ତି।
ଶର୍ମିଷ୍ଠା ପାଣିଗ୍ରାହୀ
