ସୁରତ,୧୬।୭: ଗୁଜୁରାଟର ଜଣେ ଲେଡି କନଷ୍ଟେବଳ ସୋସିଆଲ ମିଡିଆରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ସୁନୀତା ଯାଦବ ନାମକ ଏହି କନଷ୍ଟେବଳ ଭାଜପା ସରକାରର ଜଣେ ମନ୍ତ୍ରୀଙ୍କ ପୁଅକୁ କଡା ଜବାବ ଦେବାରୁ ତାଙ୍କୁ ଚାକିରି ଛାଡିବାକୁ ପଡିଛି। ଜୁଲାଇ ୮ରେ କର୍ଫ୍ୟୁରେ କିଛି ଲୋକଙ୍କ ବୁଲିବା ଦେଖି କ’ଣ ପାଇଁ ବୁଲୁଛ ବୋଲି ପଚାରିଥିଲେ ସୁନୀତା। କିଛି କାରଣ ପାଇଁ ବାହାରେ ବୁଲିବାକୁ ଅନୁମତି ଅଛି। କିନ୍ତୁ ଏମାନଙ୍କ ପାଖେ କାରଣ ନ ଥିଲା। ସେମାନେ ସରି କହି କ୍ଷମା ମାଗିଲେ। ସୁନୀତା କିନ୍ତୁ ଆଇନ ଅନୁଯାୟୀ ଦଣ୍ଡ ଦେଇଥିଲେ। ତାଙ୍କ ପାଖରେ ଚାଲାଣ ସ୍ଲିପ ନ ଥିବାରୁ ସେମାନଙ୍କ ଭୁଲ ପାଇଁ ବସଉଠ କରାଇଥିଲେ। ଗୁଜରାଟ ସ୍ବାସ୍ଥ୍ୟମନ୍ତ୍ରୀଙ୍କ ପୁଅ ପ୍ରକାଶ କରାନୀ ଘଟଣାସ୍ଥଳରେ ପହଞ୍ଚି ଏମାନଙ୍କୁ ଅଟକାଇବା ନେଇ କନଷ୍ଟେବଳଙ୍କୁ ପଚାରିଥିଲେ। ଏହାପରେ ଯୁକ୍ତିତର୍କ ହେଲା ଯାହାର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେଲା। ଏହାପରେ ପ୍ରକାଶ ସମେତ ୩ ଜଣଙ୍କୁ ପୋଲିସ ଅଟକ ରଖିଥିଲା। ଏହି ଘଟଣା ପରେ ସୁନୀତାଙ୍କୁ ଲେଡି ସିଘଂମ ଆଖ୍ୟା ଦିଆଗଲା। କିନ୍ତୁ ତାଙ୍କ ଉପରେ ଚାପ ପଡିଥିଲା। ଜୀବନ ପ୍ରତି ବିପଦ ଅଛି ବୋଲି ସୁନୀତା ଏକ ଭିଡିଓ ପୋଷ୍ଟ କରି କହିଥିଲେ।
ସୁନୀତା କହିଛନ୍ତି, ମୁଁ ଲେଡି ସିଙ୍ଘମ ନୁହେଁ। ମୁଁ କେବଳ ମୋ କର୍ତ୍ତବ୍ୟ କରିଥିଲି। ମୁଁ ଭାବୁଥିଲି ଖାକି ବର୍ଦ୍ଦିରେ କ୍ଷମତା ଅଛି। ଏ ଘଟଣା ମୋତେ ଶିଖାଇ ଦେଇଛି, ଏହା ପ୍ରକୃତରେ ଉଚ୍ଚ ପାହ୍ୟାରେ ଥାଏ। ମୁଁ ଏବେ ଆଇପିଏସ ପାଇଁ ପ୍ରସ୍ତୁତ ହେବି ଏବଂ ପାହ୍ୟା ସହ ଫେରିବି ବୋଲି ସେ କହିଛନ୍ତି।
