ନୂଆଦିଲ୍ଲୀ,୧୪।୭: ଆଜିଠାରୁ ଭାରତ ଏବଂ ଇଂଲଣ୍ଡ ମଧ୍ୟରେ ଦିନିକିଆ ସିରିଜ ଆରମ୍ଭ ହେବ। ଟି-୨୦ ସିରିଜ୍ ହାରିବା ପରେ ଦିନିକିଆ ସିରିଜ୍ ହାତେଇବାକୁ ପଡ଼ିଆକୁ ଓହ୍ଲାଇବ ଭାରତ। ଏହି ସିରିଜ୍ରେ ବିରାଟ କୋହଲି ଏବଂ ରୋହିତ ଶର୍ମାଙ୍କ ଭିଳି ଭେଟରାନ ଖେଳିବେ। ଏହାପୂର୍ବରୁ ରୋହିତ ଶର୍ମାଙ୍କୁ ନେଇ ଏକ ରୋଚକ ଘଟଣା ପୁଣି ସୋସିଆଲ ମଡିଆରେ ଭାଇରାଲ ହେଉଛି। ଇଂଲଣ୍ଡରେ ଅନୁଷ୍ଠିତ ୨୦୧୯ ଦିନିକିଆ ବିଶ୍ୱକପରେ ରୋହିତ ବ୍ୟାଟିଂ ଦକ୍ଷତା ସହିତ ଟୁର୍ନାମେଣ୍ଟରେ ପ୍ରାଧାନ୍ୟ ବିସ୍ତାର କରିଥିଲେ। କିନ୍ତୁ ତାଙ୍କ ଦଳକୁ ଟ୍ରଫି ପର୍ଯ୍ୟନ୍ତ ନେଇପାରି ନ ଥିଲେ। ସେମିଫାଇନାଲ ପରାଜୟ ପରେ ରୋହିତଙ୍କ ଆଖିରେ ଲୁହ ଥିଲା।
୨୦୧୯ ଦିନିକିଆ ବିଶ୍ୱକପ ସେମିଫାଇନାଲରେ ଭାରତ ନ୍ୟୁଜିଲାଣ୍ଡ ହାତରୁ ପରାଜୟ ବରଣ କରିଥିଲା। ମାଞ୍ଚେଷ୍ଟରରେ ଅନୁଷ୍ଠିତ ମ୍ୟାଚରେ ନ୍ୟୁଜିଲାଣ୍ଡ ଭାରତକୁ ୧୮ ରନରେ ପରାସ୍ତ କରି ଟୁର୍ନାମେଣ୍ଟରୁ ବାହାର କରିଦେଇଥିଲା। ଏହା ଟିମ ଇଣ୍ଡିଆର ପ୍ରତ୍ୟେକ ଖେଳାଳିଙ୍କ ପାଇଁ ଏକ ହୃଦୟ ବିଦାରକ ମୁହୂର୍ତ୍ତ ଥିଲା। ରୋହିତ ଶର୍ମାଙ୍କ ଦୁଃଖ ଡ୍ରେସିଂ ରୁମରେ ଲୁହ ଭାବରେ ପ୍ରକାଶ ପାଇଥିଲା। କାରଣ ସମଗ୍ର ଟୁର୍ନାମେଣ୍ଟରେ ତାଙ୍କ ନିଜର ଚମତ୍କାର ପ୍ରଦର୍ଶନ ସତ୍ତ୍ୱେ ଦଳକୁ ସେହି ପରିଣାମର ସମ୍ମୁଖୀନ ହେବାକୁ ପଡିଥିଲା।
ଟିମ ଇଣ୍ଡିଆର ଯାତ୍ରା ସେମିଫାଇନାଲରେ ଶେଷ ହେବା ସତ୍ତ୍ୱେ, ରୋହିତ ଶର୍ମା ୨୦୧୯ ଦିନିକିଆ ବିଶ୍ୱକପର ସର୍ବାଧିକ ରନ ସ୍କୋରର ଥିଲେ। ରନ ପାହାଡ଼ ସଂଗ୍ରହ କରିବା ବ୍ୟତୀତ, ସେ ଟୁର୍ନାମେଣ୍ଟରେ ସର୍ବାଧିକ ଶତକ ମଧ୍ୟ କରିଥିଲେ। ୯ଟି ମ୍ୟାଚ୍ରେ ୯ଟି ଇନିଂସରେ ସେ ୬୪୮ ରନ କରିଥିଲେ। ଏହି ରନ ମଧ୍ୟରେ ସେ ପାଞ୍ଚଟି ଶତକ ମାରିଥିଲେ ଏବଂ ମୋଟ ଛଅଟି ଇନିଂସରେ ୫୦+ ରନ କରିଥିଲେ।
ସେବେଠାରୁ ୭ ବର୍ଷ ବିତିଗଲାଣି ଏବଂ ରୋହିତ ଶର୍ମା ଏବେ ୨୦୨୭ ଦିନିକିଆ ବିଶ୍ୱକପ ଉପରେ ନଜର ରଖିଛନ୍ତି। ଏହି ପରିପ୍ରେକ୍ଷୀରେ ଇଂଲଣ୍ଡ ବିପକ୍ଷ ଦିନିକିଆ ସିରିଜ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ରୋହିତ ଶର୍ମା ଇଂଲଣ୍ଡରେ ଭାରତର ସବୁଠାରୁ ସଫଳ ବ୍ୟାଟ୍ସମ୍ୟାନ ମଧ୍ୟରୁ ଜଣେ, ଏବଂ ଟିମ ଇଣ୍ଡିଆ ଚଳିତ ଦିନିକିଆ ସିରିଜ୍ରେ ମଧ୍ୟ ତାଙ୍କଠାରୁ ଉଚ୍ଚ ଆଶା ରଖିବ।
Dharitri – Odisha’s No.1 Odia Daily
