ଶ୍ରୀନଗର,୧୩।୫: ଦେଶରେ କରୋନା ଭାଇରସ୍ ସଂକ୍ରମଣ ସ୍ଥିତି ଅସମ୍ଭାଳ ହେବାରେ ଲାଗିଛି। ଏହି ମହାମାରୀ ଅନେକ ପରିବାରଠାରୁ ନିଜ ଆତ୍ମୀୟଙ୍କୁ ଛଡ଼ାଇ ନେଉଥିବା ବେଳେ ଏହି ସମୟରେ ଲୋକଙ୍କ ଅମାନବିକତା ମଧ୍ୟ ପରିଲକ୍ଷିତ ହେଉଛି। କରୋନା କାଳରେ ସଂଘର୍ଷ କରୁଥିବା ଲୋକଙ୍କ ପାଇଁ କେହି ସାହାଯ୍ୟର ହାତ ବଢ଼ାଉଥିବା ବେଳେ ଆଉ କେହି ପଛଘୁଞ୍ଚା ମଧ୍ୟ ଦେଉଥିବା ଦୃଶ୍ୟ ବହୁଥର ସାମ୍ନାକୁ ଆସିଛି। ହେଲେ କେତେକଙ୍କ ବଦାନ୍ୟତା ଅନ୍ୟମାନଙ୍କୁ ପ୍ରେରଣା ଯୋଗାଇଥାଏ। କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ଜମ୍ମୁ-କଶ୍ମୀରରେ। ଜମ୍ମୁ-କଶ୍ମୀରର ଜଣେ ଯୁବକ କୋଭିଡ ଆକ୍ରାନ୍ତଙ୍କୁ ସାହାଯ୍ୟ କରିବାକୁ ଯାଇ ନିଜ ନୌକାକୁ ଆମ୍ବୁଲାନ୍ସ କରିଥିବା ଜଣାପଡ଼ିଛି।
ଯାହା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ତାରିକ ଅହମଦ ପତଲୁ ନାମକ ଜଣେ ଯୁବକ ଶ୍ରୀନଗରର ପ୍ରସିଦ୍ଧ ଡଲ ହ୍ରଦରେ ଏକ ନୌକାକୁ ଆମ୍ବୁଲାନ୍ସରେ ପରିଣତ କରିଛନ୍ତି। ଏହା ମାଧ୍ୟମରେ ସେ କୋଭିଡ ରୋଗୀଙ୍କୁ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଯିବା ପାଇଁ ସାହାଯ୍ୟ କରିଥାନ୍ତି। ଏହି ନୌକା ଆମ୍ବୁଲାନ୍ସର ବିଶେଷତଃ ହେଲା ଏଥିରେ ପିପିଇ କିଟ୍, ଷ୍ଟ୍ରେଚର ଓ ହ୍ବିଲ ଚେୟାର ମଧ୍ୟ ରହିଛି। ଜରୁରୀକାଳୀନ ସମୟରେ ଏହି ହ୍ରଦ ନିକଟବର୍ତ୍ତୀ ରହୁଥିବା ଲୋକଙ୍କୁ ତାରିକ ମାଗଣାରେ ହସ୍ପିଟାଲ ପହଞ୍ଚାଇଥାନ୍ତି। ଏହାଦ୍ୱାରା ତାଙ୍କୁ ଆତ୍ମସନ୍ତୋଷ ମିଳିଥାଏ ବୋଲି ସେ କହିଛନ୍ତି। ସୂଚନା ମୁତାବକ ନିକଟରେ ତାରିକ କରୋନା ପଜିଟିଭ୍ ଚିହ୍ନଟ ହୋଇଥିବା ବେଳେ ତାଙ୍କୁ ହସ୍ପିଟାଲ ନେବା ପାଇଁ କେହି ଆଗକୁ ଆସି ନ ଥିଲେ। ସେହି ସମୟରେ ସମ୍ମୁଖୀନ ହୋଇଥିବା ସମସ୍ୟାକୁ ଦୃଷ୍ଟିରେ ରଖି ସେ ଏଭଳି ପଦକ୍ଷେପ ଗ୍ରହଣ କରିଛନ୍ତି। ହସ୍ପିଟାଲରେ ଚିକିତ୍ସିତ ହୋଇ ଘରକୁ ଫେରିବା ପରେ ଲୋକଙ୍କ ସହାୟତା ପାଇଁ ସେ ନିଜ ଖର୍ଚ୍ଚରେ ଉକ୍ତ ହ୍ରଦରେ ଆମ୍ବୁଲାନ୍ସ ତିଆରି କରିଥିଲେ।
