ଭୁବନେଶ୍ୱର,: ଓ୍ବେସ୍କୋ ଏବଂ ସାଉଥ୍କୋର ପରିଚାଳନା ଏବଂ ଅପରେଶନ ଭାର ଟାଟା ପାଓ୍ବାର ହାତକୁ ଯାଇଛି। ଗୁରୁବାର ଏ ସମ୍ପର୍କରେ କମ୍ପାନୀ ପକ୍ଷରୁ ବିଧିବଧ ଭାବେ ଘୋଷଣା କରାଯାଇଇଛି। ଅଧିଗ୍ରହଣ ନେଇ ସମସ୍ତ ପ୍ରକ୍ରିୟା ସମ୍ପାଦିତ ହୋଇଛି। ଏହି ଅଧିଗ୍ରହଣ ପରେ ଓ୍ବେସ୍କୋ ଏବଂ ସାଉଥ୍କୋ ଯଥାକ୍ରମେ ଟିପି ଓ୍ବେଷ୍ଟର୍ନ ଓଡିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ (ଡିପିଡବ୍ଲ୍ୟୁଓଡିଏଲ୍) ଓ ଟିପି ସଦର୍ନ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ (ଟିପିଏସ୍ଓଡିଏଲ୍) କମ୍ପାନୀ ନାମରେ ପରିଚାଳିତ ହେବ। ଓଡ଼ିଶା ବିଦ୍ୟୁତ୍ ନିୟାମକ ଆୟୋଗ(ଓଇଆର୍ସି)ଙ୍କ ନିର୍ଦ୍ଦେଶ ଅନୁସାରେ କମ୍ପାନୀରେ ଟାଟା ପାଓ୍ବାରର ୫୧% ଇକ୍ୱିଟି ଅଂଶଧନ ରହିବ। ପରିଚାଳନା ନିୟନ୍ତ୍ରଣ ଟାଟା ନିକଟରେ ରହିବ। ରାଜ୍ୟ ସରକାରଙ୍କ ମାଲିକାନାଧୀନ ଗ୍ରୀଡ୍କୋ ପାଖରେ ବଳକା ୪୯% ଇକ୍ୱିଟି ଅଂଶଧନ ରହିବ ବୋଲି କମ୍ପାନୀ ପକ୍ଷରୁ ସୂଚନା ରହିଛି।
ଟିପି ଓ୍ବେଷ୍ଟର୍ନ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ ବର୍ତ୍ତମାନ ରାଉରକେଲା, ବୁର୍ଲା, ଭବାନୀପାଟଣା, ବଲାଙ୍ଗୀର, ବରଗଡ଼ ଭଳି ୫ଟି ସର୍କଲକୁ ନେଇ ଥିବା ଓ୍ବେସ୍କୋ ଅଞ୍ଚଳରେ ବାର୍ଷିକ ୭୫୨୦ ଏମ୍ୟୁ ବିଦ୍ୟୁତ୍ ଇନ୍ପୁଟ ସହିତ ୨ ନିୟୁତ ଗ୍ରାହକ ରହିଛନ୍ତି। ସେହିଭଳି ଟିପି ସଦର୍ନ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ ଗଞ୍ଜାମ ସହର, ବ୍ରହ୍ମପୁର, ଆସ୍କା, ଭଞ୍ଜନଗର, ଜୟପୁର, ରାୟଗଡ଼ା ଭଳି ୬ଟି ସର୍କଲକୁ ନେଇ ଥିବା ସାଉଥ୍କୋ ଅଞ୍ଚଳରେ ୩୪୭୦ ଏମ୍ୟୁ ସହ ୨.୩ ନିୟୁତ ଗ୍ରାହକଙ୍କୁ ସେବା ଯୋଗାଣ ହେବ। ଏହି ଅଧିଗ୍ରହଣ ସହ କମ୍ପାନୀର ବିତରଣ ସର୍କଲ ରାଜ୍ୟର ପଶ୍ଚିମାଞ୍ଚଳ ଏବଂ ଦକ୍ଷିଣାଞ୍ଚଳକୁ ସମ୍ପ୍ରସାରିତ ହୋଇଛି। ଏହା ମଧ୍ୟରେ ୪୭ ହଜାର କି.ମି.ରୁ ଅଧିକ ଭୌଗୋଳିକ ଅଞ୍ଚଳ ସାମିଲ ରହିଛି। ୧ ଲକ୍ଷରୁ ଅଧିକ ସିକେଟି କି.ମି.ର ନେଟ୍ଓ୍ବର୍କକୁ ୨୫ ବର୍ଷ ଅବଧିର ଲାଇସେନ୍ସ ହିସାବରେ କମ୍ପାନୀ ପରିଚାଳନା କରିବ। ୨ଟି ଅତିରିକ୍ତ ବିତରଣ ୟୁଟିଲିଟି ସାମିଲ ହେବା ପରେ ଟାଟା ପାଓ୍ବାରର ଗ୍ରାହକ ସଂଖ୍ୟା ମୁମ୍ବାଇ, ନୂଆଦିଲ୍ଲୀ, କେନ୍ଦ୍ର ଓଡ଼ିଶା ଏବଂ ଆଜମେର ଭଳି ସ୍ଥାନରେ ୫.୨ ନିୟୁତରୁ ବୃଦ୍ଧି ହୋଇ ୯.୫ ନିୟୁତ ଛୁଇଁଛି। ଓ୍ବେସ୍କୋ ଏବଂ ସାଉଥ୍କୋ ସହ କାରବାର ଆରମ୍ଭ କରି ଗ୍ରାହକଙ୍କୁ ଗୁଣବତ୍ତା ସେବା ଯୋଗାଣ ଧାରା ଜାରି ରହିବ ବୋଲି ଟାଟା ପାଓ୍ବାରର ସିଇଓ ପ୍ରବୀର ସିହ୍ନା କହିଛନ୍ତି।
