ନୂଆଦିଲ୍ଲୀ,୪ ।୧: କରୋନା ମହାମାରୀ ସହ ଲଢିବା ପାଇଁ ୧୫ରୁ ୧୮ ବର୍ଷର ପିଲାଙ୍କୁ ସୋମବାରଠାରୁ ଟିକାକରଣ କାର୍ଯ୍ୟକ୍ରମ ଆରମ୍ଭ କରାଯାଇଛି । ମଙ୍ଗଳବାର ଏହାର ଦ୍ୱିତୀୟ ଦିନ । ସୋମବାର ଅର୍ଥାତ୍ ପ୍ରଥମଦିନ ପ୍ରାୟ ୪୦ ଲକ୍ଷ ପିଲା୍କୁ କରୋନା ଟିକା ଦିଆଯାଇଛି । ଆଉ ଏବେସୁଦ୍ଧା ୫୪ ଲକ୍ଷ ପିଲା ଟିକା ନେବାଲାଗି ରେଜିଷ୍ଟ୍ରେଶନ କରିଥିବା ସୂଚନା ରହିଛି । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବିୟା ଟୁଇଟ୍ କରି କହିଛନ୍ତି ସୋମବାର ରାତି ୮ଟା ସୁଦ୍ଧା ଯେଉଁ ଡାଟା ମିଳିଛି ସେହି ଅନୁଯାୟୀ ପ୍ରଥମ ଦିନ ୪୦ ଲକ୍ଷ ପିଲା କରୋନା ଟିକା ନେଇଛନ୍ତି । ତେବେ ପ୍ରଥମ ଦିନର ସଂଖ୍ୟାକୁ ଦେଖି ପ୍ରଧାନମନ୍ତ୍ରୀ ମୋଦି ଖୁସି ହେବା ସହ ପିଲାଙ୍କୁ ଉତ୍ସାହିତ କରିଛନ୍ତି । ମୋଦି ଟୁଇଟ୍ କରି କହିଛନ୍ତି କୋଭିଡ-୧୯ଠାରୁ ଯୁବବର୍ଗଙ୍କୁ ସୁରକ୍ଷା ଦେବା ଲାଗି ଦେଶ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି । ୧୫-୧୮ ବର୍ଷ ବୟସର ସମସ୍ତ ଯୁବ ବନ୍ଧୁଙ୍କୁ ମୋର ଶୁଭେଚ୍ଛା । ସେମାନଙ୍କ ପରିବାର ବର୍ଗଙ୍କୁ ବି ଶୁଭେଚ୍ଛା । ମୁଁ ସମସ୍ତ ଯୁବବର୍ଗଙ୍କୁ ଅନୁରୋଧ କରୁଛି ଆଗାମୀ ଦିନରେ ସେମାନେ ବି ଟିକା ନିଅନ୍ତୁ । ୧୫-୧୮ ବର୍ଷ ବୟସର ପିଲାଙ୍କ ଟିକାକରଣକୁ ଦେଖି ଅନୁମାନ କରାଯାଉଛିକି ଖୁବଶୀଘ୍ର ଦେଶର ସମସ୍ତ ୧୫ରୁ ୧୮ ବର୍ଷ ବୟସର ପିଲା ଟିକା ନେଇଯାଇଥିବେ । ସେପଟେ ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ଦାବି କରିଛନ୍ତି କି ସେ ଖୁବଶୀଘ୍ର ୧୦୦ ପ୍ରତିଶତ ପିଲାଙ୍କ ଟିକାକରଣ କାର୍ଯ୍ୟକ୍ରମ ଶେଷ କରିବେ ।
