ତାଳଚେର,୧୦ା୨(ନି.ପ୍ର.) – ଅନୁଗୋଳ ଜିଲା ତାଳଚେରଠାରେ ଥିବା ମହାନଦୀ କୋଲ୍ ଫିଲଡ୍ସ ଲିମିଟେଡ (ଏମ୍ସିଏଲ୍) ବର୍ତ୍ତମାନ ସୁଦ୍ଧା ୧୨୦ ମିଲିୟନ ଟନ୍ କୋଇଲା ଉତ୍ତୋଳନ କରିସାରିଛି। ଏହି ଉତ୍ପାଦନ ହାର ବଜାୟ ରହିଲେ ଏମ୍ସିଏଲ୍ ଆଗାମୀ ଦିନରେ କୋଲ୍ ଇଣ୍ଡିଆ (ସିଆଇଏଲ୍)ର ୧ ନମ୍ବର କୋଇଲା କମ୍ପାନୀରେ ପରିଗଣିତ ହେବ ବୋଲି ସିଏମ୍ଡି ପ୍ରଭାତ କୁମାର ସିହ୍ନା ପ୍ରକାଶ କରିଛନ୍ତି।
ମଙ୍ଗଳବାର ଦିନିକିଆ ତାଳଚେର ଗସ୍ତରେ ଆସିଥିବା ସିଏମ୍ଡି ସିହ୍ନା ଲିଙ୍ଗରାଜ ଓପନକାଷ୍ଟ କୋଇଲା ଖଣି ପରିଦର୍ଶନ କରିବା ସହ ଉତ୍ପାଦନ, ପରିବହନର ସମୀକ୍ଷା କରିଥିଲେ। ବାର୍ଷିକ ଉପତ୍ାଦନ ଲକ୍ଷ୍ୟ ହାସଲ ପାଇଁ ଅଧିକାରୀମାନଙ୍କୁ ସେ ନିର୍ଦ୍ଦେଶ ଦେବା ସହିତ ତଦ୍ଜନିତ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଥିଲେ। ପରେ ଖବରଦାତାଙ୍କ ସହ ଆଲୋଚନା ବେଳେ ଚଳିତ ଆର୍ଥତ୍କ ବର୍ଷରେ ଏମ୍ସିଏଲ୍ ପାଇଁ ୧୬୦ ମିଲିୟନ ଟନ୍ କୋଇଲା ଉତ୍ପାଦନ ନିମନ୍ତେ ଲକ୍ଷ୍ୟଧାର୍ଯ୍ୟ କରାଯାଇଥିବା ପ୍ରକାଶ କରିଥିଲେ। ସେ କହିଥିଲେ, ଚଳିତବର୍ଷ ଏମ୍ସିଏଲ୍ ୧୫୦ ମିଲିୟନ ଟନ୍ରୁ ଅଧିକ ଉତ୍ତୋଳନ କରିବ। ସେଥିରୁ ଏବେ ସୁଦ୍ଧା ୧୨୦.୫୯ ମିଲିୟନ ଟନ୍ ଉତ୍ତୋଳନ ହୋଇସାରିଛି। ଆଗାମୀ ଦିନରେ ଏମ୍ସିଏଲ୍ ବିଭିନ୍ନ ଖଣିରୁ କୋଇଲା ଉପତ୍ାଦନ ବୃଦ୍ଧି ପାଇଁ ଚେଷ୍ଟା ଜାରି ରଖିବ। ଅନୁଗୋଳ, ଝାରସୁଗୁଡା, ସୁନ୍ଧରଗଡ଼ ଅଞ୍ଚଳରୁ ଦୈନିକ ୫.୭୦ ଲକ୍ଷ ଟନ୍ କୋଇଲା ଉତ୍ପାଦନ ପାଇଁ ଧାର୍ଯ୍ୟ ହୋଇଥିବା ବେଳେ ୫.୩୦ ଲକ୍ଷ ଟନ୍ ଉତ୍ତୋଳନ ହେଉଛି। ତାଳଚେର ଅଞ୍ଚଳରେ ବିପୁଳ କୋଇଲା ସଂରକ୍ଷିତ ରହିଛି। ଏହାର ସଦ୍ବିନିଯୋଗ କରାଗଲେ ଏହା ଭାରତର ସବୁଠାରୁ ବଡ଼ କୋଇଲା କ୍ଷେତ୍ର ହୋଇପାରିବ। ତେବେ ଜମି ସମସ୍ୟା ଯୋଗୁ ଖଣି କାର୍ଯ୍ୟରେ ବାଧାସୃଷ୍ଟି ହେଉଛି। ସମସ୍ୟାର ସମାଧାନ ପାଇଁ ରାଜ୍ୟ ସରକାରଙ୍କ ସହ ସମନ୍ବୟ ରଖାଯାଉଛି। ତେଣୁ ଜନସାଧାରଣ ସହଯୋଗ କରିବାକୁ ସିଏମ୍ଡି ସିହ୍ନା ନିବେଦନ କରିଥିଲେ। କରୋନା ଯୋଗୁ କୋଇଲା ଚାହିଦା ହ୍ରାସ ପାଇବା ଚିନ୍ତାଜନକ। ଟ୍ରକ୍ ମାଲିକଙ୍କ ସମସ୍ୟା ସମ୍ପର୍କରେ ଏମ୍ସିଏଲ୍ ଅବଗତ ଅଛି ଓ ସମାଧାନ ପାଇଁ ପଦକ୍ଷେପ ନେଉଛି। ସିଏମ୍ଡିଙ୍କ ଏହି ଗସ୍ତ ବେଳେ ଏମ୍ସିଏଲ୍ର ଡାଇରେକ୍ଟର ଟେକ୍ନିକାଲ ଓ.ପି. ସିଂହଙ୍କ ସମେତ ବିଭିନ୍ନ ବରିଷ୍ଠ ପଦାଧିକାରୀ ଓ ଜେନେରାଲ ମ୍ୟାନେଜରମାନେ ଉପସ୍ଥିତ ଥିଲେ।
