ଢେଙ୍କାନାଳ ଅଫିସ, ୨୮।୯: ମହିମା ଧର୍ମର ଅନ୍ତୁଡ଼ିଶାଳ ତଥା ମହିମା ଗୋସାଇଁଙ୍କ ଆତ୍ମଯୋଗ ସାଧନାର ପୀଠସ୍ଥଳ କପିଳାସ ଅଭୟାରଣ୍ୟ ଭିତରେ ଥିବା ତପୋବନ ପୀଠ ରାସ୍ତା ଶୋଚନୀୟ ହୋଇପଡ଼ିଛି। ଗାଡ଼ି ଯାତାୟାତ ତ ଦୂରର କଥା ପାଦରେ ଚାଲିକରି ଯିବା ବି କଷ୍ଟକର ହୋଇପଡୁଛି। ରାସ୍ତାରେ ବର୍ଷାଜଳ ପ୍ରବାହିତ ହୋଇ ମୋରମ ଧୋଇ ଯାଇଥିବାବେଳେ ଅବଡାଖାବଡା ହୋଇ ଏଭଳି ସମସ୍ୟା ସୃଷ୍ଟି ହୋଇଛି। ରାଜ୍ୟ ସରକାର ତପୋବନର ଉନ୍ନତି ଲାଗି ପ୍ରତିଶ୍ରୁତି ଦେଉଥିବାବେଳେ ତାହା ଫଳପ୍ରଦ ହେଉ ନ ଥିବା ଆଲୋଚନାର ବିଷୟ ହୋଇଛି।
ଅଭୟାରଣ୍ୟ ମଧ୍ୟରେ ଅବସ୍ଥିତ ତପୋବନ ପୀଠର ଉନ୍ନୟନ ଦାୟିତ୍ୱ ବନ ବିଭାଗ ହାତରେ ନ୍ୟସ୍ତ କରାଯାଇଛି। ତେବେ ଅଦ୍ୟାବଧି ରାସ୍ତା ପାର୍ଶ୍ୱରେ ଡ୍ରେନ୍ ନିର୍ମାଣ କରାଯାଇନାହିଁ। ତେଣୁ ପ୍ରତିବର୍ଷ ବର୍ଷା ହେଲେ ମାଟି ରାସ୍ତା ଧୋଇଯାଉଛି। ବର୍ଷକୁ ବର୍ଷ ମୋରମ ପକାଇ ଏହାର ମରାମତି କରାଯାଉଥିଲେ ହେଁ ସେହି ଟଙ୍କା ପାଣିରେ ପଡୁଛି। ଆସନ୍ତା ନଭେମ୍ବର ୧୯ରେ କାର୍ତ୍ତିକ ଶୁକ୍ଳ ଦଶମୀ ତିଥିରେ ପୀଠରେ ପ୍ରସିଦ୍ଧ ମେଳା ଅନୁଷ୍ଠିତ ହେବାକୁ ଥିବାବେଳେ ରାସ୍ତାର ଦୁରାବସ୍ଥା ଶ୍ରଦ୍ଧାଳୁଙ୍କ ମଧ୍ୟରେ ତୀବ୍ର ଅସନ୍ତୋଷ ବଢ଼ାଇଛି। ମେଳା ପୂର୍ବରୁ ରାସ୍ତା ପକ୍କା କରିବା, ଝରଣା ଉପରେ ଆଡ଼ିବନ୍ଧ ନିର୍ମାଣ, ଆତ୍ମସେବା ସ୍ଥଳୀର ଉନ୍ନତୀକରଣ, ସ୍ଥାୟୀ ଭିକ୍ଷା ମଣ୍ଡପ ନିର୍ମାଣ, ସୌର ଆଲୋକ ବ୍ୟବସ୍ଥାର ସୁଦୃଢ଼ୀକରଣ କରିବାକୁ ଢେଙ୍କାନାଳ ଜିଲା ସକ୍ରିୟ ନାଗରିକ ପରିଷଦ ପକ୍ଷରୁ ଦାବି କରାଯାଇଛି। ଏଥିସହ ପୀଠକୁ ୫-ଟି ଅଧୀନକୁ ନେବା ଲାଗି ଜିଲାର ଜନପ୍ରତିନିଧି ଉଦ୍ୟମ କରିବାକୁ ପରିଷଦ ପକ୍ଷରୁ ଗୁରୁତ୍ୱାରୋପ କରାଯାଇଛି।
