ନୂଆଦିଲ୍ଲୀ,୨୫।୫: ଜଳବାୟୁ ପରିବର୍ତ୍ତନ ଯୋଗୁ ତାତି ବଢ଼ୁଛି। ଚଳିତ ବର୍ଷ ମାର୍ଚ୍ଚ-ଏପ୍ରିଲରେ ଭାରତ ଓ ପାକିସ୍ତାନରେ ସର୍ବାଧିକ ଗ୍ରୀଷ୍ମ ଲହର ଅନୁଭୂତ ହୋଇଥିଲା। ମନୁଷ୍ୟକୃତ ଜଳବାୟୁ ପରିବର୍ତ୍ତନର ପ୍ରଭାବ ଯୋଗୁ ଗ୍ରୀଷ୍ମ ଲହର ପୂର୍ବାପେକ୍ଷା ପ୍ରାୟ ୩୦ ଗୁଣ ଅଧିକ ଅନୁଭୂତ ହୋଇପାରେ ବୋଲି ଏକ ଅଧ୍ୟୟନରେ କୁହାଯାଇଛି। ରୌଦ୍ରତାପରେ ଅତ୍ୟଧିକ ବୃଦ୍ଧି ପ୍ରାୟତଃ ପ୍ରତି ୩,୦୦୦ ବର୍ଷରେ ଥରେ ଅନୁଭୂତ ହୋଇଥାଏ। ବିଶ୍ୱ ଉତ୍ତାପୀକରଣର ପ୍ରଭାବ ଅନୁଧ୍ୟାନ କରୁଥିବା ଇମ୍ପେରିଆଲ କଲେଜ ଲଣ୍ଡନର ଗ୍ରନ୍ଥମ୍ ଇନ୍ଷ୍ଟିଚ୍ୟୁଟ୍ର ବୈଜ୍ଞାନିକ ଫ୍ରେଡେରିକ୍ ଓଟୋ ଏହା କହିଛନ୍ତି। ଅନ୍ତର୍ଜାତୀୟ ସହଯୋଗ ସଂଗଠନ ଓ୍ବାଲର୍ଡ ଓ୍ବେଦର ଆଟ୍ରିବ୍ୟୁଶନ (ଡବ୍ଲ୍ୟୁଡବ୍ଲ୍ୟୁଏ) ପକ୍ଷରୁ କରାଯାଇଥିବା ଅଧ୍ୟୟନରେ ଉପରୋକ୍ତ ଆକଳନ କରାଯାଇଛି।
ଚଳିତ ବର୍ଷ ପ୍ରଚଣ୍ଡ ରୌଦ୍ରତାପରେ ଭାରତ ଓ ପାକିସ୍ତାନରେ ଅନୂ୍ୟନ ୯୦ ଲୋକଙ୍କ ଜୀବନ ଯାଇଥିବା ଆକଳନ କରାଯାଇଛି। ଉତ୍ତରପଶ୍ଚିମ ଭାରତ ଏବଂ ଦକ୍ଷିଣପୂର୍ବ ପାକିସ୍ତାନରେ ସର୍ବାଧିକ ଗ୍ରୀଷ୍ମ ଲହରି ପ୍ରବାହିତ ହୋଇଥିଲା ବୋଲି ଉକ୍ତ ଅଧ୍ୟୟନରେ କୁହାଯାଇଛି। ମୃତ୍ୟୁସଂଖ୍ୟାକୁ ନେଇ କୌଣସି ସରକାରୀ ରେକର୍ଡ ନ ଥିବାବେଳେ ଗଣମାଧ୍ୟମ ରିପୋର୍ଟ ଆଧାରରେ ଏହି ଅଧ୍ୟୟନ କରାଯାଇଛି। ବାହାରକୁ କାମରେ ଯାଉଥିବା ଲୋକେ ବିଶେଷ କରି ଦିନ ମଜୁରିଆ, ରାସ୍ତାରେ ବିକ୍ରି କରୁଥିବା ଛୋଟ ବ୍ୟବସାୟୀ, ନିର୍ମାଣ ଶ୍ରମିକ, କୃଷି ଶ୍ରମିକ ଏବଂ ଟ୍ରାଫିକ୍ ପୋଲିସ ହିଟ୍ ଓ୍ବେଭ୍କୁ ସର୍ବଧିକ ସାମ୍ନା କରିଥିଲେ। ପ୍ରବଳ ଗ୍ରୀଷ୍ମ ପ୍ରବାହ ସାଙ୍ଗକୁ ବିଭିନ୍ନ ତାପଜ ବିଦ୍ୟୁତ୍ ପ୍ଲାଣ୍ଟରେ କୋଇଲା ଅଭାବ ଜନିତ ଦୀର୍ଘ ସମୟ ବିଜୁଳି କାଟ୍ ସାଧାରଣ ଜୀବନଯାତ୍ରାକୁ ଅସ୍ତବ୍ୟସ୍ତ କରିପକାଇଥିଲା।
