ସିଡ୍ନୀ,୧୬।୧୧(ପି.ଟି.): ରବିବାର ଭ୍ରମଣକାରୀ ଭାରତୀୟ ଦଳର ସଦସ୍ୟମାନେ ପୂର୍ଣ୍ଣ ରୂପେ ପ୍ରଥମ ନେଟ ସେସନରେ ଅଂଶଗ୍ରହଣ କରି ବେଶ୍ ଝାଳ ବୁହାଇଛନ୍ତି। ଛୋଟ ଓ ଲମ୍ବା ଫର୍ମାଟ୍ରେ ଅର୍ଥାତ ନାଲି ଓ ଧଳା ବଲ୍ରେ ଖେଳାଳିମାନେ ଅଭ୍ୟାସ କରିଥିଲେ। ତେବେ ଶନିବାର ଭାରତୀୟ ଦଳର ଖେଳାଳିମାନେ ପ୍ରଥମ ଟ୍ରେନିଂ ସେସନରେ ଅଂଶଗ୍ରହଣ କରି ଜିମ୍ ଓ ରନିଂ ଉପରେ ଅଧିକ ଧ୍ୟାନ ଦେଇଥିଲେ। ପ୍ରାକ୍ସିସ୍ ସେସନର ଭିଡିଓଗୁଡିକ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତା’ର ସୋସିଆଲ ମିଡିଆ ଆକାଉଣ୍ଟରେ ଅପ୍ଲୋଡ କରିଛି। ଟେଷ୍ଟ ଦଳର ଖେଳାଳିମାନେ ଦଳ ସହ ଯାଇଥିବାରୁ ବୋର୍ଡ ଉଭୟ ସୀମିତ ଓଭର ଓ ଟେଷ୍ଟ ଫର୍ମାଟ ପାଇଁ ଟ୍ରେନିଂ ସେସନର ଉପରେ ଗୁରୁତ୍ୱ ଦେଇଛି। ସ୍ପେଶାଲିଷ୍ଟ ସ୍ଲିପ୍ ଫିଲ୍ଡର ବିବେଚିତ ହେଉଥିବା ଅଧିନାୟକ ବିରାଟ କୋହଲି ଓ ଚେତେଶ୍ୱର ପୂଜାରା ନାଲି ବଲ୍ ଦୀର୍ଘ ସମୟଧରି କ୍ୟାଚ୍ ନେବାର ଅଭ୍ୟାସ କରିଥିଲେ। ଅପରପକ୍ଷରେ ଭାରତ ନୂଆ ପେସ୍ ସେନ୍ସେସନ ଟି. ନଟରାଜନ ନେଟ୍ସରେ କୁକାବୁରା ବଲ୍ରେ ଅଭ୍ୟାସ କରିଥିଲେ। ସେ ପ୍ରାୟ ସମସ୍ତ ଟପ୍- ଅର୍ଡର ହ୍ବାଇଟ୍ ବଲ୍ ବ୍ୟାଟ୍ସମ୍ୟାନଙ୍କୁ ବୋଲିଂ କରିଥିଲେ। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ନଟରାଜନ ଏଥର ଦୃଷ୍ଟାନ୍ତମୂଳକ ବୋଲିଂ କରିଥିଲେ। ପ୍ରଥମଥର ସେ ଭାରତୀୟ ଦଳରେ ସାମିଲ ହୋଇଛନ୍ତି।
ପୂଜାରା, ଅଜିଙ୍କ୍ୟ ରାହାନେ, ପୃଥ୍ବୀ ଶ, ହନୁମା ବିହାରୀ, ରିଷଭ ପନ୍ତ, ରବିଚନ୍ଦ୍ରନ ଅଶ୍ୱିନ ନାଲି ବଲ୍ରେ ଅଭ୍ୟାସ କରିଥିଲେ। ତେବେ ଉଭୟ ଟେଷ୍ଟ ଓ ସୀମିତ ଓଭର ଫର୍ମାଟରେ ସ୍ଥାନ ପାଇଥିବା ଖେଳାଳିମାନେ ଟ୍ରେନିଂ କାର୍ଯ୍ୟସୂଚୀ ଅନୁଯାୟୀ ଉଭୟ ବଲରେ ମିଶାମିଶି ଭାବେ ଅଭ୍ୟାସ କରିଥିଲେ। ଗତ ମାର୍ଚ୍ଚ ପ୍ରଥମ ସପ୍ତାହରୁ ଖେଳାଳିମାନେ ରେଡ୍ ବଲ୍ କ୍ରିକେଟ ଖେଳିନାହାନ୍ତି। ତେଣୁ ଖେଳାଳିମାନେ ଉଭୟ ଫର୍ମାଟ ପାଇଁ ଅଭ୍ୟାସ କରିଥିଲେ। ସୀମିତ ଓଭର ସିରିଜ ପରେ ଦୁଇଟି ପ୍ରଥମ ଶ୍ରେଣୀ ମ୍ୟାଚ୍ ଓ ଗୋଟିଏ ପିଙ୍କ୍ ପ୍ରାକ୍ଟିସ ଗେମ ମାତ୍ର କିଛିଦିନ ମଧ୍ୟରେ ଖେଳାଯିବ। ତେଣୁ ଟେଷ୍ଟ ସ୍ପେଶାଲିଷ୍ଟମାନେ ନାଲି ବଲ୍ରେ ଅଧିକରୁ ଅଧିକ ଅଭ୍ୟାସ କରିବା ଉପରେ ଗୁରୁତ୍ୱ ଦିଆଯାଇଛି। ନେଟ୍ସରେ ଖେଳାଳିମାନେ ଜବରଦସ୍ତ ଅଭ୍ୟାସ କରିଥିଲେ।
