ନୂଆଦିଲ୍ଲୀ,୨୪।୩: ଦେଶର ଶିଳ୍ପଗୁଡ଼ିକର ସୁରକ୍ଷା ଓ ଏହାର ସମାଧାନ ଲାଗି ଭାରତୀୟ ଆଲୁମିନିୟମ ସଂଘ (ଏଏଆଇ) ପକ୍ଷରୁ ନିକଟରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ) ସମେତ କେନ୍ଦ୍ର କୋଇଲା ମନ୍ତ୍ରୀ ଏବଂ କ୍ୟାବିନେଟ୍ ସଚିବଙ୍କୁ ମଧ୍ୟ ଚିଠି ଲେଖି ସେମାନଙ୍କ ଜରୁରୀ ହସ୍ତକ୍ଷେପ ଲୋଡ଼ାଯାଇଛି। କୌଣସି ଅଗ୍ରିମ ନୋଟିସ ନ ଦେଇ ଅଣବିଦ୍ୟୁତ୍ କ୍ଷେତ୍ରକୁ କୋଇଲା ପାଇଁ ସଡ଼କ ଓ ରେକ୍ ଯୋଗାଣକୁ ଆହୁରି ହ୍ରାସ କରିବା ଲାଗି କୋଲ୍ ଇଣ୍ଡିଆ ନିକଟରେ ଗ୍ରହଣ କରିଥିବା ଏକ ନିଷ୍ପତ୍ତି ଯୋଗୁ ସଂଘ ଏଭଳି ପଦକ୍ଷେପ ଗ୍ରହଣ କରିଛି। ଗତ ୭ ମାସ ଧରି ଦେଶରେ ଲାଗି ରହିଥିବା କୋଇଲା ସଙ୍କଟରେ କିଛିଟା ସୁଧାରର ସଙ୍କେତ ମିଳିଥିବା ବେଳେ ଅତିକମ୍ରେ ଶକ୍ତିକ୍ଷେତ୍ର ଯାହାର କୋଇଲା ଷ୍ଟକ୍ ୨୦୨୧ର ଅଗଷ୍ଟ-ସେପ୍ଟେମ୍ବରରେ ୩-୪ ଦିନ ଭଳି ନିମ୍ନସ୍ତରକୁ ହ୍ରାସ ପାଇଥିଲା ତାହା ୯-୧୦ ଦିନର ଷ୍ଟକ୍ ପର୍ଯ୍ୟନ୍ତ ଉଲ୍ଲେଖନୀୟ ଭାବେ ଉନ୍ନତ ହୋଇପାରିଛି। ଅଣବିଦ୍ୟୁତ୍ କ୍ଷେତ୍ର ଲାଗି କୋଇଲା ଯୋଗାଣ ଏବେ ୩.୬ ଏଲ୍ଟିପିଡି (ଦୈନିକ ଲକ୍ଷ ଟନ୍)ରୁ ୨.୭୫ ଏଲ୍ଟିପିଡିକୁ ହ୍ରାସ ପାଇଛି ଯାହା ଚାହିଦା-ଯୋଗାଣ ଅନ୍ତରକୁ ଆହୁରି ଖରାପ କରିଛି ଏବଂ ଶିଳ୍ପରେ ବଡ଼ ଧରଣର ଅଭାବ ସୃଷ୍ଟି କରିଛି। ଏହି ଚିନ୍ତାଜନକ ଘଟଣା ଏଭଳି ସମୟରେ ଘଟିଛି ଯେତେବେଳେ ଅଣ-ବିଦ୍ୟୁତ୍ କ୍ଷେତ୍ର ଲାଗି କୋଇଲା ଯୋଗାଣ ୨୦୨୨ ଆର୍ଥିକ ବର୍ଷର ସେପ୍ଟେମ୍ବର-ଫେବୃୟାରୀ ମଧ୍ୟରେ ୧୨% (୬୧ ଏମ୍ଏମ୍ଟିରୁ ୫୮ ଏମ୍ଏମ୍ଟି)କୁ ହ୍ରାସ ପାଇଥିବାବେଳେ ବିଦ୍ୟୁତ୍ କ୍ଷେତ୍ରକୁ ଯୋଗାଣରେ ୧୧% (୨୪୮ ଏମ୍ଏମ୍ଟିରୁ ୩୦୫ ଏମ୍ଏମ୍ଟି) କୁ ବୃଦ୍ଧି ପାଇଛି। ଫଳରେ ଅଣ ବିଦ୍ୟୁତ୍ କ୍ଷେତ୍ର ଲାଗି ୪୮୦୦ ରେକ୍ର ଯୋଗାଣକୁ ନେଇ ଏକ ବିଶାଳ ବକେୟା ସୃଷ୍ଟିକରିଛି। ଏହି ସ୍ଥିତି ଦ୍ୱାରା ସବୁଠୁ ଗୁରୁତର ଭାବେ ପ୍ରଭାବିତ ହୋଇଛନ୍ତି ବିଦ୍ୟୁତ୍ ଉପରେ ଅତ୍ୟଧିକ ନିର୍ଭରଶୀଳ ଆଲୁମିନିୟମ୍ କ୍ଷେତ୍ରର କ୍ୟାପ୍ଟିଭ୍ ପାୱାର ପ୍ଲାଣ୍ଟ୍ (ସିପିପି)। ଯଦିଓ ଏହି ଶିଳ୍ପ ଲାଗି ପ୍ରସ୍ତାବିତ କୋଇଲା ଷ୍ଟକର ସ୍ତର ହେଉଛି ଅତିକମ୍ରେ ୧୫ ଦିନ, କିନ୍ତୁ ଏବେ ତାହା ୪ ଦିନ ଭଳି ବିପଦପୂର୍ଣ୍ଣ ନିମ୍ନ ଷ୍ଟକ୍ ସ୍ତରକୁ ହ୍ରାସ ପାଇଛି।
