ନୂଆଦିଲ୍ଲୀ,୧୭।୯: ଟି୨୦ ବିଶ୍ୱକପ୍ର ଠିକ୍ ପୂର୍ବରୁ ଅଧିନାୟକ ପଦରୁ ହଟିବା ନେଇ ଘୋଷଣା କରି ସମସ୍ତଙ୍କୁ ଚମକାଇଛନ୍ତି ବିରାଟ କୋହଲି। ଏପରି ସ୍ଥିତିରେ ଆଗାମୀ ଦିନରେ ପଦବୀ କାହାକୁ ମିଳିବ ତାକୁ ନେଇ ଚର୍ଚ୍ଚା ଜୋର ଧରିଛି। ମହାନ କ୍ରିକେଟର ସୁନୀଲ ଗାଭାସ୍କର ଏହି ପ୍ରସଙ୍ଗରେ କହିଛନ୍ତି, ଅଧିନାୟକ ପଦ ସମ୍ଭାଳିବା ପାଇଁ କେଏଲ୍ ରାହୁଲଙ୍କ ପାଖରେ ଯୋଗ୍ୟତା ରହିଛି। ତାଙ୍କୁ ଭାବି ଅଧିନାୟକ ଭାବେ ପ୍ରସ୍ତୁତ କରିବାର ଆବଶ୍ୟକତା ରହିଛି।
ସ୍ପୋଟ୍ସ ତକ୍ ସହ ବାର୍ତ୍ତାଳାପରେ ଗାଭାସ୍କର କହିଛନ୍ତି, ବିସିସିଆଇ ଆଗାମୀ ଦିନ କଥା ଭାବିବା ଭଲ କଥା। ଭବିଷ୍ୟତ ବିଷୟରେ ଚିନ୍ତା କରିବା ମହତ୍ୱପୂର୍ଣ୍ଣ। ଯଦି ଭାରତ ନୂଆ ଅଧିନାୟକଙ୍କୁ ପ୍ରସ୍ତୁତ କରିବା ବିଷୟରେ ଚିନ୍ତା କରୁଛି ତେବେ କେଏଲ୍ ରାହୁଲଙ୍କ ବିଷୟରେ ଚିନ୍ତା କରାଯାଉ। ସେ ଭଲ ପ୍ରଦର୍ଶନ କରିଛନ୍ତି। ଇଂଲଣ୍ଡରେ ମଧ୍ୟ ସେ ବହୁତ ବ୍ୟାଟିଂ କରିଛନ୍ତି। ତାଙ୍କୁ ଉପ ଅଧିନାୟକ କରାଯାଇପାରେ।
କେଏଲ୍ ଆଇପିଏଲ୍ରେ ପଞ୍ଜାବ କିଙ୍ଗ୍ସର ଅଧିନାୟକ ଅଛନ୍ତି। ଅଧିନାୟକ ପଦର ଚାପ ସେ ବ୍ୟାଟିଂ ଉପରେ ପଡ଼ିବାକୁ ଦେଇ ନାହାନ୍ତି। ଏଣୁ ତାଙ୍କ ବିଷୟରେ ଚିନ୍ତା କରାଯାଇପାରେ ବୋଲି ଗାଭାସ୍କର କହିଛନ୍ତି।
