ତାଇପେଇ, ୨୮ା୮: ଚାଇନା-ତାଇଓ୍ବାନ ମଧ୍ୟରେ ଉତ୍ତେଜନା ବୃଦ୍ଧି ପାଉଥିବାବେଳେ ଆମେରିକା ଏହି ଦ୍ୱୀପରାଷ୍ଟ୍ରକୁ ଅସ୍ତ୍ରଶସ୍ତ୍ର ଏବଂ ଯୁଦ୍ଧବାହନ ଦେବାକୁ ଚୁକ୍ତି କରିଛି। ତାଇଓ୍ବାନ ଏବଂ ଆମେରିକା ମଧ୍ୟରେ ୪.୫ କୋଟି ଡଲାରର ଡିଲ୍ ୬ ବର୍ଷ ପାଇଁ ସ୍ବାକ୍ଷରିତ ହୋଇଛି। ଅର୍ଥାତ୍ ୨୦୨୮ ପର୍ଯ୍ୟନ୍ତ ଓ୍ବାଶିଂଟନ୍ ତାଇପେଇକୁ ଗୋଳାବାରୁଦ ସହ ବିଭିନ୍ନ ପ୍ରକାର ଅସ୍ତ୍ରଶସ୍ତ୍ର ଯୋଗାଇବ। ଏଥିରେ ଆପାଚି ଏବଂ ବ୍ଲାକ୍ ହକ୍ ହେଲିକପ୍ଟର ସାମିଲ ରହିଛି। ଏ ନେଇ ତାଇଓ୍ବାନ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଏକ ବିବୃତିରେ କୁହାଯାଇଥିବା ତାଇପେଇ ଟାଇମ୍ସରେ ରିପୋର୍ଟ ପ୍ରକାଶ ପାଇଛି।
୩ରେ ଆମେରିକା କଂଗ୍ରେସ ସ୍ପିକର ନାନ୍ସି ପେଲୋସିଙ୍କ ତାଇଓ୍ବାନ ଗସ୍ତ ପରେ ଏହି ସ୍ବୟଂଶାସିତ ରାଷ୍ଟ୍ରକୁ ନିଜର ଦାବି କରିଆସୁଥିବା ଚାଇନା ଆକ୍ରମଣାତ୍ମକ ହୋଇପଡ଼ିଛି। ତାଇଓ୍ବାନ ପ୍ରଣାଳୀ ନିକଟରେ ସମରାଭ୍ୟାସ ପରେ ଚାଇନାର ଯୁଦ୍ଧଜାହାଜ ବାରମ୍ବାର ତାଇପେଇ ସୀମା ଟପୁଛି। ଶକ୍ତିଶାଳୀ ଚାଇନାର ମୁକାବିଲା ପାଇଁ ତାଇଓ୍ବାନ ନିଜ ପ୍ରତିରକ୍ଷା ଶକ୍ତି ବୃଦ୍ଧି କରୁଛି। ଏହା ଭିତରେ ଗତ ସପ୍ତାହରେ ତାଇଓ୍ବାନରେ ଆମେରିକାନ୍ ଇନ୍ଷ୍ଟିଚ୍ୟୁଟ୍ ଏବଂ ତାଇପେଇ ସେନା ମଧ୍ୟରେ ଉପରୋକ୍ତ ଡିଲ୍ ହୋଇଛି। ଆସନ୍ତା ଡିସେମ୍ବରରୁ ୨୦୨୮ ଡିସେମ୍ବର ପର୍ଯ୍ୟନ୍ତ ଆମେରିକା ତାଇଓ୍ବାନକୁ ଅତ୍ୟାଧୁନିକ ଯୁଦ୍ଧାସ୍ତ୍ର ଯୋଗାଇବ।
ପ୍ରତିରକ୍ଷା ସାମଗ୍ରୀ, ଏନର୍ଜି ଏବଂ ଅନ୍ୟ ସମ୍ବଳ ଆମଦାନୀରେ ବାଧା ଉପୁଯାଇ ଚାଇନା ତାଇଓ୍ବାନର ସାମରିକ ଶକ୍ତିକୁ ଦୁର୍ବଳ କରିଦେବା ଉଦ୍ୟମ କରିପାରେ। ତେଣୁ ତାଇପେଇ ଏପରି ହେବା ପୂର୍ବରୁ ନିଜକୁ ଚାଇନା ସହ ମୁକାବିଲା ପାଇଁ ପ୍ରସ୍ତୁତ ରଖିବାକୁ ପଦକ୍ଷେପ ନେଉଛି। ଅତ୍ୟାଧୁନିକ ସେନା ହେଲିକପ୍ଟରରେ ପର୍ଯ୍ୟାପ୍ତ ପରିମାଣର ଅସ୍ତ୍ରଶସ୍ତ୍ର ଏବଂ ଯୁଦ୍ଧବାହନଗୁଡ଼ିକର ସ୍ପେୟାର ପାର୍ଟ୍ସ ଆଦି ମହଜୁଦ ରଖିବା ନିମନ୍ତେ ତାଇଓ୍ବାନ ଯୋଜନା କରିଛି। ସେହିପରି ସମସ୍ତ ସୈନ୍ୟବାହିନୀଙ୍କୁ ପର୍ଯ୍ୟାପ୍ତ ଯୁଦ୍ଧାସ୍ତ୍ର ଯୋଗାଇଦେବା ନିମନ୍ତେ ଓ୍ବାଶିଂଟନ୍ ଓ ତାଇପେଇ ମଧ୍ୟରେ ଅଧିକ ଚୁକ୍ତି ହେବା ନେଇ ଆଲୋଚନା ଜାରି ରହିଛି। ୨୦୧୭ରୁ ଆମେରିକା ତାଇଓ୍ବାନକୁ ଯୁଦ୍ଧାସ୍ତ୍ର ଯୋଗାଣ ପାଇଁ ୧୮ ବିଲିୟନ ଡଲାରର ଚୁକ୍ତି କରିଛି।
