ନୂଆଦିଲ୍ଲୀ,୩ା୩: ଦୃଷ୍ଟିବାଧିତ ବ୍ୟକ୍ତିମାନଙ୍କୁ ନ୍ୟାୟିକ ସେବାରେ ନିଯୁକ୍ତି ପ୍ରଦାନକୁ ମନା କରାଯାଇପାରିବ ନାହିଁ। କେବଳ ଦୃଷ୍ଟିବାଧିତ ନୁହନ୍ତି, ଯେକୌଣସି ଦିବ୍ୟାଙ୍ଗ ବ୍ୟକ୍ତିଙ୍କୁ ତାଙ୍କ ଶାରୀରିକ ଭିନ୍ନକ୍ଷମତାକୁ ଆଳକରି ନ୍ୟାୟିକ ସେବାରେ ନିଯୁକ୍ତିରୁ ବାଦ୍ ଦିଆଯିବା ଅନୁଚିତ ବୋଲି ସୁପ୍ରିମକୋର୍ଟ ସୋମବାର ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଏଥିସହ ମଧ୍ୟପ୍ରଦେଶ ସରକାରଙ୍କ ଏ ସମ୍ପର୍କିତ ଏକ କଟକଣାକୁ ଅଦାଲତ ଖାରଜ କରିଦେଇଛନ୍ତି।
କିଛି ରାଜ୍ୟର ନ୍ୟାୟିକ ସେବାରେ ଦିବ୍ୟାଙ୍ଗ ବ୍ୟକ୍ତିମାନଙ୍କୁ ସଂରକ୍ଷଣ ଦେବାକୁ ମନା କରାଯାଇଥିଲା। ଏହାକୁ ଚ୍ୟାଲେଞ୍ଜ କରି ୫ଟି ପିଟିଶନ ଆବେଦନକାରୀଙ୍କ ପକ୍ଷରୁ ଦାଖଲ କରାଯାଇଥିବାବେଳେ ସୁପ୍ରିମକୋର୍ଟ ମଧ୍ୟପ୍ରଦେଶ ସେବା ପରୀକ୍ଷା (ନିଯୁକ୍ତି ଓ ସେବା ସର୍ତ୍ତ) ରୁଲ୍ସ ୧୯୯୪ର ନିୟମ ୬ଏ ଏବଂ ୭କୁ ନେଇ ନିଜ ଆଡ଼ୁ ଗୋଟିଏ ମାମଲା ରୁଜୁ କରିଥିଲେ। ସ୍ବଳ୍ପ ଦୃଷ୍ଟିଶକ୍ତି ସମ୍ପନ୍ନ ଓ ଆଦୌ ଦେଖି ପାରୁ ନ ଥିବା ପ୍ରାର୍ଥୀଙ୍କୁ ବିଚାର ବିଭାଗରେ ନିଯୁକ୍ତି ଦିଆଯାଇପାରିବ ନାହିଁ ବୋଲି ଉପରୋକ୍ତ ନିୟମରେ ଉଲ୍ଲେଖ ରହିଛି।
ଜଷ୍ଟିସ୍ ଜେ.ବି. ପରର୍ଦିଓ୍ବାଲା ଏବଂ ଆର୍. ମହାଦେବନ୍ଙ୍କୁ ନେଇ ଗଠିତ ଖଣ୍ଡପୀଠ ଗତ ଡିସେମ୍ବର ୩ (ଅନ୍ତର୍ଜାତୀୟ ଭିନ୍ନକ୍ଷମ ଦିବସ)ରେ ଏହି ସମସ୍ତ ମାମଲାର ଶୁଣାଣି ଶେଷକରି ରାୟ ସଂରକ୍ଷିତ ରଖିଥିଲେ। ସୋମବାର ସୁପ୍ରିମକୋର୍ଟ ଏହା ଉପରେ ରାୟ ଶୁଣାଇ କହିଛନ୍ତି, ଚୟନ ପ୍ରକ୍ରିୟାରେ ସାମିଲ ହୋଇଥିବା ପର୍ସନ୍ସ ଓ୍ବିଦ୍ ଡିଜାବିଲିଟିଜ୍ (ପିଡବ୍ଲ୍ୟୁଡି) ପ୍ରାର୍ଥୀମାନେ ନ୍ୟାୟିକ ସେବାରେ ନିଯୁକ୍ତି ପାଇଁ ଯୋଗ୍ୟ। ସେମାନେ ପରୀକ୍ଷାରେ ଉତ୍ତୀର୍ଣ୍ଣ ହେଲେ ଖାଲି ପଦବୀରେ ସେମାନଙ୍କୁ ନିଯୁକ୍ତି ଦିଆଯାଇପାରିବ। ଭିନ୍ନକ୍ଷମମାନେ କୌଣସି ଭେଦଭାବର ସମ୍ମୁଖୀନ ହେବା ଅନୁଚିତ ନୁହେଁ।
ରାଜ୍ୟଗୁଡ଼ିକ ଏଭଳି ବ୍ୟକ୍ତିଙ୍କ ନିଯୁକ୍ତି ସକାଶେ ସମାବେଶୀ ଢାଞ୍ଚା ପ୍ରସ୍ତୁତ ପାଇଁ ସକାରାମତ୍କ ପଦକ୍ଷେପ ନେବା ଜରୁରୀ। କୌଣସି ଆଶାୟୀଙ୍କୁ କେବଳ ଭିନ୍ନକ୍ଷମତା ଆଧାରରେ ନିଯୁକ୍ତି ପ୍ରଦାନରୁ ମନା କରାଯାଇପାରିବ ନାହିଁ। ପର୍ସନ୍ସ ଓ୍ବିଦ୍ ଡିଜାବିଲିଟିଜ୍ ଆକ୍ଟ, ୨୦୧୬ରେ ପ୍ରଦତ୍ତ ଅଧିକାର ବଳରେ ସରକାର ସେମାନଙ୍କୁ ଚାକିରି ଦେବେ ବୋଲି ଖଣ୍ଡପୀଠ କହିଛନ୍ତି। ପ୍ରକାଶ ଯେ, ଗତବର୍ଷ ନଭେମ୍ବର ୭ରେ ଖଣ୍ଡପୀଠ ସାରା ଦେଶର ନ୍ୟାୟିକ ସେବା ନିଯୁକ୍ତିରେ ଦିବ୍ୟାଙ୍ଗଙ୍କୁ ସମାନ ସୁଯୋଗ ପ୍ରଦାନକୁ ସୁନିଶ୍ଚିତ କରିବା ପାଇଁ ଅନେକ ନିର୍ଦ୍ଦେଶନାମା ଜାରି କରିଥିଲେ।
