ତେହେରାନ,୧।୩: ପଶ୍ଚିମ ଏସିଆରେ ବଢୁଥିବା ଉତ୍ତେଜନା ମଧ୍ୟରେ ସାମୁଦ୍ରିକ ସୁରକ୍ଷାକୁ ନେଇ ପରିସ୍ଥିତି ଜଟିଳ ହେବାରେ ଲାଗିଛି। ରିପୋର୍ଟ ଅନୁଯାୟୀ, ରବିବାର ଦିନ ଇରାନ ପକ୍ଷରୁ ପାକିସ୍ତାନ ନେସନାଲ ସିପିଙ୍ଗ କର୍ପୋରେସନ୍ର ତିନୋଟି ଜାହାଜକୁ ହୋର୍ମୁଜ ଜଳସନ୍ଧି (Strait of Hormuz) ଆଡ଼କୁ ଯିବାରୁ ଅଟକାଇ ଦିଆଯାଇଛି।
ଏଆରୱାଇ (ARY) ନ୍ୟୁଜ୍ର ରିପୋର୍ଟ ଅନୁଯାୟୀ, ‘କରାଚୀ’, ‘ଲାହୋର’ ଏବଂ ‘ଖୈରପୁର’ ନାମକ ଏହି ତିନୋଟି ଜାହାଜ ତେଲ ପରିବହନ ପାଇଁ ଯାତ୍ରା କରୁଥିଲେ। ତେବେ ଆଞ୍ଚଳିକ ଉତ୍ତେଜନାକୁ ଦୃଷ୍ଟିରେ ରଖି ଇରାନ ସେମାନଙ୍କୁ ଆଗକୁ ବଢ଼ିବାକୁ ଅନୁମତି ଦେଇନାହିଁ।
ରିପୋର୍ଟ ଅନୁଯାୟୀ, ‘ଲାହୋର’ ଏବଂ ‘ଖୈରପୁର’କୁ ସଂଯୁକ୍ତ ଆରବ ଏମିରେଟ୍ସର ଫୁଜାଇରା ବନ୍ଦରରେ ରହିବାକୁ ନିର୍ଦ୍ଦେଶ ଦିଆଯାଇଥିବାବେଳେ ‘କରାଚୀ’କୁ ପାକିସ୍ତାନର ଗୱାଦର ବନ୍ଦରରେ ଲଙ୍ଗର ପକାଇବାକୁ କୁହାଯାଇଛି। ଏହି ଜାହାଜଗୁଡ଼ିକରେ ପାକିସ୍ତାନୀ କ୍ରୁ ସଦସ୍ୟ ସାମିଲ ଥିଲେ। ଏହି ଘଟଣାକ୍ରମ ମଧ୍ୟରେ ଇରାନର ଇସଲାମିକ ରିଭୋଲ୍ୟୁସନାରୀ ଗାର୍ଡ କୋର୍ପସ (IRGC) ଚେତାବନୀ ଜାରି କରି କହିଛି ଯେ ହୋର୍ମୁଜ ଜଳସନ୍ଧିକୁ ସମସ୍ତ ସାମୁଦ୍ରିକ ଚଳାଚଳ ବ୍ୟବସାୟିକ ଏବଂ ସାମରିକପାଇଁ ବନ୍ଦ କରିଦିଆଯାଇଛି।
ହୋର୍ମୁଜ ଜଳସନ୍ଧି ପାରସ୍ୟ ଉପସାଗର ଏବଂ ଓମାନ ଉପସାଗର ମଧ୍ୟରେ ଅବସ୍ଥିତ। ଏହା ଉପସାଗରୀୟ ଅଞ୍ଚଳରୁ ମୁକ୍ତ ସମୁଦ୍ରକୁ ଯିବାର ଏକମାତ୍ର ସାମୁଦ୍ରିକ ମାର୍ଗ। ପ୍ରାୟ ୧୬୭ କିଲୋମିଟର(୧୦୪ ମାଇଲ) ଲମ୍ବା ଏହି ଜଳପଥ ବିଶ୍ୱର ସବୁଠାରୁ ରଣନୈତିକ ସାମୁଦ୍ରିକ ‘ଚୋକ ପଏଣ୍ଟ’ ମଧ୍ୟରୁ ଅନ୍ୟତମ। ଏହାର ସର୍ବନିମ୍ନ ଚଉଡ଼ା ମାତ୍ର ୩୯ କିଲୋମିଟର(୨୪ ମାଇଲ)। ସାଉଦି ଆରବ, ଇରାନ, ଇରାକ ଏବଂ ସଂଯୁକ୍ତ ଆରବ ଏମିରେଟ୍ସ ଭଳି ପ୍ରମୁଖ ତେଲ ରପ୍ତାନିକାରୀ ଦେଶଗୁଡ଼ିକ ଏହି ମାର୍ଗ ଦେଇ ବିଶ୍ୱ ବଜାରକୁ ଅଶୋଧିତ ତେଲ ପଠାନ୍ତି।
ଏହି ଅଞ୍ଚଳରେ ଅସ୍ଥିରତାର ମୁଖ୍ୟ କାରଣ ହେଉଛି ସାମ୍ପ୍ରତିକ ଆମେରିକା-ଇସ୍ରାଏଲ ଆକ୍ରମଣ ଏବଂ ତା’ ପରେ ଇରାନର ପାଲଟା ଜବାବ। ଏହା ସାମୁଦ୍ରିକ ମାର୍ଗର ସୁରକ୍ଷାକୁ ନେଇ ଗମ୍ଭୀର ଚିନ୍ତା ବଢ଼ାଇ ଦେଇଛି। ଯଦି ହୋର୍ମୁଜ ଜଳସନ୍ଧି ଦୀର୍ଘ ସମୟ ଧରି ବନ୍ଦ ରହେ, ତେବେ ଏହାର ପ୍ରଭାବ ବିଶ୍ୱ ତେଲ ଯୋଗାଣ ଏବଂ ଆନ୍ତର୍ଜାତୀୟ ବଜାର ଉପରେ ପଡ଼ିପାରେ।
