ଲାସ୍ ଭେଗାସ, ୮ା୨ (ଏପି)-ପୂର୍ବତନ ହେଭିଓ୍ବେଟ୍ ଚାମ୍ପିୟନ ଲିଅନ୍ ସ୍ପିଙ୍କ୍ସଙ୍କ ପରଲୋକ ହୋଇଛି। ତାଙ୍କୁ ୬୭ବର୍ଷ ବୟସ ହୋଇଥିଲା। ସେ ଅଲିମ୍ପିକ ସ୍ବର୍ଣ୍ଣ ଜିତିଥିଲେ। ସେ ତାଙ୍କ ୮ମ ପ୍ରଫେସନାଲ ଫାଇଟ୍ରେ ମହମ୍ମଦ ଅଲୀଙ୍କୁ ପରାସ୍ତ କରି ହେଭିଓ୍ବେଟ ଟାଇଟଲ ହାସଲ କରି ସେ ସମୟରେ ଅନ୍ୟମାନଙ୍କୁ ଆଶ୍ଚର୍ଯ୍ୟଚକିତ କରିଦେଇଥିଲେ। ସେ ତାଙ୍କ ଜୀବନର ଶେଷ ଭାଗରେ ଲାସ୍ ଭେଗାସରେ ବାସ କରୁଥିଲେ। ସେ କର୍କଟ ରେଗରେ ପୀଡ଼ିତ ଥିଲେ। ତାଙ୍କର ପ୍ରୋଷ୍ଟେଟ ସମସ୍ୟା ରହିଥିଲା। ୧୯୭୮ରେ ଅଲୀଙ୍କ ବିପକ୍ଷ ଲଢେଇ ୧୫ ରାଉଣ୍ଡ ବିଶିଷ୍ଟ ଥିଲା। ସ୍ପିଙ୍କ୍ସ ଜଣେ ଅଣ ର଼୍ୟାଙ୍କିଙ୍ଗପ୍ରାପ୍ତ ବକ୍ସର ଥିଲେ। ଏହା ସତ୍ତ୍ୱେ ତାଙ୍କୁ ଏହି ଫାଇଟ୍ ପାଇଁ ନିଆଯାଇଥିଲା। କାରଣ ଅଲୀ ଏକ ସହଜ ଲଢେଇ ଚାହୁଁଥିଲେ। ମୁକାବିଲାରେ ସ୍ପିଙ୍କ୍ସ ସମ୍ପୂର୍ଣ୍ଣ ପ୍ରାଧାନ୍ୟ ବିସ୍ତାର କରିଥିଲେ। ବିଭାଜିତ ନିଷ୍ପତ୍ତି ଭିତ୍ତିରେ ସେ ଚମକପ୍ରଦ ବିଜୟ ହାସଲ କରିଥିଲେ। ଏହାର ୭ ମାସ ପରେ ନ୍ୟୁ ଓର୍ଲିନ୍ସସ୍ଥିତ ସୁପରଡୋମ୍ଠାରେ ଏହି ଦୁଇ ବକ୍ସରଙ୍କ ମଧ୍ୟରେ ପୁଣି ଏକ ମୁକାବିଲା ହୋଇଥିଲା। ଏହାକୁ ଇନ୍ଡୋରରେ ରେକର୍ଡ ୭୨,୦୦୦ ଏବଂ ଟେଲିଭିଜନରେ ୯୦ ନିୟୁତ ଲୋକ ଉପଭୋଗ କରିଥିଲେ। ଏଥିରେ ମହମ୍ମଦ ଅଲୀ ବିଜୟ ଲାଭ କରିଥିଲେ। ଏହାଥିଲା ତାଙ୍କ ବକ୍ସିଂ କ୍ୟାରିୟରର ଶେଷ ବିଜୟ।
