କୁଜଙ୍ଗ,୧୪।୭ (ମନୋଜ ପ୍ରଧାନ): ସ୍ବାଧୀନତା ପୂର୍ବରୁ ଅର୍ଥାତ ୧୯୦୧ରେ କୁଜଙ୍ଗରେ ବନବିହାରୀ ଉଚ୍ଚ ବିଦ୍ୟାଳୟ ପ୍ରତିଷ୍ଠା କରାଯାଇଥିଲା। ଏହି ୧୨୨ବର୍ଷର ହାଇସ୍କୁଲକୁ ୫-ଟି ଯୋଜନାରେ ରୂପାନ୍ତରଣ କରାଯାଇଥିଲେ ମଧ୍ୟ ବିଭିନ୍ନ ଅବ୍ୟବସ୍ଥା ମଧ୍ୟରେ ଗତିକରୁଛି। ଏଠାରେ ଷଷ୍ଠ ଶ୍ରେଣୀରୁ ଦଶମ ଶ୍ରେଣୀ ପର୍ଯ୍ୟନ୍ତ ମୋଟ ୮୦୮ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ସରକାରଙ୍କ ନିୟମାନୁସାରେ ପ୍ରତି ୩୧ ଜଣ ଛାତ୍ରୀଛାତ୍ରଙ୍କ ପାଇଁ ଜଣେ ଶିକ୍ଷକ ଆବଶ୍ୟକ। ଏହି ନିୟମ ଅନୁସାରେ ବିଦ୍ୟାଳୟରେ ଅତି କମ୍ରେ ୨୭ଜଣ ଶିକ୍ଷକଙ୍କ ଆବଶ୍ୟକ ହେଉଥିବାବେଳେ ଏଠାରେ ପ୍ରଧାନ ଶିକ୍ଷକଙ୍କୁ ମିଶାଇ ମୋଟ ୧୨ଜଣ ଶିକ୍ଷୟିତ୍ରୀ ଶିକ୍ଷକ ଶିକ୍ଷାଦାନ କରୁଛନ୍ତି। ଫଳରେ ଶିକ୍ଷକ ଅଭାବରୁ ଛାତ୍ରୀଛାତ୍ରଙ୍କ ଶିକ୍ଷାଦାନ ବାଧାପ୍ରାପ୍ତ ହୋଇଛି।
ଅତୀତରେ ବିଦ୍ୟାଳୟର ବହୁ ଛାତ୍ରୀଛାତ୍ର ଖୋ ଖୋ ସମେତ ବିଭିନ୍ନ ଜାତୀୟସ୍ତରୀୟ କ୍ରୀଡ଼ା ପ୍ରତିଯୋଗିତାରେ ଭାଗନେଇ ବିଦ୍ୟାଳୟ ପାଇଁ ସୁନାମ ଆଣିଥିଲେ। ଏବେ ଦୀର୍ଘ ୪ ବର୍ଷହେବ ଏଠାରେ କ୍ରୀଡ଼ା ଶିକ୍ଷକ ନାହାନ୍ତି। ଅନ୍ୟପଟେ କଳା ଓ କାରିଗରୀ ଶିକ୍ଷକ ପଦବୀ ମଧ୍ୟ ଖାଲି ପଡ଼ିଛି। ବିଦ୍ୟାଳୟ ସୂତ୍ରରୁ ଜଣାପଡିଛି ଯେ, ଉକ୍ତ ପଦବୀ ଦ୍ୱୟ ଉଚ୍ଛେଦ ହୋଇଯାଇଛି। ବର୍ତ୍ତମାନ ବିଦ୍ୟାଳୟ ପାଇଁ ପ୍ରଶିକ୍ଷଣପ୍ରାପ୍ତ ୫ କଳା ଶିକ୍ଷକ ପଦବୀ ରହିଥିବାବେଳେ ସେଥିରୁ ମାତ୍ର ଜଣେ ଶିକ୍ଷକ ନିଯୁକ୍ତି ପାଇଛନ୍ତି। ଅପରପକ୍ଷେ ଜଣେ କଳା ଶିକ୍ଷକଙ୍କୁ ସପ୍ତାହକୁ ୩ ଦିନ ପାଇଁ ଅନ୍ୟ ଏକ ବିଦ୍ୟାଳୟରୁ ଡେପୁଟେଶନରେ ଅଣାଯାଇଛି। ସେହିପରି ବିଜ୍ଞାନ ଓ ଗଣିତ ବିଭାଗରେ ୭ଟି ପଦବୀରୁ ମାତ୍ର ୨ ଜଣ ଶିକ୍ଷାଦାନ କରୁଛନ୍ତି। ଏହାଛଡ଼ା ଇଂଲିଶ୍ ଶିକ୍ଷକ ନ ଥିବାବେଳେ ଜଣେ ସଂସ୍କୃତ ଶିକ୍ଷକରେ ଶିକ୍ଷାଦାନ ଚାଲିଛି ।