ନୂଆଦିଲ୍ଲୀ,୨୮।୨: ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଗିରଫ ହୋଇ ସିବିଆଇ ରିମାଣ୍ଡରେ ଥିବା ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ତଥା ଏଏପି ନେତା ମନୀଷ ସିସୋଡିଆ ଜାମିନ ଲାଗି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସିବିଆଇ ତଦନ୍ତ ତଥା ଗିରଫଦାରୀକୁ ଚ୍ୟାଲେଞ୍ଜ କରି ସେ ଜାମିନ ଲାଗି ଆବେଦନ କରିଥିଲେ। ହେଲେ ତାଙ୍କ ଆବେଦନ ଶୁଣିବାକୁ ମନା କରି ସୁପ୍ରିମକୋର୍ଟ ସିସୋଡିଆଙ୍କୁ ହାଇକୋର୍ଟଙ୍କ ନିକଟକୁ ଯିବାକୁ ପରାମର୍ଶ ଦେଇଛନ୍ତି।
ସୁପ୍ରିମକୋର୍ଟ ଜାମିନ ପାଇଁ ସିଧାସଳଖ ଏଠାକୁ କାହିଁକି ଆସିଥିବା ନେଇ ସିସୋଡିଆଙ୍କୁ ପ୍ରଶ୍ନ କରିଛନ୍ତି। ଏପରିକି ସେ ହାଇକୋର୍ଟକୁ ଯିବା ଉଚିତ ବୋଲି କହିବା ସହ ଏହି ମାମଲାରେ ହସ୍ତକ୍ଷେପ କରିବାକୁ ସୁପ୍ରିମକୋର୍ଟ ସମ୍ପୂର୍ଣ୍ଣ ଭାବେ ମନା କରି ଦେଇଛନ୍ତି। କାରଣ ଏହି ମାମଲା ଦୁର୍ନୀତି ନିବାରଣ ଆଇନ ବିଷୟରେ। ବିନୋଦ ଦୁଆଙ୍କ ମାମଲା ବହୁତ ଭିନ୍ନ ଥିଲା। ଏହା ଏକ ଦୁର୍ନୀତି ମାମଲା ହୋଇଥିବାରୁ ହାଇକୋର୍ଟକୁ ଯାଆନ୍ତୁ ବୋଲି ପ୍ରଧାନ ବିଚାରପତି କହିଛନ୍ତି।
କହିରଖୁଛୁ, ସିସୋଡିଆଙ୍କ ଓକିଲ ଅଭିଷେକ ସିଂଭି ସୁପ୍ରିମକୋର୍ଟରେ ଶୁଣାଣି ସମୟରେ ବିନୋଦ ଦୁଆ ମାମଲାର ନିଷ୍ପତ୍ତି ବିଷୟ ଉଲ୍ଲେଖ କରିଥିଲେ।
