ଭଦ୍ରକ ଅଫିସ, ୨୧।୧୦:ଉପନିର୍ବାଚନ ପାଇଁ ଦଳୀୟ ନିଷ୍ପତ୍ତି ବିରୋଧରେ ସ୍ବାଧୀନ ପ୍ରାର୍ଥୀ ହୋଇଥିବା ରାଜେନ୍ଦ୍ର ଦାସ (ରାଜୁ)ଙ୍କୁ ବିଜେଡିରୁ ବହିଷ୍କାର ପରେ ଧାମନଗର ରାଜନୀତିରେ ଉଷ୍ମତା ବଢ଼ିଯାଇଛି। ଦଳୀୟ ନିର୍ଦ୍ଦେଶାନାମା ଘୋଷଣା ପରେ ରାଜେନ୍ଦ୍ର ଏଥିରେ ବିଚଳିତ ନ ହୋଇ ନିଜ ପ୍ରଚାରକୁ ଆହୁରି ତ୍ୱରାନ୍ବିତ କରିଛନ୍ତି। ଦଳ ତାଙ୍କ ବିରୋଧରେ କ’ଣ କାର୍ଯ୍ୟାନୁଷ୍ଠାନ ନେଇଛି ସେଥିପ୍ରତି ଗୁରୁତ୍ୱ ନ ଦେଇ ନିର୍ବାଚନ କିପରି ଜିତିବେ ତାହା ତାଙ୍କ ପାଇଁ ବେଶୀ ଗୁରୁତ୍ୱ ବହନ କରୁଛି ବୋଲି ସେ କହିଛନ୍ତି। ଅପରପକ୍ଷେ ଦଳର କାର୍ଯ୍ୟାନୁଷ୍ଠାନ ପରେ ତାଙ୍କୁ ଖୋଲାଖୋଲି ସମର୍ଥନ କରୁଥିବା ବିଜେଡି ସମର୍ଥକମାନେ ଏବେ ପୂର୍ବ ଭଳି ରାଜୁଙ୍କ ସହ ସମର୍ଥନ ଜାହିର କରିବେ ନା ଦଳୀୟ ନିଷ୍ପତ୍ତି ପରେ ତାଙ୍କ ହାତ ଛାଡ଼ିଦେବେ ସେନେଇ ଚର୍ଚ୍ଚା ଆରମ୍ଭ ହୋଇଛି। ଦଳପ୍ରେମୀ ଭୋଟର ଓ ସମର୍ଥକ ଆଗାମୀ ଦିନରେ ରାଜୁଙ୍କୁ କେତେଦୂର ସମର୍ଥନ କରିବେ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଗୋଟିଏ ପଟେ ଭାଜପା ପ୍ରାର୍ଥୀ ସୂର୍ଯ୍ୟବଂଶୀ ସୂରଜଙ୍କ ପ୍ରତି ଅନୁକମ୍ପା ଭୋଟ ଓ ଅନ୍ୟପଟେ ବିଦ୍ରୋହୀ ରାଜେନ୍ଦ୍ରଙ୍କ ପ୍ରତି ଥିବା ସମର୍ଥନ ବିଜେଡିର ମୁଣ୍ଡବିନ୍ଧା ବଢ଼ାଇ ଦେଇଛି। ଏସବୁକୁ ପ୍ରତିହତ କରିବା ପାଇଁ ତୃଣମୂଳ ସଙ୍ଗଠନକୁ ଅଧିକ ସଶକ୍ତ କରିବାକୁ ଗୁରୁତ୍ୱ ଦେଉଛନ୍ତି ଦଳୀୟ ନେତୃବୃନ୍ଦ।
ଭାଜପା ପକ୍ଷରୁ ସୂର୍ଯ୍ୟବଂଶୀଙ୍କ ସହ ବିରୋଧୀ ଦଳ ନେତା ଜୟନାରାୟଣ ମିଶ୍ର, ବରିଷ୍ଠ ନେତା ମନମୋହନ ସାମଲ, ସାରସକଣା ବିଧାୟକ ଡା. ବୁଢ଼ାନ ମୁର୍ମୁଙ୍କ ସମେତ ନେତାମାନେ ଘର ଘର ବୁଲି ପ୍ରଚାର କରୁଛନ୍ତି। ସେହିପରି ରୋଡ୍ ଶୋ, କର୍ମୀ ସମ୍ମିଳନୀ କରି ଭୋଟରଙ୍କୁ ନିଜ ଆଡ଼କୁ ଆକୃଷ୍ଟ କରିବାରେ ଲାଗିଛି ବିଜେଡି। ମନ୍ତ୍ରୀ ପ୍ରୀତିରଞ୍ଜନ ଘଡ଼େଇ, ବିଜେଡି ଜିଲା ପର୍ଯ୍ୟବେକ୍ଷକ ପ୍ରଣବ ବଳବନ୍ତରାୟ, ଏମ୍ପି ମଞ୍ଜୁଲତା ମଣ୍ଡଳ, ବିଧାୟକ ପ୍ରଫୁଲ୍ଲ ସାମଲ, ସଞ୍ଜୀବ ମଲ୍ଲିକ, ଅମର ଶତପଥୀ, ଧାମନଗର ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳଙ୍କ ସମେତ ବହୁ ହେବିୱେଟ୍ ନେତା ପ୍ରାର୍ଥତ୍ନୀ ଅବନ୍ତୀଙ୍କ ପାଇଁ ରୋଡ୍ଶୋ ଓ କର୍ମୀ ସମ୍ମିଳନୀରେ ସାମିଲ ହେଉଛନ୍ତି। ଅନ୍ୟପକ୍ଷେ ପଛରେ ପଡ଼ିଯାଇଛି କଂଗ୍ରେସ। ପ୍ରାର୍ଥୀ ହରେକୃଷ୍ଣ ସେଠୀ ତାଙ୍କ ସମର୍ଥକଙ୍କ ସହ ଘର ଘର ବୁଲି ଭୋଟ ମାଗୁଥିବା ବେଳେ ଦଳର କୌଣସି ନେତା ତାଙ୍କ ସହ ଏପର୍ଯ୍ୟନ୍ତ ପ୍ରଚାର ମଇଦାନକୁ ଆସି ନ ଥିବା ଦେଖାଯାଇଛି। ସୂର୍ଯ୍ୟବଂଶୀଙ୍କ ପ୍ରତି ଥିବା ଅନୁକମ୍ପା ଓ ସ୍ବାଧୀନ ପ୍ରାର୍ଥୀ ରାଜେନ୍ଦ୍ରଙ୍କ ବିଦ୍ରୋହକୁ ବିଜେଡିର ରଣନୀତି କେତେଦୂର ମାତ୍ ଦେଇପାରିବ ନିର୍ବାଚନ ଫଳାଫଳ ପରେ ଜଣାପଡ଼ିବ ବୋଲି ଆଲୋଚନା ହେଉଛି।
