ମୁମ୍ବାଇ: ବଲିଉଡ୍ ନାୟକ ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟାକୁ ନେଇ ପ୍ରତିଦିନ ହୁଏତ କିଛି ନା କିଛି ରୋଚକ ତଥ୍ୟ ଆସୁଛି ସାମ୍ନାକୁ। ଏବେ ଅଭିନେତା ଶେଖର ସୁମନ କହିଛନ୍ତି ସୁଶାନ୍ତ ଆତ୍ମହତ୍ୟା କରି ନାହାନ୍ତି ବରଂ ତାଙ୍କୁ ହତ୍ୟା କରାଯାଇଛି। ନିକଟରେ ସେ ସୁଶାନ୍ତଙ୍କ ଘରକୁ ଯାଇ ତାଙ୍କ ପରିବାର ସଦସ୍ୟଙ୍କୁ ଭେଟିବା ସହ ଏମିତି ଅଭିଯୋଗ ଆଣିଛନ୍ତି। ଏହାସହ ସୁଶାନ୍ତଙ୍କ ମୃତ୍ୟୁର ସିବିଆଇ ତଦନ୍ତ ମଧ୍ୟ ଦାବି କରିଛନ୍ତି। ଏହାପୂର୍ବରୁ ମଧ୍ୟ କେତେଜଣ ରାଜନେତା ଓ ସେଲିବ୍ରିଟି ସୁଶାନ୍ତଙ୍କ ମୃତ୍ୟୁର ସିବିଆଇ ତଦନ୍ତ ଦାବି କରିଥିଲେ। ଏଥର ଶେଖର ସୁମନ କହିଛନ୍ତି ସୁଶାନ୍ତଙ୍କ ସହ ଏମିତି କ’ଣ ଘଟିଥିଲା କି ଯେଉଁଥିପାଇଁ ସେ ଗୋଟିଏ ମାସ ମଧ୍ୟରେ ୫୦ ଥର ନିଜ ସିମ୍କାର୍ଡ ବଦଳାଇଥିଲେ। ଏହାସହ ରାତିରେ ଯିଏ ପାର୍ଟି କରୁଛି, ସକାଳୁ ଉଠି ପ୍ଲେ ଷ୍ଟେଶନ ଯାଉଛି, ସକାଳୁ ସକାଳୁ ଗୋଟି ଏ ଗ୍ଲାସ ଜୁସ୍ ମଗାଇଥିଲେ ତାଙ୍କ ମନରେ ଏମିତି କି ବିତୃଷ୍ଣା ଆସିଲା ଯେ ସେ ଆତ୍ମହତ୍ୟା ନିଷ୍ପତ୍ତି ନେଲେ। ଆହୁରି ମଧ୍ୟ ସୁଶାନ୍ତ ଯେଉଁ ଘରେ ଆତ୍ମହତ୍ୟା କରିଛନ୍ତି ସେଠାରେ ଆତ୍ମହତ୍ୟା କରିବା ଏତେ ସହଜ ନୁହେଁ। କାରଣ ମୁମ୍ବାଇରେ ଘରର ଛାତ ଏତେ ଉଚ୍ଚ ନୁହେଁ। ଆଉ ଜଣେ ନିଜ ବେଡ୍ ଉପରେ ଚଢି ଆତ୍ମହତ୍ୟା କରିବା ସମ୍ଭବ ନୁହେଁ। କାରଣ ଏହି ଛାତର ଉଚ୍ଚତା ହିଁ ୬ ଫୁଟ ତେଣୁ ଜଣେ ବେଡ୍ ଉପରେ ଚଢି କେବେବି ଝୁଲି ପାରିବ ନାହିଁ ବୋଲି ଶେଖର କହିଛନ୍ତି। ତେଣୁ ସୁଶାନ୍ତଙ୍କ ମୃତ୍ୟୁ ପଛର କାହାଣୀ ଲୋକ ଲୋଚନକୁ ଆଣିବାକୁ ସେ ସିବିଆଇ ତଦନ୍ତ ଦାବି କରିଛନ୍ତି।
