ନୂଆଦିଲ୍ଲୀ,୨୪ା୪: ମହାମାରୀ କରୋନା ନାହିଁ ନ ଥିବା ସଙ୍କଟ ସୃଷ୍ଟି କରିଛି। ଦେଶର ହସ୍ପିଟାଲଗୁଡ଼ିକରେ ବେଡ୍, ଅକ୍ସିଜେନ, ଇଞ୍ଜେକ୍ସନ ଓ ଅନ୍ୟ ଜରୁରୀ ଔଷଧର ଘୋର ଅଭାବ ଦେଖାଦେଇଛି। ଉଭୟ କେନ୍ଦ୍ର ଓ ରାଜ୍ୟ ସରକାରମାନେ ଯେତେ ଉଦ୍ୟମ କଲେ ମଧ୍ୟ କିଛି ସୁଫଳ ମିଳିପାରୁ ନାହିଁ। ଏଭଳି ସ୍ଥିତିରେ ଯୁଦ୍ଧକାଳୀନ ଭିତ୍ତିରେ ଖାଲି ଅକ୍ସିଜେନ ଟ୍ୟାଙ୍କରଗୁଡ଼ିକୁ ଫିଲିଂ କରିବା ଲାଗି ଭାରତୀୟ ବାୟୁସେନା (ଆଇଏଏଫ୍)ର ସହାୟତା ନେବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଅକ୍ସଜେନ ଏକ୍ସପ୍ରେସ୍ରେ ଅମ୍ଳଜାନ ଟ୍ୟାଙ୍କରଗୁଡ଼ିକୁ ବିଭିନ୍ନ ରାଜ୍ୟକୁ ପଠାଯାଉଥିବାବେଳେ ବାୟୁସେନା ହେଲିକପ୍ଟର ଓ ବିମାନରେ ମଧ୍ୟ କେତେକ ସହରକୁ ପରିବହନ କରାଯାଇଥିବା ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ମନ୍ତ୍ରଣାଳୟ ପକ୍ଷରୁ ଶୁକ୍ରବାର କୁହାଯାଇଛି ଯେ, ଦେଶରେ କ୍ରମବର୍ଦ୍ଧିଷ୍ଣୁ ଚାହିଦାକୁ ଦୃଷ୍ଟିରେ ରଖି ଜର୍ମାନୀରୁ ୨୩ଟି ମୋବାଇଲ୍ ଅକ୍ସିଜେନ ଉତ୍ପାଦନକାରୀ ପ୍ଲାଣ୍ଟ ବିମାନରେ ଅଣାଯିବ। ପ୍ରତି ପ୍ଲାଣ୍ଟ ମିନିଟ ପିଛା ୪୦ ଲିଟର ଅକ୍ସିଜେନ ଉତ୍ପାଦନ କରିବ। ସେହିପରି ଏହାର ଘଣ୍ଟାପ୍ରତି ଉତ୍ପାଦନ କ୍ଷମତା ହେଉଛି ୨,୪୦୦ ଲିଟର। ଏହି ପ୍ଲାଣ୍ଟଗୁଡ଼ିକୁ ସଶସ୍ତ୍ର ବଳ ମେଡିକାଲ ସର୍ଭିସେସ୍ (ଏଏଫ୍ଏମ୍ଏସ୍) ହସ୍ପିଟାଲଗୁଡ଼ିକରେ କୋଭିଡ୍ ରୋଗୀଙ୍କ ଚିକିତ୍ସା ପାଇଁ ଉପଯୋଗ କରାଯିବ ବୋଲି ପ୍ରତିରକ୍ଷା ମନ୍ତ୍ରଣାଳୟର ପ୍ରମୁଖ ମୁଖପାତ୍ର ଏ. ଭାରତ ଭୂଷଣ ସୂଚନା ଦେଇଛନ୍ତି। ଭାରତରେ କରୋନା ରୋଗୀ ଅଣନିଃଶ୍ୱାସୀ ହୋଇ ମରୁଥିବାବେଳେ ଏଠାକାର ସାମଗ୍ରିକ ସ୍ଥିତିକୁ ଦେଖି ସହାୟତା ପାଇଁ ପଡ଼ୋଶୀ ଚାଇନା ଆଗ୍ରହ ପ୍ରକାଶ କରିଛି। ଭାରତକୁ ଯାହା ସାହାଯ୍ୟ ସହଯୋଗ ଦରକାର ଆମେ ଯୋଗାଇବାକୁ ପ୍ରସ୍ତୁତ ବୋଲି ଚାଇନା ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଓ୍ବାଙ୍ଗ୍ ଓ୍ବେନ୍ବିନ୍ କହିଛନ୍ତି।
