ନୂଆପଡ଼ା,୨୭ା୮ (ମକାରୁ ବେମାଲ): ନୂଆପଡ଼ା ଜିଲା କୋମନା ତହସିଲ ଅନ୍ତର୍ଗତ ଚାନ୍ଦୋପଲା ଗଁାରେ ଜମି ବିକ୍ରିରେ ଜାଲିଆତି କରିବା ଅଭିଯୋଗରେ ମଙ୍ଗଳବାର ତହସିଲଦାର ସର୍ବେଶ୍ୱର ଜାଲ ଓ ଅତିରିକ୍ତ ରାଜସ୍ବ ନିରୀକ୍ଷକ (ଏଆର୍ଆଇ) ତଥା ଡିଲିଂ କ୍ଲର୍କ ରାମନାଥ ମିଶ୍ର କାର୍ଯ୍ୟରୁ ନିଲମ୍ବିତ ହୋଇଛନ୍ତି। ଚାନ୍ଦୋପଲା ଗଁାର ଜମି ମାଲିକ ସତ୍ୟ ନାରାୟଣ ପ୍ରଧାନୀ ଓ ତାଙ୍କ ଭଉଣୀ କୁମୁଦିନୀ ପ୍ରଧାନୀଙ୍କ ଅଜାଣତରେ ଜମି ଜାଲିଆତି ହୋଇଥିଲା। କୋମନା ସବରେଜିଷ୍ଟ୍ରି କାର୍ଯ୍ୟାଳୟରେ ନକଲି ଜମି ମାଲିକଙ୍କୁ ଛିଡା କରି ୪ ଏକର ୪୦ ଡେସିମିଲ ଜମି ବିକ୍ରୟ ହୋଇଥିଲା। ଜମି ମାଲିକ ଧାନ ବିକ୍ରି ପାଇଁ ନାମ ପଞ୍ଜୀକରଣ କରିବାକୁ ଯାଇଥିବା ସମୟରେ ତାଙ୍କ ନାମରେ ଜମି ପଟ୍ଟା କମ୍ପ୍ୟୁଟରରେ ନ ଦେଖାଇବାରୁ ସନ୍ଦେହ କରି କୋମନା ତହସିଲରେ ଅଭିଯୋଗ କରିଥିଲେ। ଅଭିଯୋଗ ଆଧାରରେ ଅତିରିକ୍ତ ଜିଲାପାଳ ସୁବାସ ଚନ୍ଦ୍ର ରଏତ ଏହାର ତଦନ୍ତ ଆରମ୍ଭ କରିଥିଲେ। ରଏତ ତଦନ୍ତ ରିପୋର୍ଟ ଦାଖଲ କରିବା ପରେ ଜିଲା ପ୍ରଶାସନ ପକ୍ଷରୁ ତହସିଲଦାର ଜାଲଙ୍କୁ କାର୍ଯ୍ୟରୁ ଅପସାରଣ କରାଯାଇଥିଲା। ସେହିପରି କୋମନା ସବ୍ରେଜିଷ୍ଟ୍ରାର ଅଫିସର ଡାଟା ଏଣ୍ଟ୍ରି ଅପରେଟର ଶନିଶ୍ଚର ବେହେରାଙ୍କୁ ବୋଡେନ ସବ୍ରେଜିଷ୍ଟ୍ରାର ଅଫିସ ଓ ଡିଲିଂ କ୍ଲର୍କ ମିଶ୍ରଙ୍କୁ ଅନ୍ୟତ୍ର ବଦଳି କରାଯାଇଥିଲା। ହେଲେ ଜମି ଜାଲିଆତି ମାମଲା ଗମ୍ଭୀର ହେବାରୁ ଜିଲାପାଳ ମଧୁସୂଦନ ଦାସ ପଦକ୍ଷେପ ନେଇଛନ୍ତି। ତାଙ୍କ ସୁପାରିଶ କ୍ରମେ ଓଡିଶା ସରକାର ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଚିଠି ସଂଖ୍ୟା-୩୬୦୫୩ରେ ମଙ୍ଗଳବାର ତହସିଲଦାର ଜାଲଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଛି। ଏହି ଆଦେଶ ବଳବତ୍ତର ରହିଥିବା ପର୍ଯ୍ୟନ୍ତ ସେ ଉତ୍ତରାଞ୍ଚଳ ରାଜସ୍ବ କମିଶନରଙ୍କ କାର୍ଯ୍ୟାଳୟ ସମ୍ବଲପୁରରେ ନିୟୋଜିତ ରହିବେ। କମିଶନରଙ୍କ ଆଦେଶ ବିନା କାର୍ଯ୍ୟାଳୟ ଛାଡି ଅନ୍ୟ କୌଣସି ସ୍ଥାନକୁ ଯାଇପାରିବେ ନାହିଁ ବୋଲି ଚିଠିରେ ଉଲ୍ଲେଖ ରହିଛି ା ସେହିପରି ଜିଲାପାଳଙ୍କ ଚିଠି ସଂଖ୍ୟା-୧୧୦୪୫ରେ ଏଆର୍ଆଇ ମିଶ୍ରଙ୍କୁ କାର୍ଯ୍ୟରୁ ନିଲମ୍ବିତ କରାଯାଇ ବୋଡେନ ତହସିଲ କାର୍ଯ୍ୟାଳୟରେ ଅବସ୍ଥାପିତ କରାଯାଇଛି ା ଅଧିକାରୀଙ୍କ ବିନା ଅନୁମତିରେ ସେ କାର୍ଯ୍ୟାଳୟ ଛାଡି ବାହାରକୁ ଯାଇପାରିବେ ନାହିଁ ବୋଲି ଜିଲାପାଳ ନିର୍ଦ୍ଦେଶ ଦେଇଛନ୍ତି ା
