ନୂଆଦିଲ୍ଲୀ,୨୦।୨: ଟାଟା ଗ୍ରୁପ୍ର କମ୍ପାନୀଗୁଡ଼ିକର ମୋଟ ବଜାର ପୁଞ୍ଜି ଏବେ ପାକିସ୍ତାନର ମୋଟ ଘରୋଇ ଉତ୍ପାଦ (ଜିଡିପି)କୁ ଟପିଯାଇଛି। ସଦ୍ୟତମ ତଥ୍ୟ ଅନୁଯାୟୀ ଟାଟା ଗ୍ରୁପ୍ର ମୋଟ ବଜାର ପୁଞ୍ଜି ୩୬୫ ବିଲିୟନ ଡଲାରରୁ ଅଧିକ (୩୦.୩ ଲକ୍ଷ କୋଟି ଟଙ୍କା)। ଏବେ ପାକିସ୍ତାନର ଜିଡିପି ୩୪୧ ବିଲିୟନ ଡଲାର ରହିଥିବା ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମ୍ଏଫ୍) ରିପୋର୍ଟରୁ ଜଣାପଡ଼ିଛି। କେବଳ ଟାଟା କନ୍ସଲ୍ଟାନ୍ସି ସର୍ଭିସ୍ (ଟିସିଏସ୍)ର ମୋଟ ବଜାର ପୁଞ୍ଜି ୧୭୮ ବିଲିୟନ ଡଲାର, ଯାହା ପାକିସ୍ତାନ ଜିଡିପିର ଅଧାରୁ ଅଧିକ। ରିଲାଏନ୍ସ ଇଣ୍ଡଷ୍ଟ୍ରିଜ୍ ପରେ ଏହା ଭାରତର ସର୍ବବୃହତ୍ କମ୍ପାନୀ।
ଅନ୍ୟପକ୍ଷରେ ବିଶ୍ୱବ୍ୟାଙ୍କ ଆକଳନ ଅନୁଯାୟୀ ପାକିସ୍ତାନର ଜିଡିପି ୩୭୬ ବିଲିୟନ ଡଲାର, ଯାହା ଟାଟା ଗ୍ରୁପ୍ର ମୋଟ ବଜାର ପୁଞ୍ଜିଠାରୁ ସାମାନ୍ୟ ଅଧିକ। ଚଳିତ ମାସ ଆରମ୍ଭରେ ଟାଟା ଗ୍ରୁପ୍ର ମୋଟ ବଜାର ପୁଞ୍ଜି ୩୦ ଲକ୍ଷ କୋଟି ଟଙ୍କା ଅତିକ୍ରମ କରିଥିଲା, ଯାହାକି ଏହି ସଫଳତା ହାସଲ କରିବାରେ ପ୍ରଥମ ଭାରତୀୟ ଗ୍ରୁପ୍ ଅଫ୍ କମ୍ପାନିଜ୍। ଟିସିଏସ୍, ଟାଟା ମୋଟର, ଟାଟା ପାଓ୍ବାର ଏବଂ ଇଣ୍ଡିଆନ୍ ହୋଟେଲ୍ସର ଅଂଶଧନ କାରବାର ବୃଦ୍ଧି ଯୋଗୁ ଟାଟା ଗ୍ରୁପ୍ର ବଜାର ପୁଞ୍ଜି ବଢ଼ିଛି। ଗତବର୍ଷ ଏହାର ବଜାର ପୁଞ୍ଜି ୬.୧୩ ଲକ୍ଷ କୋଟି ଟଙ୍କା ରହିଥିଲା। ସେପଟେ ପାକିସ୍ତାନ ଗତ କିଛିବର୍ଷ ହେଲା ଆର୍ଥତ୍କ ସଙ୍କଟ ଦେଇ ଗତି କରୁଛି। ଏହାର ଋଣ ଭାର ବଢ଼ିଚାଲିଥିବାବେଳେ ବିଦେଶ ପୁଞ୍ଜି ବିନିମୟ ଭଣ୍ଡାର (ଫରେକ୍ସ) ହ୍ରାସ ପାଇବାରେ ଲାଗିଛି। ଏଥିସହିତ ଦୀର୍ଘବର୍ଷ ଧରି ରାଜନୈତିକ ଅସ୍ଥିରତା ଜାରି ରହିଥିବାରୁ ପାକିସ୍ତାନର ଅର୍ଥନୀତି ଅଧିକ ଖରାପ ହେବାରେ ଲାଗିଛି। ୨୦୧୧ରୁ ଇତିମଧ୍ୟରେ ପାକିସ୍ତାନର ବାହ୍ୟ ଋଣ ଭାର ପାଖାପାଖି ୨ ଗୁଣା ହୋଇଥିବାବେଳେ ଘରୋଇ ଋଣ ୬ ଗୁଣ ବୃଦ୍ଧି ପାଇଛି। ଆଇଏମ୍ଏଫ୍ର ଆକଳନ ତୁଳନାରେ ପାକିସ୍ତାନର ଋଣ ସ୍ଥିତି ଆହୁରି ଖରାପ ବୋଲି ଇସ୍ଲାମାବାଦର ଏକ ଥିଙ୍କ୍ ଟ୍ୟାଙ୍କ ଟାବଡଲାବ୍ ପକ୍ଷରୁ କୁହାଯାଇଛି।
