ନୂଆଦିଲ୍ଲୀ,୨୮।୨ : ମଦ ଦୁର୍ନୀତିରେ ଧରାପଡିଥିବା ମନୀଷ ସିସୋଡିଆ ଦିଲ୍ଲୀ ସରକାରଙ୍କ ଉପମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ତାଙ୍କ ସହ ନଅ ମାସ ଧରି ତିହାର ଜେଲରେ ରହିଥିବା ଦିଲ୍ଲୀ ସରକାରଙ୍କ ଆଉ ଜଣେ ବଳିଷ୍ଠ ମନ୍ତ୍ରୀ ସତ୍ୟେନ୍ଦ୍ର ଜୈନ ମଧ୍ୟ ଇସ୍ତଫା ଦେଇଛନ୍ତି। ଦଳର ନିର୍ମଳ ଭାବମୂର୍ତ୍ତିକୁ ବଞ୍ଚାଇବା ପାଇଁ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ତାଙ୍କ ମନ୍ତ୍ରୀଙ୍କଠାରୁ ଏହି ଇସ୍ତଫା ନେଇଛନ୍ତି ବୋଲି ରାଜନୈତିକ ସମୀକ୍ଷକମାନେ ମତପୋଷଣ କରିଛନ୍ତି। ଦଳ ବିରୋଧ କେନ୍ଦ୍ରର ଭାଜପା ସରକାରଙ୍କ ପକ୍ଷରୁ କରାଯାଇଥିବା ଆକ୍ରମଣ ପରେ କେଜରିଓ୍ବାଲ କ୍ଷତି ପରିଚାଳନା ପ୍ରସ୍ତୁତି ଆରମ୍ଭ କରିଛନ୍ତି।
ସିସୋଡିଆ ମଦ ଦୁର୍ନୀତିରେ ଧରାପଡ଼ିବା ପରେ ଆମ ଆଦମୀ ପାର୍ଟିର ଭାବମୂର୍ତ୍ତି ଖରାପ ହୋଇଯାଇଥିଲା ବୋଲି ଚର୍ଚ୍ଚା ହେଉଛି। ଏହା ଯୋଗୁ କେଜରିୱାଲଙ୍କ ଭାବମୂର୍ତ୍ତି ମଧ୍ୟ ପ୍ରଭାବିତ ହେଉଥିଲା। ପ୍ରତ୍ୟେକ ଗଣମାଧ୍ୟମ ସମ୍ମିଳନୀରେ ଭାଜପା କେଜରିୱାଲଙ୍କ ଉପରେ ଆକ୍ରମଣ କରି କହୁଥିଲା ଯେ ଆନ୍ଦୋଳନ ଦିନରୁ କେଜରିୱାଲ କହିଥିଲେ ଯେ ଯଦି କୌଣସି ଅଭିଯୋଗ ଆସେ ତେବେ ତାଙ୍କ ଦଳର ନେତା ତୁରନ୍ତ ଇସ୍ତଫା ଦେବେ। ମାତ୍ର ୯ ମାସ ଧରି ଜେଲରେ ଥିବା ମନ୍ତ୍ରୀଙ୍କୁ ସେ କାହିଁକି କ୍ୟାବିନେଟରୁ ହଟାଉ ନାହାନ୍ତି ବୋଲି ଭାଜପା ପ୍ରଶ୍ନ କରୁଥିଲା।
ସିସୋଡିଆ ଗିରଫ ହେବା ପରେ ଭାଜପା ଏହି ଆକ୍ରମଣକୁ ବୃଦ୍ଧି କରିଥିଲା। ସିସୋଡିଆଙ୍କ ଶିକ୍ଷା ମନ୍ତ୍ରୀ ତଥା ମଦ ବିଭାଗ ମନ୍ତ୍ରୀ ହେବା ନେଇ ଭାଜପା କଟାକ୍ଷ କରୁଥିଲା। ଆଗାମୀ ଦିନରେ ଏକ ଅଭିଯାନ ଚଳାଇ ଦିଲ୍ଲୀର ପ୍ରତ୍ୟେକ ଘରେ ଘରେ ମଦ ଦୁର୍ନୀତିକୁ ପହଞ୍ଚାଇବା ନେଇ ଭାଜପା ଯୋଜନା କରିଥିଲା। ଏଥିରୁ ସ୍ପଷ୍ଟ ଯେ ଏହା ଏଏପିର ଦଳୀୟ ଭାବମୂର୍ତ୍ତି ଉପରେ ନକାରାତ୍ମକ ପ୍ରଭାବ ପକାଉଥିଲା।
ମଙ୍ଗଳବାର ଏକ ଗଣମାଧ୍ୟମ ସମ୍ମିଳନୀରେ ଭାଜପା ନେତା ସୁଦର୍ଶନ ତ୍ରିବେଦୀ କହିଥିଲେ ଯେ କେଜରିୱାଲ ଏକ ନୂଆ ପ୍ରକାରର ରାଜନୀତି କରିବା ବିଷୟରେ କହୁଥିଲେ, କିନ୍ତୁ ବର୍ତ୍ତମାନ ତାଙ୍କର ଏକ ତୃତୀୟାଂଶ ମନ୍ତ୍ରୀ ଜେଲରେ ଅଛନ୍ତି ଏବଂ ମନ୍ତ୍ରୀମାନେ ଜେଲରୁ ସରକାରୀ କାର୍ଯ୍ୟ କରୁଛନ୍ତି। ବୋଧହୁଏ ଦିଲ୍ଲୀ ସରକାରଙ୍କୁ ଜେଲରୁ ସରକାରୀ କାମ ଚଳାଇ ଏକ ନୂତନ ପରମ୍ପରା ପ୍ରତିଷ୍ଠା କରିବାକୁ ଚାହୁଁଛନ୍ତି। ଭାଜପା ନେତାଙ୍କ ଏହି ଅପମାନ ଭରା କଟାକ୍ଷ ଆମ ଆଦମୀ ପାର୍ଟିକୁ ଉପରେ ଖରାପ ପ୍ରଭାବ ପକାଉଥିଲା।
ଏହି ପ୍ରସଙ୍ଗରେ ଭାଜପା ନେଇଥିବା ଆକ୍ରମଣାତ୍ମକ ଆଭିମୁଖ୍ୟ ଯୋଗୁ ଆମ ଆଦମୀ ଦଳର ଭାବମୂର୍ତ୍ତିକୁ ନକାରାତ୍ମକ ଭାବେ ପ୍ରଭାବିତ ହେଉଥିଲା। ଏହା ଦଳର ଆଗାମୀ ନିର୍ବାଚନ ଯୋଜନା ଉପରେ ମଧ୍ୟ ପ୍ରଭାବ ପକାଇପାରେ ବୋଲି ଆଶଙ୍କା ଦେଖାଦେଇଥିଲା। ଏହି କାରଣରୁ କେଜରିୱାଲ ତାଙ୍କର ଦୁଇ ବରିଷ୍ଠ ମନ୍ତ୍ରୀଙ୍କ ଇସ୍ତଫାକୁ ଗ୍ରହଣ କରି କ୍ଷତି ପରିଚାଳନା କରିଥିବା କୁହାଯାଉଛି।
