ନୂଆଦିଲ୍ଲୀ,୧୧ା୯: ଆଫଗାନିସ୍ତାନ ବିପକ୍ଷ T୨୦ ସିରିଜ୍ ପୂର୍ବରୁ ଭାରତୀୟ କ୍ରିକେଟ୍ ଟିମ୍ର ସପୋର୍ଟ ଷ୍ଟାଫ୍ରେ ବଡ଼ ପରିବର୍ତ୍ତନ ହେବାକୁ ଯାଉଛି । ଟିମ୍ ଇଣ୍ଡିଆର ଫିଜିଓ କମଲେଶ ଜୈନ ନିଜ ପଦରୁ ଇସ୍ତଫା ଦେଇଛନ୍ତି । ତେବେ BCCI ଏପର୍ଯ୍ୟନ୍ତ ତାଙ୍କ ଇସ୍ତଫାକୁ ଔପଚାରିକ ଭାବେ ଗ୍ରହଣ କରିନାହିଁ । କ୍ରିକ୍ବଜ୍ ଅନୁସାରେ, ଜୈନ ବର୍ତ୍ତମାନ ୩ ମାସର ନୋଟିସ୍ ପିରିୟଡ୍ରେ ଅଛନ୍ତି ।
କମଲେଶ ଜୈନ ବର୍ତ୍ତମାନ ଦିଲ୍ଲୀରେ ଟିମ୍ ଇଣ୍ଡିଆ ସହ ଅଛନ୍ତି । ଭାରତ ଓ ଆଫଗାନିସ୍ତାନ ମଧ୍ୟରେ ଆସନ୍ତା ସେପ୍ଟେମ୍ବର ୧୩, ୧୫ ଓ ୧୭ ତାରିଖରେ ୩ଟି T20I ମ୍ୟାଚ୍ ଖେଳାଯିବାକୁ ଥିବାବେଳେ, ତିନୋଟି ମ୍ୟାଚ୍ର ସ୍ଥାନ ଦିଲ୍ଲୀ ରହିଛି । କମଲେଶ ଜୈନଙ୍କ ଇସ୍ତଫା ଗତ କିଛି ଦିନ ମଧ୍ୟରେ ଟିମ୍ ଇଣ୍ଡିଆର ସପୋର୍ଟ ଷ୍ଟାଫ୍ରେ ତୃତୀୟ ବଡ଼ ପରିବର୍ତ୍ତନ ବୋଲି ଦେଖାଯାଉଛି। ତାଙ୍କ ପୂର୍ବରୁ ସହକାରୀ କୋଚ୍ ରାୟନ୍ ଟେନ୍ ଡୋଇଶେ ଏବଂ ଫିଲ୍ଡିଂ କୋଚ୍ ଟି. ଦିଲୀପ ମଧ୍ୟ ଟିମ୍ ଇଣ୍ଡିଆର ସପୋର୍ଟ ଷ୍ଟାଫ୍ ଛାଡ଼ିଛନ୍ତି । ରାୟନ୍ ଟେନ୍ ଡୋଇଶେ ପରେ କୋଲକାତା ନାଇଟ୍ ରାଇଡର୍ସ ସହ ଯୋଡ଼ି ହୋଇଥିବା ରିପୋର୍ଟ ରହିଛି।
ରିପୋର୍ଟ ଅନୁସାରେ, ଅଧିକ ଯାତ୍ରା ଏବଂ ପାରିବାରିକ ଦାୟିତ୍ୱ ଯୋଗୁଁ କମଲେଶ ଜୈନ ଟିମ୍ ଇଣ୍ଡିଆର ଫିଜିଓ ପଦ ଛାଡ଼ିବାକୁ ନିଷ୍ପତ୍ତି ନେଇଥିବା କୁହାଯାଉଛି । ତେବେ ଏନେଇ BCCI ପକ୍ଷରୁ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଆସିନାହିଁ । କମଲେଶ ଜୈନ ଜୁନ୍ ୨୦୨୨ରେ ଟିମ୍ ଇଣ୍ଡିଆର ଫିଜିଓ ଭାବେ ସାମିଲ ହୋଇଥିଲେ। ସେ ସମୟରେ ରାହୁଲ ଦ୍ରାବିଡ୍ ଭାରତୀୟ ଦଳର ମୁଖ୍ୟ କୋଚ୍ ଥିଲେ। ଏହା ପୂର୍ବରୁ ଜୈନ ପ୍ରାୟ ୧୦ ବର୍ଷ କୋଲକାତା ନାଇଟ୍ ରାଇଡର୍ସର ସପୋର୍ଟ ଷ୍ଟାଫ୍ର ଅଂଶ ଥିଲେ ଏବଂ ୨୦୨୦ରେ ଦଳର ହେଡ୍ ଫିଜିଓ ହୋଇଥିଲେ।
ଟିମ୍ ଇଣ୍ଡିଆ ସହ ପ୍ରାୟ ସାଢ଼େ ୪ ବର୍ଷ କାମ କରିବା ପରେ ଏବେ ସେ ବିଦାୟ ନେବାକୁ ଯାଉଛନ୍ତି। ତାଙ୍କ ନୋଟିସ୍ ପିରିୟଡ୍ ଶେଷ ହେବା ପରେ ହିଁ ଟିମ୍ ଇଣ୍ଡିଆରୁ ତାଙ୍କ ଔପଚାରିକ ବିଦାୟ ହେବ ବୋଲି ଜଣାପଡ଼ିଛି। ଆଫଗାନିସ୍ତାନ ବିପକ୍ଷ ଆଗାମୀ T20 ସିରିଜ୍ ପୂର୍ବରୁ ସପୋର୍ଟ ଷ୍ଟାଫ୍ରେ ଲଗାତାର ଏହି ପରିବର୍ତ୍ତନ ଟିମ୍ ଇଣ୍ଡିଆକୁ ନେଇ କ୍ରିକେଟ୍ ମହଲରେ ଚର୍ଚ୍ଚା ବଢ଼ାଇଛି।
