ଭୁବନେଶ୍ୱର,୧୦ା୧୦(ବ୍ୟୁରୋ): ପାର୍ବଣ ଭିଡ଼ ଓ ସଂକ୍ରମଣ ଏଡ଼ାଇବା ପାଇଁ ଗତବର୍ଷ ଭଳି ଚଳିତ ବର୍ଷ କଟକଣା ମଧ୍ୟରେ ଦୁର୍ଗାପୂଜା ପାଳନ ହେବ। ତେବେ ଦ୍ୱୈତନଗରୀ କଟକ ଓ ଭୁବନେଶ୍ୱରରେ ଶାନ୍ତିଶୃଙ୍ଖଳା ରକ୍ଷା ସହ ପୂଜା କଟକଣାକୁ କଡ଼ାକଡ଼ି କରିବ କମିଶନରେଟ ପୋଲିସ। ଏଥିପାଇଁ ପୋଲିସ ପୂରା ସଜାଗ ରହିଥିବାବେଳେ ଆସନ୍ତା ୧୧ ତାରିଖରୁ ନାଇଟ୍ କର୍ଫ୍ୟୁ ଲାଗୁ ହେବ। ରାତି ୮ରୁ ସକାଳ ୫ଟା ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ରହିବ। ଏହି ସମୟରେ ଦୋକାନ ବଜାର, ମଲ୍, ବାର୍ ଆଦି ବନ୍ଦ ରହିବ। ବିଶେଷକରି ବିଭିନ୍ନ ବାର୍ ଓ ହୋଟେଲରେ ଚାଲୁଥିବା ରେଭ୍ ପାର୍ଟି ଉପରେ କଡ଼ା ନଜର ରହିବ। ଯେଉଁମାନେ ଆଇନକୁ ହାତକୁ ନେବେ ଓ ଅମାନ୍ୟ କରିବେ ସେମାନଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ କହିଛନ୍ତି।
ଶନିବାର ପୋଲିସ ସେବା ଭବନରେ ଆୟୋଜିତ ଖବରଦାତା ସମ୍ମିଳନୀରେ କମିଶନର ପ୍ରିୟଦର୍ଶୀ କହିଛନ୍ତି, ସମସ୍ତ ଜୀବନ ଆମ ପାଇଁ ଗୁରୁତ୍ୱପୂର୍ଣ୍ଣ। ତେଣୁ ଜୀବନ ଆଗ ପାର୍ବଣ ପଛ। ପୂଜା ମଣ୍ଡପ ଚାରିପଟେ କପଡା ଢଙ୍କାଯିବା ସହ ୭ ଜଣରୁ ଅଧିକ ଲୋକ ପୂଜା ମଣ୍ଡପରେ ନ ରହିବାକୁ ସରକାରଙ୍କ ନିର୍ଦ୍ଦେଶ ରହିଛି। ସେହିପରି ପୂଜା ମଣ୍ଡପ ଭିତରେ ଆଲୋକ ସଜ୍ଜାରେ କୌଣସି କଟକଣା ରହିନାହିଁ। ମାତ୍ର ପୂଜା ମଣ୍ଡପ ବାହାରେ କୌଣସି ଆଲୋକ ତୋରଣ ସଜାଯିବ ନାହିଁ କି ଡାକବାଜି ଯନ୍ତ୍ର ବଜେଇ ପାରିବେ ନାହିଁ। ଏଥିସହ ପୂଜା ପରେ ଭସାଣି ନେଇ କୌଣସି ପ୍ରସେଶନ କରାଯିବ ନାହିଁ। କୋଭିଡ୍ କଟକଣା ଭିତରେ ଭସାଣି କିପରି ସୁରୁଖୁରୁରେ କରାଯିବ ସେ ନେଇ ସ୍ଥାନୀୟ ପ୍ରଶାସନ ନିଷ୍ପତ୍ତି ନେବ। ଅତୀତରେ ଆମେ ଟୁଇନ୍ ସିଟିବାସୀ ଯେପରି ଭାବେ କୋଭିଡ୍ କଟକଣା ଓ ନାଇଟ କର୍ଫ୍ୟୁକୁ ପାଳନ କରୁଥିଲେ, ଚଳିତଥର ସମାନ ଭାବେ କଡାକଡି ପାଳନ କରିବା। ଏହାର ଏକମାତ୍ର ଲକ୍ଷ୍ୟ ହେଉଛି କୋଭିଡ୍ ମହାମାରୀର ପ୍ରକୋପକୁ କିପରି ହ୍ରାସ କରିବା। ଏବେବି ଅନେକ ସ୍ଥାନରେ କୋଭିଡ୍ ମାମଲା ଦେଖିବାକୁ ମିଳୁଛି। ତେଣୁ ଟୁଇନ୍ ସିଟିବାସୀ ସାମାଜିକ ଦୂରତା ଓ ମାସ୍କ ପିନ୍ଧିବା ଉପରେ ଗୁରୁତ୍ୱ ଦେବାକୁ କମିଶନର ପ୍ରିୟଦର୍ଶୀ ଅନୁରୋଧ କରିଛନ୍ତି। ହେଲେ ଯେଉଁମାନେ ଅମାନିଆ ହେବେ, ରେଭ୍ ପାର୍ଟିରେ ଆଇନ ଉଲ୍ଲଂଘନ ହେଉ ବା ଦାଦାବଟି ଆଦାୟ ସହ ଆପରାଧିକ କାର୍ଯ୍ୟରେ ସଂପୃକ୍ତ ବ୍ୟକ୍ତିଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପୂର୍ବରୁ ମଧ୍ୟ ବହୁ ଉଲ୍ଲଂଘନକାର ବନ୍ଧା ହୋଇଛନ୍ତି। ଆଗକୁ ଆବଶ୍ୟକ ପଡ଼ିଲେ ଗିରଫ କରାଯିବ ବୋଲି ପୋଲିସ କମିଶନର ସୂଚନା ଦେଇଛନ୍ତି।
