ପଟ୍ଟାଙ୍ଗି,୨।୫(ଶରତ କୁମାର ଧଳ): OSRTC ବିଭାଗର ଜମିକୁ ଦୀର୍ଘ ବର୍ଷ ଧରି ଜବର ଦଖଲ କରି ରହିଥିବା ଲୋକଙ୍କ ତହସିଲ କାର୍ଯ୍ୟାଳୟ ପକ୍ଷରୁ ଆରମ୍ଭ ହୋଇଛି ଉଚ୍ଛେଦ। ଏହି ସମୟରେ ଉକ୍ତ ବିଭାଗର ଜମିକୁ ଜବର ଦଖଲ କରି ରହିଥିବା ଲୋକଙ୍କ ମଧ୍ୟରେ ଚିନ୍ତା ବଢାଇ ଦେଇଛି।
ସୂଚନା ଅନୁଯାୟୀ, ପଟ୍ଟାଙ୍ଗି ବ୍ଲକ ସଦର ମହକୁମା ତଥା ତହସିଲ କାର୍ଯ୍ୟାଳୟ ତଥା ପଟ୍ଟାଙ୍ଗି ମୌଜାର ପ୍ଲଟ ନଂ ୫୩୮ ଏବଂ ଖାତା ନଂ ୨୨୩/୨ ରେ ରାଜ୍ୟ ପରିବହନ ବିଭାଗର ରହିଥିବା ୪୭ ଡିସିମିଲ ଜମିକୁ କିଛି ଲୋକ ଅକ୍ତିଆର କରି ଦୀର୍ଘ ବର୍ଷ ହେଲା ବସବାସ କରି ଜବରଦଖଲ କରିଥିଲେ। ଏହିପରି ଉକ୍ତ ବିଭାଗର ଜମିରେ ପଟ୍ଟାଙ୍ଗି ପଞ୍ଚାୟତ କାର୍ଯ୍ୟାଳୟ ପକ୍ଷରୁ ୧୬ଟି ଷ୍ଟଲ ନିର୍ମାଣ କରି ବିଭିନ୍ନ ବ୍ୟବସାୟୀମାନଙ୍କୁ ଭଡ଼ା ସୂତ୍ରରେ ଦେଇଥିଲା। ଯାହାକୁ ନେଇ ରାଜ୍ୟ ପରିବହନ ବିଭାଗ ପକ୍ଷରୁ ଜମି ଖାଲି କରିବା ପାଇଁ ତହସିଲଦାରଙ୍କ ଦ୍ୱାରସ୍ଥ ହୋଇଥିଲା। ଏହାପରେ ତହସିଲ କାର୍ଯ୍ୟାଳୟ ପକ୍ଷରୁ ମପାଚୁପା ଆରମ୍ଭ କରି ଜବରଦଖଲକାରୀଙ୍କୁ ଉଚ୍ଛେଦ କରିବା ପାଇଁ ଆରମ୍ଭ ହୋଇଥିଲା ପ୍ରକ୍ରିୟା। ଯେଉଁଥିପାଇଁ କି କିଛି ଜବରଦଖଲ କାରି ଉଚ୍ଚ ନ୍ୟାୟାଳୟର ଦ୍ୱାରସ୍ଥ ହୋଇ ଷ୍ଟେ କରି ଦିନ ଗଡାଇ ଚାଲିଥିଲେ।
ବର୍ତ୍ତମାନ ଷ୍ଟେ ଅବଧି ସରିବା ପରେ ତହସିଲ କାର୍ଯ୍ୟାଳୟ ପକ୍ଷରୁ ସମସ୍ତ ଜବର ଦଖଲକାରୀଙ୍କୁ ବ୍ୟକ୍ତିଗତ ଭାବେ ନୋଟିସ କରି ଜମି ଛାଡିବା ପାଇଁ ଅବଗତ କରାଇଥିଲା। ଏହା ସତ୍ତ୍ୱେ ମଧ୍ୟ ଜବରଦଖଲ କାରି ଜମି ଛାଡ଼ି ନ ଥିଲେ। ଯେଉଁଥିପାଇଁ ତହସିଲ କାର୍ଯ୍ୟାଳୟ ପକ୍ଷରୁ ରାଜ୍ୟ ପରିବହନ ବିଭାଗଙ୍କ ଜିଲା ଅଧିକାରୀଙ୍କଠାରୁ ଆରମ୍ଭ କରି କର୍ମଚାରୀଙ୍କ ଉପସ୍ଥିତିରେ ପୋଲିସ ଫୋର୍ସ ଲଗାଇ ସମସ୍ତ ଷ୍ଟଲ ଏବଂ ଘର ଭାଙ୍ଗିବା କାର୍ଯ୍ୟକ୍ରମ ଆରମ୍ଭ କରିଛି। ସେପଟେ ଉକ୍ତ ଜବରଦଖଲକାରୀଙ୍କ ପାଇଁ ରାଜ୍ୟ ପରିବହନ ବିଭାଗ ପକ୍ଷରୁ ହେବାକୁ ଥିବା ନୂତନ ବସଷ୍ଟାଣ୍ଡ ନିର୍ମାଣ କରିବାରେ ବିଳମ୍ବ ହୋଇ ଚାଲିଥିଲା। ଉକ୍ତ ଜବରଦଖଲ ଉଚ୍ଛେଦ ସମୟରେ ସ୍ଥାନୀୟ ତହସିଲଦାର ଦେବେନ୍ଦ୍ର ବାହାଦୂର ସିଂ ଧାରୁଆ, ରାଜସ୍ବ ନିରୀକ୍ଷକ ତ୍ରିନାଥ ଶିଶା ପ୍ରମୁଖଙ୍କ ସହ ଜିଲା ରାଜ୍ୟ ପରିବହନ ବିଭାଗ ଅଧିକାରୀ ଆରୁଷୀ ସାହୁ ପ୍ରମୁଖ ଉପସ୍ଥିତ ରହିଥିଲେ। ଅନ୍ୟପକ୍ଷରେ ସୁରକ୍ଷା ଦୃଷ୍ଟିରୁ ପୋଲିସ ପ୍ରଶାସନ ଉପସ୍ଥିତ ରହିଥିଲେ ।
Dharitri – Odisha’s No.1 Odia Daily