ଭୁବନେଶ୍ୱର,୧୧।୨(ବ୍ୟୁରୋ): ଓଡ଼ିଆ ଚଳଚ୍ଚିତ୍ରର ବରିଷ୍ଠ ଅଭିନେତା ମିହିର ଦାସଙ୍କର ନିକଟରେ ପରଲୋକ ଘଟିଛି। ସେ ଦର୍ଶକଙ୍କ ଗହଣରେ ନାହାନ୍ତି ସତ, କିନ୍ତୁ ନିଜର ଚମତ୍କାର, ହୃଦୟ ସ୍ପର୍ଶୀ ଅଭିନୟ ପାଇଁ ସମସ୍ତଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ଛାଡ଼ି ଯାଇଛନ୍ତି। କଳାକାର କେବେ ମରେ ନାହିଁ, ନିଜ କଳା ଜରିଆରେ ଲୋକଙ୍କ ମନ ଆଉ ହୃଦୟରେ ସବୁଦିନ ବଞ୍ଚତ୍ ରହେ, ଯାହା ମିହିରଙ୍କ କ୍ଷେତ୍ରରେ ବି ଦେଖିବାକୁ ମିଳୁଛି। ତାଙ୍କୁ ଭଲ ପାଇବାର ନିଆରା ନିଦର୍ଶନ ସ୍ବରୂପ କଟକ କୁମ୍ଭାର ସାହିର ବାସିନ୍ଦା କାକାଙ୍କୁ ଶ୍ରଦ୍ଧାଞ୍ଜଳି ଦେବାକୁ ଏକ ପ୍ରତିମୂର୍ତ୍ତି ତିଆରି କରୁଛନ୍ତି। ପ୍ରାୟ ୧୦ଦିନ ଧରି ଦିନରାତି ଏକକରି ୧୫ଜଣ ଶିଳ୍ପୀ ମୂର୍ତ୍ତି ତିଆରିରେ ଲାଗିପଡିଛନ୍ତି। ଏହାର ଉଚ୍ଚତା ପ୍ରାୟ ୭ ଫୁଟ ରହିଥିବାବେଳେ ଅବିକଳ ମିହିର ଦାସଙ୍କ ପ୍ରତିଛବି ଭଳି ଦୃଶ୍ୟମାନ ହେଉଛି। ଶୁକ୍ରବାର ୧୧ ତାରିଖରେ ମିହିରଙ୍କ ୬୩ତମ ଜନ୍ମଦିନ ଅବସରରେ ଏହି ମୂର୍ତ୍ତିର ଅନାବରଣ କରାଯିବ।
ସୂଚନା ଅନୁସାରେ, ମାଟିର ଏହି ମୂର୍ତ୍ତି ତିଆରି ପଛରେ ଏକ ରୋଚକ କାହାଣୀ ରହିଛି। ଜଣେ ମୂର୍ତ୍ତି କାରିଗରର ଜୀବନୀକୁ ନେଇ ଫିଲ୍ମ ‘ମାଟିର ବନ୍ଧନ’ ତିଆରି ହୋଇଥିଲା। ଚଳଚିତ୍ରର ମୁଖ୍ୟ ଚରିତ୍ରରେ ଅଭିନୟ କରିଥିଲେ ମିହିର ଦାସ। କଟକ କୁମ୍ଭାର ସାହିରେ ସେହି ଫିଲ୍ମର କିଛି ଦୃଶ୍ୟ ଶୁଟିଂ ମଧ୍ୟ ହୋଇଥିଲା। କୌଣସି କାରଣରୁ ଫିଲ୍ମଟି ଏଯାଏ ରିଲିଜ୍ ହୋଇପାରିନାହିଁ। ତେଣୁ କଟକ କୁମ୍ଭାର ସାହିର ଶିଳ୍ପୀମାନେ ମିହିର ଦାସଙ୍କୁ ଶ୍ରଦ୍ଧାଞ୍ଜଳି ଦେବାକୁ ଏହି ମାଟିର ମୂର୍ତ୍ତି ନିର୍ମାଣ କରିଛନ୍ତି। ସଂସ୍କୃତି ବିଭାଗ କିମ୍ବା କଳିଙ୍ଗ ଷ୍ଟୁଡିଓ ପରିସରରେ ମିହିର ଦାସଙ୍କ ଏହି ମୂର୍ତ୍ତି ରଖିବାକୁ ଶ୍ରୀତମ ଦାସ ପ୍ରସ୍ତାବ ଦେଇଛନ୍ତି।
