ମୁମ୍ବାଇ, ୧୧।୪: ସ୍ଥାନୀୟ ଡି.ଓ୍ବାଇ. ପାଟିଲ ଷ୍ଟାଡିୟମରେ ସୋମବାର ଅନୁଷ୍ଠିତ ଇଣ୍ଡିଆନ ପ୍ରିମିୟର ଲିଗ୍ ମ୍ୟାଚରେ ସନ୍ରାଇଜର୍ସ ହାଇଦ୍ରାବାଦ ୮ ଉଇକେଟରେ ଗୁଜରାଟ ଟାଇଟାନ୍ସକୁ ପରାସ୍ତ କରିଛି। ଗୁଜରାଟ ଟାଇଟାନ୍ସ ୨୦ ଓଭରରେ ୭ ଉଇକେଟ ହରାଇ ୧୬୨ ରନ କରିଥିଲା। ଜବାବରେ ସନ୍ରାଇଜର୍ସ ୧୯.୧ ଓଭରରେ ମାତ୍ର ୨ ଉଇକେଟ ହରାଇ ୧୬୮ ରନ ସଂଗ୍ରହ କରି ନେଇଥିଲା। ବୋଲରଙ୍କ ପ୍ରଭାବୀ ପ୍ରଦର୍ଶନ ପରେ ଅଧିନାୟକ କେନ୍ ଓ୍ବିଲିୟମସନ ଓ ଅଭିଷେକ ଶର୍ମାଙ୍କ ଦୃଢ଼ ବ୍ୟାଟିଂ ବଳରେ ସନ୍ରାଇଜର୍ସ ସହଜ ବିଜୟ ହାସଲ କରିଥିଲା। ଅନ୍ୟପକ୍ଷରେ ଆଇପିଏଲ୍ର ନୂଆ ଦଳ ଗୁଜରାଟ ଟାଇଟାନ୍ସର ପ୍ରଥମ ପରାଜୟ ସ୍ବାଦ ଚାଖିଛି। ପୂର୍ବରୁ ଅନୁଷ୍ଠିତ ୩ଟି ଯାକ ମ୍ୟାଚ ଜିତି ଏହି ଦଳ ବିଜୟରେ ହ୍ୟାଟ୍ରିକ୍ କରିଥିଲା। ସନ୍ରାଇଜର୍ସ ୪ ମ୍ୟାଚରୁ ୨ଟି ଲେଖାଏ ବିଜୟ ଓ ପରାଜୟ ସହ ନିଜ ପଏଣ୍ଟ ସଂଖ୍ୟାକୁ ୪ରେ ପହଞ୍ଚାଇଛି।
ଟସ୍ ହାରି ଗୁଜରାଟ ଟାଇଟାନ୍ସ ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିଲା। ଟପ୍ ଅର୍ଡର ବ୍ୟାଟିଂ ବିଫଳତା ଯୋଗୁ ଦଳ ନିୟମିତ ବ୍ୟବଧାନରେ ଉଇକେଟ ହରାଇଥିଲା। ଶୁବମନ ଗିଲ୍ ମାତ୍ର ୭ ରନ କରି ଟି. ନଟରାଜନଙ୍କ ବଲ୍ରେ ଆଉଟ ହୋଇଥିଲେ। ଫଳରେ ୨୪ ରନରେ ଗୁଜରାଟ ପ୍ରଥମ ଉଇକେଟ ହରାଇଥିଲା। ସାଇ ସୁଦର୍ଶନ ୧୧ ଓ ମାଥ୍ୟୁ ଓ୍ବାଡେ ୧୯ ରନ କରିବାକୁ ସକ୍ଷମ ହୋଇଥିଲେ। ମିଡିଲ ଅର୍ଡରରେ ଡେଭିଡ ମିଲର ମାତ୍ର ୧୨ ରନ କରିଥିଲେ। ତେବେ ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ଅପରାଜିତ ଅର୍ଦ୍ଧଶତକ ଏବଂ ଅଭିନବ ମନୋହରଙ୍କ ଉପଯୋଗୀ ୩୫ (୨୧ ବଲ, ୫ ଚୌକା, ୧ ଛକା) ରନ ଯୋଗୁ ଗୁଜରାଟ ସମ୍ମାନଜନକ ସ୍କୋରରେ ପହଞ୍ଚତ୍ ପାରିଥିଲା। ହାର୍ଦ୍ଦିକ ୪୨ ବଲ୍ରୁ ୪ ଚୌକା ଓ ୧ ଛକା ସହାୟତାରେ ସର୍ବାଧିକ ୫୦ ରନକରି ଅପରାଜିତ ରହିଥିଲେ। ରାହୁଲ ଟଓ୍ବୋଟିଆ ୪ ବଲ୍ରୁ ୬ ରନ କରିଥିବାବେଳେ ରନ୍ଆଉଟ ହୋଇ ଯାଇଥିଲେ। ସନ୍ରାଇଜର୍ସ ବୋଲରମାନେ ଅତିରିକ୍ତଭାବେ ୨୨ ରନ ବ୍ୟୟ କରିଥିଲେ। ଭୁବନେଶ୍ୱର କୁମାର ଓ ଟି. ନଟରାଜନ ୨ଟି ଲେଖାଏ ଏବଂ ମାର୍କୋ ଜାନସେନ ଓ ଉମ୍ରାନ ମଲିକ ଗୋଟିଏ ଲେଖାଏ ଉଇକେଟ ନେଇଥିଲେ।
