ଚେନ୍ନାଇ,୨୬।୫: ଉଚ୍ଚ ନ୍ୟାୟାଳୟରେ ତାମିଲକୁ ଏକ ସରକାରୀ ଭାଷା ଭାବେ ସ୍ବିକୃତୀ ପ୍ରଦାନ କରାଯାଉ ବୋଲି ତାମିଲନାଡୁ ମୁଖ୍ୟମନ୍ତ୍ରୀ ଏମ୍.କେ ଷ୍ଟାଲିନ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦାବି କରିଛନ୍ତି। ଗୁରୁବାର ଏକ କାର୍ଯ୍ୟକ୍ରମରେ ଯୋଗଦେବା ପାଇଁ ପ୍ରଧାନମନ୍ତ୍ରୀ ମୋଦି ଚେନ୍ନାଇରେ ପହଞ୍ଚିଥିଲେ। ଏହି ସମୟରେ ଷ୍ଟାଲିନ୍ ମଧ୍ୟ ଉପସ୍ଥିତ ଥିଲେ। ସେଠାରେ ସେ ମୋଦିଙ୍କୁ ନିବେଦନ କରିଛନ୍ତି ଯେ, ତାମିଲକୁ ହାଇକୋର୍ଟରେ ଏକ ସରକାରୀ ଭାଷା ଭାବେ ଘୋଷଣା କରାଯାଉ। ଏଥିସହ ଷ୍ଟାଲିନ୍ କହିଛନ୍ତି, ଆମେ ବନ୍ଧୁତ୍ୱର ହାତ ବଢ଼ାଇବୁ, କିନ୍ତୁ ଆମର ଅଧିକାର ପାଇଁ ସ୍ବର ମଧ୍ୟ ଉତ୍ତୋଳନ କରିବୁ। ଆମର ଭାଷା ତାମିଲ ମଧ୍ୟ ହିନ୍ଦୀ ଭଳି ସମାନ ଅଧିକାର ପାଇବା ଉଚିତ। ଏହାକୁ ଏକ ଆନୁଷ୍ଠାନିକ ଭାଷା ଭାବରେ ମାନ୍ୟତା ଦିଆଯିବା ଉଚିତ। ହିନ୍ଦୀ ଭାଷା ପାଇଁ ଆମକୁ ବାଧ୍ୟ କରା ନ ଯାଉ ବୋଲି ଷ୍ଟାଲିନ୍ କହିଛନ୍ତି। ଏତଦ୍ ବ୍ୟତୀତ ନିଟ୍ ପରୀକ୍ଷାକୁ ମଧ୍ୟ ରଦ୍ଦ କରିବା ପାଇଁ ସେ ଦାବି କରିଛନ୍ତି। ନିଟ୍ ପରୀକ୍ଷାକୁ ଆମେ ବିରୋଧ କରୁଛୁ ଏବଂ ବିଧାନସଭାରେ ଏନେଇ ଏକ ବିଲ୍ ମଧ୍ୟ ପାସ କରାଯାଇଛି। ତାମିଲନାଡୁକୁ ନିଟ୍ ପରୀକ୍ଷାରୁ ମୁକ୍ତ କରିବାକୁ ପ୍ରଧାନମନ୍ତ୍ରୀଙ୍କୁ ନିବେଦନ କରିଛନ୍ତି ଷ୍ଟାଲିନ୍। ଅନ୍ୟପଟେ ପ୍ରଧାନମନ୍ତ୍ରୀ ମୋଦି ଷ୍ଟାଲିନ୍ଙ୍କ ଉତ୍ତର ରଖିବାକୁ ଯାଇ କହିଛନ୍ତି, ତାମିଲ ଭାଷା ଶାସ୍ବତ ଏବଂ ତାମିଲ ସଂସ୍କୃତି ବିଶ୍ୱବ୍ୟାପୀ। ଚେନ୍ନାଇରୁ କାନାଡା, ମଦୁରାଇରୁ ମାଲେସିଆ, ନମକ୍କଲରୁ ନ୍ୟୁୟର୍କ, ସାଲେମରୁ ଦକ୍ଷିଣ ଆଫ୍ରିକା ପର୍ଯ୍ୟନ୍ତ ପୋଙ୍ଗଲ ଏବଂ ପୁଥାଣ୍ଡୁ ଉତ୍ସବ ଅତି ଉତ୍ସାହର ସହିତ ପାଳନ କରାଯାଏ ବୋଲି ମୋଦି କହିଛନ୍ତି।
