ଖଇରା, ୧୯।୯(ଡି.ଏନ.ଏ.)-ବାଲେଶ୍ୱର ଜିଲା ଅଧୀନ ସିମୁଳିଆ ତହସିଲ କାର୍ଯ୍ୟାଳୟର ଜଣେ ଅଧିକାରୀ ସରକାରୀ ଗାଡ଼ିର ଅପବ୍ୟବହାର କରି ମନ୍ଦିର ଭ୍ରମଣ କରିଥିବା ନେଇ ଅଭିଯୋଗ ହୋଇଛି। ସରକାରୀ କାର୍ଯ୍ୟର ବାହାନା କରି ପରିବାର ସଦସ୍ୟଙ୍କ ସହ ଖଇରା ବ୍ଲକର ପ୍ରସିଦ୍ଧ ବକ୍ରେଶ୍ୱର ପୀଠରେ ପୂଜାର୍ଚ୍ଚନା କରିବା ଘଟଣାକୁ ନେଇ ସୋମବାର ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି। ତୁରନ୍ତ ଘଟଣାରେ ଉଚ୍ଚସ୍ତରୀୟ ତଦନ୍ତ କରାଯାଇ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଖଇରା ଓ ସିମୁଳିଆ ତହସିଲ ଅଧୀନସ୍ଥ ବିଭିନ୍ନ ସଙ୍ଗଠନ ଦାବି କରିଛନ୍ତି।
ଓଡ଼ିଶା ସରକାର ଶାସନରେ ସ୍ବଚ୍ଛତା ଆଣିବାକୁ ‘୫-ଟି ମୋ ସରକାର’ ଲାଗୁ କରିଛନ୍ତି ା ରାଜସ୍ବ ବିଭାଗ ଏହି ୫-ଟି ଅଧୀନରେ ଆସୁଥିବା ବେଳେ ପ୍ରତ୍ୟେକ କାର୍ଯ୍ୟାଳୟ ସମ୍ମୁଖରେ ଏଥିଲାଗି ବଡ଼ ବଡ଼ ଫଳକ ଲେଖାଯାଇଛି। ଯେଉଁଥିରେ ସାଧାରଣ ଲୋକଙ୍କ ଅର୍ଥରେ ପ୍ରଶାସନ ପରିଚାଳିତ ହେଉଛି। ଏଣୁ ସେମାନଙ୍କୁ ସୁଶାସନ ଦେବା ପ୍ରତି ଅଧିକାରୀଙ୍କ ଉତ୍ତରତ୍ତରଦାୟିତ୍ୱ ଭଳି ଅନେକ କିଛି ଲେଖାଯାଇଛି। ଏଭଳି ପରିସ୍ଥିତିରେ ଜଣେ ଅଧିକାରୀ ସରକାରୀ ଗାଡ଼ିରେ ସରକାରୀ ଧନ ଅପବ୍ୟୟ କରି ପରିବାରକୁ ସାଥିରେ ଆଣି ମନ୍ଦିର ବୁଲାଇବା ଏଭଳି ନିର୍ଦ୍ଦେଶକୁ ଉଲ୍ଲଂଘନ କରୁଥିବା କୁହାଯାଉଛି। ଏ ସମ୍ପର୍କରେ ଉକ୍ତ ଅଧିକାରୀ ସଫେଇ ଦେଇ ବକ୍ରେଶ୍ୱର ମନ୍ଦିର ନିକଟରେ ଥିବା ପୋଲ କାର୍ଯ୍ୟ ତଦାରଖ କରିବାକୁ ଯାଇଥିବା ବେଳେ ପାଖରେ ମନ୍ଦିର ଥିବାରୁ ବକ୍ରେଶ୍ୱରଙ୍କ ଦର୍ଶନ କରିଥିବା କହିଛନ୍ତି। ଏଭଳି ଅଭିଯୋଗ ତଥା ଭାଇରାଲ ଭିଡିଓ ସମ୍ପର୍କରେ ଗଣମାଧ୍ୟମ ପ୍ରତିନିଧିମାନେ ଜିଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେଙ୍କ ଦୃଷ୍ଟି ଆକର୍ଷଣ କରିବା ପରେ ଏହାର ତଦନ୍ତ କରାଯିବ ବୋଲି ଜିଲାପାଳ କହିଛନ୍ତି। ବକ୍ରେଶ୍ୱର ମନ୍ଦିର ପୂଜକ ଭୋଳାନାଥ ମିଶ୍ରଙ୍କୁ ପଚାରିବା ପରେ ଅଧିକାରୀଜଣକ ମାନସିକ ପୂଜା ପାଇଁ ପରିବାର ସହ ଆସିଥିଲେ ବୋଲି କହିଛନ୍ତି।
