ଭୁବନେଶ୍ୱର,୧୬।୩(ବ୍ୟୁରୋ): ଭୁବନେଶ୍ୱର ମହାନଗର ନିଗମ(ବିଏମ୍ସି) ନିର୍ବାଚନରେ ବିଜେଡି ଅସନ୍ତୁଷ୍ଟ ପ୍ରାର୍ଥୀଙ୍କ ଉପରେ ସମସ୍ତଙ୍କ ନଜର ରହିଛି। ୩୫ ନମ୍ବର ଓ୍ବାର୍ଡରୁ ବିଜେଡି ଟିକେଟରୁ ବଞ୍ଚତ୍ତ ହୋଇ ସ୍ବାଧୀନ ପ୍ରାର୍ଥୀ ହୋଇଥିବା ସୁମିତା ସିଟ୍ଙ୍କୁ ନେଇ ଏବେ ଚର୍ଚ୍ଚା ଜୋର୍ ଧରିଛି। ସୁମିତା ହେଉଛନ୍ତି ପୂର୍ବତନ କର୍ପୋରେଟର ଦେବାଶିଷ ସିଟ୍ଙ୍କ ସ୍ତ୍ରୀ।
୩୫ ନମ୍ବର ଓ୍ବାର୍ଡ ମୋଟ ୧୦,୯୦୦ ଭୋଟର୍ଙ୍କୁ ନେଇ ଗଠିତ। ଏହି ଆସନ ଲାଗି ମୋଟ ୪ ଜଣ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି। ବିଜେଡିରୁ ରଞ୍ଜୁଲତା ରାୟ, ଭାଜପାରୁ ଅଞ୍ଜନା ପାତ୍ର,୨ ଜଣ ସ୍ବାଧୀନ ପ୍ରାର୍ଥୀ ସୁମିତା ଏବଂ ରଶ୍ମିତା ସାହୁ ନିଜ ନିଜ ସପକ୍ଷରେ ଭୋଟ୍ ଭିକ୍ଷା ଆରମ୍ଭ କରିଦେଇଛନ୍ତି। ଏହି ଓ୍ବାର୍ଡରେ ମୋଟ ୭ଟି ବସ୍ତି ରହିଛି। ଏହି ବସ୍ତିଗୁଡ଼ିକରେ ଦେବାଶିଷଙ୍କ ଗ୍ରହଣୀୟତା ରହିଛି। ଦେବାଶିଷ ୨୦୧୪ ବିଏମ୍ସି ନିର୍ବାଚନରେ ୨୬୦୦ରୁ ଅଧିକ ଭୋଟ୍ରେ ଜିତି ୩୫ ନମ୍ବର ଓ୍ବାର୍ଡର କର୍ପୋରେଟର ହୋଇଥିଲେ। ୨୦୧୯ ଜାନୁୟାରୀରୁ ତାଙ୍କ କାର୍ଯ୍ୟକାଳ ଶେଷ ହୋଇସାରିଥିଲେ ମଧ୍ୟ ୨୦୨୨ ପର୍ଯ୍ୟନ୍ତ ପୌର ଭୋଟ୍ ନ ହେବା କାରଣରୁ ତାଙ୍କ ନେତୃତ୍ୱରେ ଶାସକ ଦଳର ସବୁ କାର୍ଯ୍ୟ ଏହି ଆସନରେ ହେଉଥିଲା। ହେଲେ ଚଳିତଥର ଏହି ଓ୍ବାର୍ଡଟି ମହିଳା ଏସ୍ସିଙ୍କ ପାଇଁ ସଂରକ୍ଷଣ ହୋଇଯିବା ପରେ ଏହାର ପାଖ ଆସନ ୩୬ ନମ୍ବର ଓ୍ବାର୍ଡରୁ ଦେବାଶିଷ ନିର୍ବାଚନ ଲଢିବେ ବୋଲି ତାଙ୍କୁ ବିଧାୟକ ଅନନ୍ତ ନାରାୟଣ ଜେନା ପ୍ରତିଶ୍ରୁତି ଦେଇଥିଲେ। ହେଲେ ପରବର୍ତ୍ତୀ ସମୟରେ ଏହି ଆସନରୁ ଜଣେ ମହିଳାଙ୍କୁ ପ୍ରାର୍ଥୀ କରିବା ପାଇଁ ବିଧାୟକ ଅନନ୍ତ ଯୋଜନା କରିଥିଲେ। ତେଣୁ ଦେବାଶିଷ ତାଙ୍କ ସ୍ତ୍ରୀ ସୁମିତାଙ୍କୁ ୩୫ ନଂ. ଓ୍ବାର୍ଡରେ ସ୍ବାଧୀନ ପ୍ରାର୍ଥୀ ଭାବେ ଛିଡ଼ା କରାଇଛନ୍ତି। ମିଳିଥିବା ସୂଚନା ମୁତାବକ, ଦେବାଶିଷ ଦଳର ଅନ୍ୟ କେତେଜଣ ରାଜ୍ୟସ୍ତରୀୟ ନେତାଙ୍କ ସହ ଭଲ ସମ୍ପର୍କ ରଖିଥିବା କାରଣରୁ ତାଙ୍କ ଟିକେଟ କାଟିବାକୁ ବିଧାୟକ ଚିନ୍ତା କରିଥିବା ଦଳୀୟ ମହଲରେ ଆଲୋଚନା ଜୋର୍ ଧରିଛି। ଦେବାଶିଷ ଓ ତାଙ୍କ ସ୍ତ୍ରୀ ବସ୍ତିର ଲୋକଙ୍କ ପାଖକୁ ଯାଇ ଦଳ ତାଙ୍କ ସହ କରିଥିବା ଅନ୍ୟାୟ ବିଷୟରେ କହି ଭୋଟ୍ ଭିକ୍ଷା କରୁଛନ୍ତି। ସେପଟେ ବସ୍ତିର ଜଣେ ଭୋଟର୍ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ଶାସକ ଦଳ ସପକ୍ଷରେ ଭୋଟ ନ ଦେଲେ ବସ୍ତି ଉଚ୍ଛେଦ ପାଇଁ ତାଙ୍କ ଉପରେ ଚାପ ପକାଯାଉଛି। ଏନେଇ ସ୍ବାଧୀନ ପ୍ରାର୍ଥୀ ସୁମିତା ସିଟ୍ କହିଛନ୍ତି, ତାଙ୍କ ସ୍ବାମୀ ଲୋକଙ୍କ ସାଙ୍ଗରେ ଦୀର୍ଘଦିନ ଧରି ଥିବାରୁ ଲୋକମାନେ ନିଶ୍ଚିତ ତାଙ୍କୁ ଭୋଟ ଦେବେ।
