ଦିଗପହଣ୍ଡି,୨୭।୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସ୍ଥିତ ବଡ଼ଖେମୁଣ୍ଡି ହାଇସ୍କୁଲରେ ଦୀର୍ଘଦିନ ହେଲା ଆବଶ୍ୟକ ଶିକ୍ଷକ ପଦବୀ ଖାଲି ପଡ଼ିଛି । ଯାହାଫଳରେ ଛାତ୍ରଙ୍କ ପାଠପଢା ବାଧାପ୍ରାପ୍ତ ହେଉଛି। ବହୁସଂଖ୍ୟକ ଛାତ୍ର ବ୍ଲକ ଗୋଷ୍ଠୀ ଶିକ୍ଷାଧିକାରୀ ଭୋପେନ ମହାନ୍ତଙ୍କୁ ସାକ୍ଷାତ କରି ତୁରନ୍ତ ଖାଲି ପଡ଼ିଥିବା ଶିକ୍ଷକ ପଦବୀ ପୂରଣ ପାଇଁ ସ୍ମାରକପତ୍ର ପ୍ରଦାନ କରିଛନ୍ତି । ଖୁବ୍ ଶୀଘ୍ର ଖାଲିଥିବା ଶିକ୍ଷକ ପଦବୀ ପୂରଣ ପାଇଁ ଶିକ୍ଷା ବିଭାଗ ଉଚ୍ଚ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ହାଇସ୍କୁଲରେ ବିଜ୍ଞାନ ଶିକ୍ଷକ ଅଛନ୍ତି। ସେ ବିଜ୍ଞାନ ସହିତ ଗଣିତ ପାଠ ପଠାଇବାରେ ଅସୁବିଧା ନଥିବା ଉଲ୍ଲେଖ କରିଛନ୍ତି।
ରାଜ୍ୟ ସରକାର ଛାତ୍ରଙ୍କ ଉଜ୍ବଳ ଭବିଷ୍ୟତ ନିମନ୍ତେ ହାଇସ୍କୁଲ ରୁପାନ୍ତରୀକରଣ କରିବା ସହ ୨ ଟି ସ୍ମାର୍ଟ କ୍ଲାସ ରୁମ୍ ମଧ୍ୟ ନିର୍ମାଣ କରିଛନ୍ତି । ସେଥିରେ ଥିବା ୨ ଟି ସ୍ମାର୍ଟ ଟି.ଭି ଅଚଳ ହୋଇପଡିଛି। ସ୍ମାର୍ଟ କ୍ଲାସ ରୁମ୍ ରେ ଛାତ୍ର ମାନଙ୍କୁ କଳାପଟା ରେ ପଢ଼ାଯାଉଛି। ହାଇସ୍କୁଲରେ ଦୀର୍ଘଦିନ ହେଲା ଆବଶ୍ୟକ ଶିକ୍ଷକଙ୍କ ଅଭାବ ହେତୁ ଶିକ୍ଷାଦାନ ବ୍ୟାଘାତ ହେଉଥିବା ସାମାଜିକ କର୍ମୀ ତାରାପ୍ରସାଦ ପଟ୍ଟନାୟକ କହିଛନ୍ତି ।ଦିଗପହଣ୍ଡିରେ ଗତ ୧୯୧୩ ମସିହାରେ ହାଇସ୍କୁଲ ସ୍ଥାପିତ ହୋଇଥିଲା । ବର୍ତ୍ତମାନ ହାଇସ୍କୁଲରେ ୬ ଷ୍ଠ ଶ୍ରେଣୀରେ ୩୭ ଛାତ୍ର, ୭ମ ରେ୫୭, ୮ମ ରେ ୪୫, ୯ମ ରେ ୭୦ ଏବଂ ୧୦ମ ଶ୍ରେଣୀରେ ୭୪ ସମୁଦାୟ ୨୮୩ ଜଣ ଛାତ୍ର ପାଠ ପଢୁଛନ୍ତି। କିନ୍ତୁ ହାଇସ୍କୁଲରେ ପ୍ରଧାନଶିକ୍ଷକଙ୍କ ସମେତ ୨ ଟିଜିଟି ଏମପିସି ଶିକ୍ଷକ ପଦବୀ ଖାଲି ପଡିଥିବାରୁ ୯ମ ଏବଂ ୧୦ମ ଶ୍ରେଣୀରେ ଶିକ୍ଷାବର୍ଷ ପ୍ରାରମ୍ଭରୁ ଆଜି ଯାଏ ଗୋଟିଏ ହେଲେ ଗଣିତ କ୍ଲାସ ହୋଇନାହିଁ।
