ଦାରିଙ୍ଗବାଡି, ୧୫।୧୧(ଅରୁଣ ସାହୁ):ଓଡିଶାର କଶ୍ମୀର କୁହାଯାଉଥିବା ଦାରିଙ୍ଗବାଡିରେ ଅସହ୍ୟ ଶୀତ ଅନୁଭୂତ ହେଉଛି। ତାପମାତ୍ରା ୨ ଦିନ ସାମାନ୍ୟ ବୃଦ୍ଧି ପାଇଥିବାବେଳେ ପୁଣି ସୋମବାର ତାପମାତ୍ରା ତଳମୁହାଁ ହୋଇ ୭ ଡିଗ୍ରୀରେ ପହଞ୍ଚିଛି। ଦାରିଙ୍ଗବାଡିକୁ ଛାଡିଦେଲେ ଆଭ୍ୟନ୍ତରୀଣ ଅଞ୍ଚଳ ତଥା ସୋନପୁର, ଦନେକବାଡି, ସିର୍କାବର୍ଗ, ଝିଞ୍ଜିରୀଗୁଡା, କୁମ୍ଭାରୀଗାଁ, ଭ୍ରମରବାଡ଼ି, ସିଆଙ୍ଗବାଲି, ପର୍ତ୍ତମାହା ଆଦି ପଞ୍ଚାୟତର ଦୁର୍ଗମ ଅଞ୍ଚଳରେ ପ୍ରବଳ ଅସହ୍ୟ ଶୀତ ଅନୁଭୂତ ହେଉଥିବା କୁହାଯାଇଛି। ଫଳରେ ଏହି ସବୁ ଅଞ୍ଚଳରେ ଦାରିଙ୍ଗବାଡି ତାପମାତ୍ରାଠାରୁ ଆହୁରି କମ ରହିଥିବା ଆଶଙ୍କା ବୃଦ୍ଧି ପାଇଛି। ପାଣିରେ ହାତ ଦେବା ମୁସ୍କିଲ ହୋଇଛି। ପାଣି ଜାଡ଼ ପାଲଟିଛି। ବିଭିନ୍ନ ସ୍ଥାନରେ କାକର ବୃଦ୍ଧି ପାଇଛି। ବିଭିନ୍ନ ସ୍ଥାନରେ ଲୋକ ନିଆଁ ଲଗାଇ ନିଆଁର ସାହାରା ନେଉଛନ୍ତି। ଶ୍ରମିକ ଶ୍ରେଣୀର ଲୋକମାନେ ନିଜ କାମଧନ୍ଦା ପାଇଁ ୧୦ଟା ପରେ ହିଁ ଯାଇପାରୁଛନ୍ତି। ଜରୁରୀ କାର୍ଯ୍ୟ ନ ଥିଲେ ଲୋକ ଘରୁ ବାହାରକୁ ବାହାରିବା କଷ୍ଟ ହୋଇପଡିଛି। ସୂଚନାଯୋଗ୍ୟ ଯେ, ଶନିବାର ଓ ରବିବାର ତାପମାତ୍ରା ୮ ଡିଗ୍ରୀ ରହିଥିବାବେକେ ତା’ପୂର୍ବରୁ ଗୁରୁବାର ଓ ଶୁକ୍ରବାର ୭. ୫ ଡିଗ୍ରୀ ତାପମାତ୍ରା ରହିଥିବା ଜଣାପଡିଛି।
Dharitri – Odisha’s No.1 Odia Daily