କମ୍ପ୍ୟୁଟର ଶିକ୍ଷାଦାନପାଇଁ ଶିକ୍ଷକ ନ ଥିବା ବେଳେ ୫-ଟି ବିଦ୍ୟାଳୟର ଡିଜିଟାଲ କ୍ଲାସ ପ୍ରହସନରେ ପରିଣତ ହୋଇଛି। ଉକ୍ତ ବିଦ୍ୟାଳୟଟି ୧୧ ଏକର ପରିମିତ ଜାଗାରେ ପ୍ରତିଷ୍ଠିତ ହୋଇିଛି। ଏଠାରେ ଥିବା ବିସ୍ତୀର୍ଣ୍ଣ ଖେଳପଡ଼ିଆରେ ଏକ ମିନି ଷ୍ଟାଡିୟମ ନିର୍ମାଣ କରିବାକୁ ବାରମ୍ବାର ଦାବି ହୋଇଛି। ମାତ୍ର ଏପର୍ଯ୍ୟନ୍ତ ଏହା ପୂରଣ ହୋଇପାରିନାହିଁ। ଗତ ୨୯ତାରିଖ ଦିନ ୫-ଟି ସଚିବ ଭି.କେ. ପାଣ୍ଡିଆନ ଏହି ବିଦ୍ୟାଳୟ ବୁଲି ଦେଖିବା ସହ ଏହାର ପଡିଆରେ ଜନସାଧାରଣଙ୍କ ଆପତି ଅଭିଯୋଗ ଶୁଣିଥିଲେ। ଏହି ଅବସରରେ ମୋ ସ୍କୁଲ ଅଭିଯାନ କମିଟି, ବିଦ୍ୟାଳୟ ପରିଚାଳନା ସମିିତି ତରଫରୁ ବିଭିନ୍ନ ସମସ୍ୟା ଉପରେ ସଚିବଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ୫-ସଚିବଙ୍କ ଘୋଷଣାନୁଯାୟୀ ୭ ଦିନ ମଧ୍ୟରେ ବିଦ୍ୟାଳୟର ଉନ୍ନତି ପାଇଁ ବ୍ୟବସ୍ଥା କରାଯିବ ବୋଲି ଆଶା କରାଯାଉଥିଲା। ଇତିମଧ୍ୟରେ ୧୫ ଦିନ ବିତିଥିଲେ ବି କୌଣସି ପଦକ୍ଷେପ ନିଆ ନ ଯିବାରୁ ପରିଚାଳନା ସମିତି ଓ ମୋ ସ୍କୁଲ ଅଭିଯାନ କମିଟି ପକ୍ଷରୁ କ୍ଷୋଭ ପ୍ରକାଶ ପାଇଛି। ଏ ସମ୍ପର୍କରେ ମୋ ସ୍କୁଲ ଅଭିଯାନ କମିିଟି ତଥା ଆଲୁମିନିମ୍ କମିଟି ସଭାପତି ଅବସରପ୍ରାପ୍ତ ପ୍ରାଧ୍ୟାପକ ଅକ୍ଷୟ କୁମାର ପଲେଇ, ପରିଚାଳନା କମିଟି ସଭାପତି ନକ୍ଷତ୍ର ପରିଜା, ପୁରାତନ ଛାତ୍ର ସଂସଦର ସଭ୍ୟ ରବୀନ୍ଦ୍ର ନାୟକ, ନବ କୁମାର ସାହୁ, ନବୀନ ଦାସ ପ୍ରମୁଖ ଅସନ୍ତୋଷବ୍ୟକ୍ତ କରିଛନ୍ତି। ୭ଦିନ ମଧ୍ୟରେ ନୂତନ ଶିକ୍ଷକ ଶିକ୍ଷୟିତ୍ରୀ ନିଯୁକ୍ତି ସହ ଉଚ୍ଛେଦ ପଦବୀ ପୂରଣ ପାଇଁ ପଦକ୍ଷେପ ନିଆ ନ ଗଲେ ଆନ୍ଦୋଳନ କରାଯିବ ବୋଲି ପରିଚାଳନା ସମିତି ସଭାପତି ପରିଜା ଚେତାବନୀ ଦେଇଛନ୍ତି।
