ନୂଆପଡ଼ା,୧ା୬ (ମକାରୁ ବେମାଲ): ନୂଆପଡ଼ା ଜିଲା କୋମନା ବ୍ଲକ ସୁନାବେଡ଼ା ଅଭୟାରଣ୍ୟରେ ବସବାସ କରୁଥିବା ଅଧିବାସୀ ସୋମବାର ଯୁଗ୍ମ ଅଭିଯୋଗ ଶୁଣାଣି ଶିବିରରେ ଜିଲାପାଳଙ୍କୁ ଭେଟି ୩ ଦଫା ସମ୍ବଳିତ ଦାବିପତ୍ର ପ୍ରଦାନ କରିଛନ୍ତି।
ଦାବିପତ୍ରରେ ଦର୍ଶାଇଛନ୍ତି, ଅଭୟାରଣ୍ୟରେ ସୋସେଙ୍ଗ ଓ ସୁନାବେଡା ପଞ୍ଚାୟତର ଛୋଟବଡ ୫୨ଟି ଗାଁରହିଛି। ଏହିସବୁ ଗାଁକୁ ଗମନାଗମନ ସୁବିଧା ପାଇଁ କେନ୍ଦ୍ର ତଥା ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚ କରି ରାସ୍ତା ନିର୍ମାଣ କରୁଛନ୍ତି। ହେଲେ ବିଭାଗୀୟ ଅଧିକାରୀଙ୍କ ଆନ୍ତରିକତା ଅଭାବ ଓ ବନ ବିଭାଗ ଦ୍ୱାରା ଅଙ୍କୁଶ ଲଗାଯାଇଥିବାରୁ ରାସ୍ତା ସମ୍ପୂର୍ଣ୍ଣ ହୋଇପାରୁ ନାହିଁ।
ଫଳରେ ଲୋକେ ଯାତାୟାତରେ ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ଅଡାର ଗାଁଠାରେ ୨ଟି ନାଳ ପୋଲ ଭାଙ୍ଗିଯାଇଛି। ବର୍ଷାଦିନ ଆସିବା ପୂର୍ବରୁ ଏହାର ମରାମତି ନ କଲେ ମୁଖ୍ୟମନ୍ତ୍ରୀ ବସ୍ସେବା ବାଧାପ୍ରାପ୍ତ ହେବ। ସୁନାବେଡା ସ୍ବାସ୍ଥ୍ୟକେନ୍ଦ୍ରରେ ଏକ ଆମ୍ବୁଲାନ୍ସ ସେବା ଯୋଗାଇ ଦିଆଯାଉ। ଅନୁରୂପ ଭାବେ ଚଳିତ ଖରିଫ ଚାଷ ପାଇଁ ଚାଷୀମାନେ ୫୦କି.ମି. କୋମନା ଯାଇ ଧାନବିହନ ଆଣିବା କଷ୍ଟକର ହୋଇପଡୁଛି । ଅଭୟାରଣ୍ୟରେ କାର୍ଯ୍ୟ କରୁଥିବା ଚକୋଟିଆ ଭୁଞ୍ଜିଆ ଉନ୍ନୟନ ସଂସ୍ଥା ଦ୍ୱାରା ଅଭୟାରଣ୍ୟ ଭିତରେ ବାସ କରୁଥିବା ଚାଷୀଙ୍କୁ ବିହନ ଯୋଗାଇ ଦେଲେ ଚାଷୀ ସୁବିଧାରେ ବିହନ ପାଇପାରିବେ ବୋଲି ଦାବି କରିଛନ୍ତି। ଏହିସବୁ ସମସ୍ୟାର ଶୀଘ୍ର ସମାଧାନ କରାଯିବ ବୋଲି ଜିଲାପାଳ ପ୍ରତିଶ୍ରୁତି ଦେଇଛନ୍ତି। ଏହି ସମୟରେ ସୁନାବେଡା ସରପଞ୍ଚ ରଜନୀ ଜଗତ, ପୂର୍ବତନ ସରପଞ୍ଚ ତିଲସିଂ ଝାଙ୍କର, ନାଏବ ସରପଞ୍ଚ ଭାଉରାମ ମାଝି, ଯୁବରାଜ ଛତ୍ରିଆ, କଲିରାମ ସୁଆର, ବିଶ୍ରାମ ଛତ୍ରିଆ ପ୍ରମୁଖ ଉପସ୍ଥିତ ଥିଲେ।