ଗଣିତ ପଢ଼ାଇବା ପାଇଁ ଶିକ୍ଷକ ନାହାନ୍ତି। ସେହିପରି ୨ ଜଣ ଆଇ.ଏ ସିଟି ତାଲିମ ପ୍ରାପ୍ତ ଶିକ୍ଷକ ଏବଂ ୩ ମାଟ୍ରିକ ସି.ଟି ଶିକ୍ଷକ ପଦବୀ ଖାଲି ପଡ଼ିଥିବା କାରଣରୁ ୬ଷ୍ଠ, ୭ମ ଏବଂ ୮ମ ଶ୍ରେଣୀ ପାଇଁ ଜଣେ ମାତ୍ର ଶିକ୍ଷକ ଥିବାରୁ ଶିକ୍ଷାଦାନ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି।କ୍ରୀଡା ଶିକ୍ଷକ ଏମ.ଗୌରାଙ୍ଗ ଅବସର ଗ୍ରହଣ କରିବା ପରେ କ୍ରୀଡା ଶିକ୍ଷକ ପଦବୀ ଖାଲି ପଡ଼ିଛି। ଛାତ୍ରଙ୍କ ପାଇଁ କୌଣସି ଖେଳ କୁଦ ହେଉନାହିଁ। ଅନ୍ୟପକ୍ଷରେ ହାଇସ୍କୁଲ ମୁଖ୍ୟକିରାଣୀ ପଦବୀ ଖାଲି ପଡିଥିବାରୁ ଶିକ୍ଷୟତ୍ରୀ ଶିକ୍ଷକ, କର୍ମଚାରୀଙ୍କ ମାସିକ ଦରମା ବିଲ୍ ସମେତ ଅନ୍ୟାନ୍ୟ ଆନୁସଙ୍ଗିକ କାର୍ଯ୍ୟ ପରିଚାଳନା କରିବାରେ ଘୋର ଅସୁବିଧା ହେଉଥିବା ଭାରପ୍ରାପ୍ତ ପ୍ରଧାନଶିକ୍ଷକ ସୁନୀଲ ମହାନ୍ତି କହିଛନ୍ତି। ତାଙ୍କୁ ମଧ୍ୟ ନିମଖଣ୍ଡି ପେଣ୍ଠ ହାଇସ୍କୁଲକୁ ପ୍ରଧାନଶିକ୍ଷକ ଭାବେ ବଦଳି ହୋଇଛି। ଯେ କୌଣସି ମୁହୂର୍ତ୍ତରେ ସେ ରିଲିଭ ହୋଇଯିବେ ବୋଲି ଜଣାପଡିଛି। ୬ଷ୍ଠ ରୁ ୧୦ମ ୫ ଟି ଶ୍ରେଣୀ ପାଇଁ ୧୨ ଶିକ୍ଷୟତ୍ରୀ ଶିକ୍ଷକ ଆବଶ୍ୟକ ଥିବା ବେଳେ ବର୍ତ୍ତମାନ ୩ ଜଣ ଶିକ୍ଷକ ୫ ଶିକ୍ଷୟତ୍ରୀ ନିଯୁକ୍ତ ଅଛନ୍ତି।ପୂର୍ବରୁ ୨ ଶିକ୍ଷକ ଭଗବାନ ପାତ୍ର ଏବଂ ରାମଚନ୍ଦ୍ର ମହାପାତ୍ର ଙ୍କୁ ଡେପୁଟେସନ ରେ ଅନ୍ୟ ସ୍କୁଲ କୁ ପଠାଇ ଦିଆଯାଇଛି।
ଅନ୍ୟପକ୍ଷରେ ହାଇସ୍କୁଲ ପରିଚାଳନା ପାଇଁ ଡ୍ରଇଂ ଅଥରିଟି କେହି ନଥିବା କାରଣରୁ ଦୀର୍ଘଦିନ ହେଲା ମଧ୍ୟାହ୍ନ ଭୋଜନ ବ୍ୟବସ୍ଥା ବାକି ରେ ଚାଲିଛି । ପ୍ରାୟ ୩ ମାସ ହେଲା ହାଇସ୍କୁଲକୁ ମଧ୍ୟାହ୍ନଭୋଜନ ପାଇଁ ରାସନ୍ ସାମଗ୍ରୀ ଦେଉଥିବା ବ୍ୟବସାୟୀଙ୍କ ପ୍ରାୟ ୪୦ ହଜାର ଟଙ୍କା,ଅଣ୍ଡା ବ୍ୟବସାୟୀଙ୍କ ୫୦ ହଜାର ଟଙ୍କା ଏବଂ ପରିବା ବ୍ୟବସାୟୀ ଙ୍କ ୩୦ ହଜାର ଟଙ୍କା ଦିଆଯାଇନଥିବା ଜଣାପଡ଼ିଛି। ଏଭଳି ଅବ୍ୟବସ୍ଥାର ସ୍ଥାୟୀ ସମାଧାନ ସହ ଶିକ୍ଷା ବିଭାଗ ଉଚ୍ଚ କର୍ତ୍ତୃପକ୍ଷ ହାଇସ୍କୁଲରେ ଖାଲି ପଡ଼ିଥିବା ଶିକ୍ଷକ ପଦବୀ ପୂରଣ ନକଲେ ଆଗାମୀ ଦିନରେ ହାଇସ୍କୁଲ ରେ ତାଲା ପକାଯାଇ ଆନ୍ଦୋଳନ ପାଇଁ ବହୁ ସଂଖ୍ୟକ ଅଭିଭାବକ ଅଭିଭାବକ ଚେତାବନୀ ଦେଇଛନ୍ତି ।