ସନ୍ରାଇଜର୍ସ ଓପନିଂ ଯୋଡ଼ିରେ ୬୪ ରନ ଯୋଗକରି ଦୃଢ଼ ଭିତ୍ତି ପକାଇଥିଲା। ଫର୍ମରେ ଥିବା ଯୁବ ଓପନର ଅଭିଷେକ ଶର୍ମା ଏଠାରେ ଭଲ ଆରମ୍ଭ କରିଥିଲେ ହେଁ ଅର୍ଦ୍ଧଶତକ ହାସଲ ପୂର୍ବରୁ ଆଉଟ ହୋଇ ଯାଇଥିଲେ। ସେ ୩୨ ବଲ୍ରୁ ୬ ଚୌକା ସହାୟତାରେ ୪୨ ରନ କରିଥିବାବେଳେ ରଶିଦ ଖାଁଙ୍କ ବଲ୍ରେ ସାଇ ସୁଦର୍ଶନଙ୍କୁ କ୍ୟାଚଦେଇ ପ୍ୟାଭିଲିୟନ ଫେରିଥିଲେ। ରାହୁଲ ତ୍ରିପାଠୀ ବିସ୍ଫୋରକ ବ୍ୟାଟିଂ ଆରମ୍ଭ କରି ୧୧ ବଲ୍ରୁ ଗୋଟିଏ ଲେଖାଏ ଚୌକା ଓ ଛକା ସହାୟତାରେ ୧୭ ରନ କରିଥିବାବେଳେ ଗୋଡ଼ ମାଂଶପେଶୀ ଟାଣି ଧରିବାରୁ ରିଟାୟର୍ଡ ହର୍ଟ ହୋଇ ଯାଇଥିଲେ। ଆରମ୍ଭରେ ଅପେକ୍ଷାକୃତ ଧିମା ଖେଳିଥିବା ଓ୍ବିଲିୟମସନ ପରେ ଆବଶ୍ୟକତାକୁ ଦୃଷ୍ଟିରେ ରଖି ନିଜ ଷ୍ଟ୍ରାଇକ୍ହାର ବଢ଼ାଇଥିଲେ। ଲୋକି ଫର୍ଗୁସନଙ୍କ ବଲ୍ରେ ଛକା ମାରି ସେ ୪୩ ବଲ୍ରୁ ଅର୍ଦ୍ଧଶତକ ପୂରଣ କରିଥିଲେ। ତେବେ ସେ ୪୬ ବଲ୍ରୁ ୨ ଚୌକା ଓ ୪ ଛକା ସହାୟତାରେ ୫୭ ରନ କରିଥିବାବେଳେ ହାର୍ଦ୍ଦିକ ପାଣ୍ଡ୍ୟାଙ୍କ ବଲ୍ରେ ରାହୁଲ ଟଓ୍ବୋଟିଆଙ୍କୁ କ୍ୟାଚ ଦେଇ ପ୍ୟାଭିଲିୟନ ଫେରିଥିଲେ। ନିକୋଲସ ପୁରନ ୧୮ ବଲ୍ରୁ ୩୪ (୨ ଚୌକା, ୨ ଛକା) ଓ ଏଡେନ ମାରକ୍ରାମ ୧୨ ରନରେ ଅପରାଜିତ ରହି ଦଳକୁ ଜିତାଇଥିଲେ। ଗୁଜରାଟ ପକ୍ଷରୁ ହାର୍ଦ୍ଦିକ ପାଣ୍ଡ୍ୟା ଓ ରଶିଦ ଖାଁ ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ଗୁଜରାଟ ଟାଇଟାନ୍ସ ୨୦ ଓଭରରେ ୧୬୨/୭ (ହାର୍ଦ୍ଦିକ ପାଣ୍ଡ୍ୟା-୫୦*, ଅଭିନମ ମନୋହର-୩୫, ଭୁବନେଶ୍ୱର କୁମାର-୨/୩୭, ଟି. ନଟରାଜନ-୨/୩୪, ମାର୍କୋ ଜାନସେନ-୧/୨୭, ଉମ୍ରାନ ମଲିକ-୧/୩୯)। ସନ୍ରାଇଜର୍ସ ହାଇଦ୍ରାବାଦ ୧୯.୧ ଓଭରରେ ୧୬୮/୨ (କେନ୍ ଓ୍ବିଲିୟମସନ-୫୭, ଅଭିଷେକ ଶର୍ମା-୪୨, ନିକୋଲସ ପୁରନ-୩୪*, ହାର୍ଦ୍ଦିକ ପାଣ୍ଡ୍ୟା-୧/୨୭, ରଶିଦ ଖାଁ-୧/୨୮)।
