ନୂଆପଡ଼ା,୫ା୬ (ମକାରୁ ବେମାଲ):ନୂଆପଡ଼ା ଜିଲାପାଳ ମଧୁସୂଦନ ଦାଶଙ୍କ ନିର୍ଦ୍ଦେଶରେ ଧାନର ଅବୈଧ ମହଜୁଦ ଓ ଆନ୍ତଃ ରାଜ୍ୟ ଚୋରା ଚାଲାଣ ବିରୋଧରେ ଜିଲା ପ୍ରଶାସନ ପକ୍ଷରୁ ଯାଞ୍ଚ ଜାରି ରହିଛି। ଏହି କ୍ରମରେ ଦୁଇଟି ପୃଥକ୍ ଘଟଣାରେ ମୋଟ ୪୬.୩୦ କୁଇଣ୍ଟାଲ ଧାନ ଜବତ କରାଯାଇଛି। ପ୍ରଥମ ଘଟଣାରେ ସିନାପାଲି ବ୍ଲକ ଅନ୍ତର୍ଗତ ଛତିଶଗଡ଼-ଓଡ଼ିଶା ସୀମାନ୍ତ ସିଂଘଝର ଗ୍ରାମରେ ଚଢ଼ାଉ କରାଯାଇ ସୁରେଶ ମାଝୀଙ୍କ ଘରୁ ୬୪ଟି ବସ୍ତାରେ ଗଚ୍ଛିତ ୨୭.୨୦ କୁଇଣ୍ଟାଲ ଧାନ ଜବତ କରାଯାଇଥିଲା। ଅତିରିକ୍ତ ତହସିଲଦାର ନୂଆପଡ଼ା ଜଗଜୀବନ ମାଝୀଙ୍କ ନେତୃତ୍ୱରେ ଏସିଏସ୍ଓ ସଦର ନୂଆପଡ଼ା ହୃଷୀକେଶ ନାଏକ, ଯୋଗାଣ ନିରୀକ୍ଷକ ସିନାପାଲି ଦେବେନ୍ଦ୍ର ସେଠୀଆ, ଯୋଗାଣ ନିରୀକ୍ଷକ ବୋଡ଼େନ ଆଲୋକ ପାତ୍ର ଏବଂ ଯୋଗାଣ ନିରୀକ୍ଷକ ଖଡ଼ିଆଳ ସୌମ୍ୟରଞ୍ଜନ ମହାନନ୍ଦ ପ୍ରମୁଖ ସାମିଲ ହୋଇଥିଲେ। ଦ୍ୱିତୀୟ ଘଟଣାରେ ନୂଆପଡ଼ା ବ୍ଲକ ଧରମବନ୍ଧା ଅଞ୍ଚଳରେ ଯାଞ୍ଚ ସମୟରେ ଛତିଶଗଡ଼ ପଞ୍ଜିକରଣ ସଂଖ୍ୟା ସିଜି ୦୬ ଜିଏକ୍ସ ୮୫୫୪ ବିଶିଷ୍ଟ ଏକ ଗାଡ଼ିରୁ ୬୦ଟି ବସ୍ତାରେ ଥିବା ୧୯.୧୦ କୁଇଣ୍ଟାଲ ଧାନ ଜବତ କରାଯାଇଥିଲା। କସ୍ତୁଭ ଶାହାଙ୍କ ନେତୃତ୍ୱରେ ଯୋଗାଣ ନିରୀକ୍ଷକ ନୂଆପଡ଼ା ଶୁଭଶ୍ରୀ ଦାସ ଚଢାଉରେ ସାମିଲ ହୋଇଥିଲେ।
Dharitri – Odisha’s No.1 Odia Daily
