ଓ୍ବାରର୍ସ/ବୁଧାପେଷ୍ଟ, ୪।୯ : ରୁଷିଆ ୟୁକ୍ରେନ୍ ମଧ୍ୟରେ ଜାରି ରହିଥିବା ଯୁଦ୍ଧର ପ୍ରଭାବ ଏବେ ପୋଲାଣ୍ଡ ଏବଂ ହଙ୍ଗେରିରେ ଅନୁଭୁତ ହେବାରେ ଲାଗିଛି। ଉଭୟ ଦେଶ ୟୁକ୍ରେନ ଶରଣାର୍ଥୀଙ୍କ ସମସ୍ୟା ସହ ମୁକାବିଲା କରୁଥିବାରୁ ଏହି ସମସ୍ୟା ଆହୁରି ଖରାପ ହେବାକୁ ଯାଉଛି। ସେଥିମଧ୍ୟରୁ ପୋଲାଣ୍ଡର ଅବସ୍ଥା ଅଧିକ ଖରାପ, କାରଣ ଏଠାରେ ପ୍ରାୟ ଦୁଇ ଲକ୍ଷ ୟୁକ୍ରେନ ଛୋଟ ପିଲାଙ୍କ ଭବିଷ୍ୟତ ଅନ୍ଧକାରରେ ରହିଛି। ସେମାନେ ପାଠ ନପଢ଼ି ବସି ରହିଛନ୍ତି। ୨୪ ଫେବୃଆରୀରେ ଯୁଦ୍ଧ ଆରମ୍ଭ ହେବା ପରେ ସେମାନଙ୍କ ମଧ୍ୟରୁ ଅଧିକାଂଶ ପୋଲାଣ୍ଡ ବିଦ୍ୟାଳୟରେ ନାମ ଲେଖାଇଥିଲେ।
ଆସନ୍ତା ବର୍ଷ ୟୁକ୍ରେନ ଛାତ୍ରଙ୍କ ସଂଖ୍ୟା ତିନିଗୁଣ ହୋଇପାରେ ବୋଲି ଶିକ୍ଷା ମନ୍ତ୍ରୀ ସୂଚନା ଦେଇଛନ୍ତି। ମାତ୍ର କମ୍ ଦରମା ଯୋଗୁ ପାଠ ପଢ଼ାଇବାକୁ ଶିକ୍ଷକମାନେ ଅମଙ୍ଗ ହେବା ସହିତ ପେଶା ଛାଡ଼ିବାରେ ଲାଗିଛନ୍ତି। କମ୍ ଦରମା ଏବଂ ଅତ୍ୟଧିକ କାମ ଚାପରେ ଶିକ୍ଷକମାନଙ୍କର ଆର୍ଥିକ ସ୍ଥିତି ଖରାପ ହେବାରେ ଲାଗିଛି। ଶିକ୍ଷକ ଓ ଅଭିଭାବକମାନେ କହିଛନ୍ତି ଯେ ଶାସକ ଦଳ ଛାତ୍ରୀଛାତ୍ରମାନଙ୍କ ମଧ୍ୟରେ ରକ୍ଷଣଶୀଳ ଏବଂ ଜାତୀୟତାବାଦୀ ମନୋଭାବ ବଢ଼ାଇବା ପାଇଁ ବିଦ୍ୟାଳୟଗୁଡ଼ିକୁ ବ୍ୟବହାର କରୁଛନ୍ତି।
ବିଭିନ୍ନ ସମସ୍ୟାକୁ ନେଇ ଶିକ୍ଷକମାନେ କଳା କପଡା ସହିତ ମୁହଁ ଘୋଡାଇ କଳା କଳା ଛତା ଧରି ପ୍ରଦର୍ଶନ କରିଥିଲେ । ଶିକ୍ଷକ ସଂଘ ପିଏସଜେଡ କହିଛି ଯେ ଶିକ୍ଷକମାନେ ଟିକସ ଦେବା ପରେ ଦରମା ବାବଦରେ ମାତ୍ର ୫୦୦ ୟୁରୋ ପାଆନ୍ତି। ଏହି କାରଣରୁ ଅନେକ ଶିକ୍ଷକ ପେଶା ଛାଡି ଯାଉଛନ୍ତି। ଇତିମଧ୍ୟରେ ଶହ ଶହ ଲୋକ ଏକ ପଦଯାତ୍ରା କରି ଶିକ୍ଷକମାନଙ୍କୁ ସମର୍ଥନ କରିଛନ୍ତି। ଲୋକେ ଅଭିଯୋଗ କରିଛନ୍ତି ଯେ ପ୍ରଧାନମନ୍ତ୍ରୀ ଭିକ୍ଟର ଆରେବାନଙ୍କ ସରକାରଙ୍କ ନିର୍ଦ୍ଦେଶରେ ଶିକ୍ଷକଙ୍କ ଦରମା କମ ରଖାଯାଇଛି। ସେମାନେ ସ୍ବତନ୍ତ୍ର ଦେଶ ଏବଂ ମାଗଣା ଶିକ୍ଷା ଆଦି ସ୍ଲୋଗାନ ଦେଇଥିଲେ।