ଜଳବାୟୁ ପରିବର୍ତ୍ତନର ପ୍ରଭାବରୁ ଭାରତରେ ଗତ ମାର୍ଚ୍ଚ ମାସ ସର୍ବାଧିକ ଉତ୍ତପ୍ତ ରେକର୍ଡ କରାଯାଇଥିଲା। ୧୨୨ ବର୍ଷ ମଧ୍ୟରେ କେବେ ଏଭଳି ଉତ୍ତାପ ଅନୁଭୂତ ହୋଇ ନ ଥିଲା। ଏପ୍ରିଲରେ ଉତ୍ତାପ ଆହୁରି ବୃଦ୍ଧି ପାଇଥିଲା। ଯଦିଓ ଭାରତ, ପାକିସ୍ତାନରେ ତାପମାତ୍ରା ବଢ଼ିବା ନୂଆ ନୁହେଁ, ତେବେ ଚଳିତ ବର୍ଷ ଏହା ସଅଳ ଆରମ୍ଭ ହୋଇ ଦୀର୍ଘଦିନ ରହିବା ଅସାଧାରଣ ଘଟଣା। ଚଳିତ ବର୍ଷ ମାର୍ଚ୍ଚରେ ଭାରତରେ ସ୍ବାଭାବିକଠାରୁ ୭୧ ପ୍ରତିଶତ କମ୍ ବର୍ଷା ହୋଇଥିବାବେଳେ ପାକିସ୍ତାନରେ ୬୨ ପ୍ରତିଶତ କମ୍ ବୃଷ୍ଟିପାତ ରେକର୍ଡ କରାଯାଇଥିବା ରିପୋର୍ଟରେ କୁହାଯାଇଛି।
ସଅଳ ଗ୍ରୀଷ୍ମ ଲହର ସାଙ୍ଗକୁ ବର୍ଷା ଅଭାବ ଯୋଗୁ ଭାରତରେ ଗହମ ଉତ୍ପାଦନ ଗୁରୁତର ପ୍ରଭାବିତ ହୋଇଛି। ଫଳରେ ଭାରତ ସରକାର ଗହମ ରପ୍ତାନି ବନ୍ଦ କରିବାକୁ ଘୋଷଣା କରିଥିଲେ। ଭାରତ ରପ୍ତାନି ବନ୍ଦ କରିଦେବା ଯୋଗୁ ବିଶ୍ୱ ବଜାରରେ ଗହମ ଦାମ୍ ୬ ପ୍ରତିଶତ ବଢ଼ିଯାଇଛି। ଚଳିତ ବର୍ଷ ଭାରତ ରେକର୍ଡ ପରିମାଣ ୧୦ ନିୟୁତ ଟନ୍ ଗହମ ରପ୍ତାନି କରିବ ବୋଲି ପୂର୍ବରୁ ଆଶା କରାଯାଉଥିଲା। ତାହା ହୋଇଥିଲେ ରୁଷିଆ-ୟୁକ୍ରେନ ଯୁଦ୍ଧ ଯୋଗୁ ସୃଷ୍ଟି ହୋଇଥିବା ଗହମ ଅଭାବକୁ ଭରଣା କରାଯାଇପାରିଥାନ୍ତା। ରପ୍ତାନି ବାତିଲ ଯୋଗୁ ବିଶ୍ୱ ବଜାରରେ ଗହମ ଦର ବଢ଼ିବା ସାଙ୍ଗକୁ ବିଶ୍ୱବ୍ୟାପୀ କ୍ଷୁଧିତ ସଂଖ୍ୟା ବୃଦ୍ଧି ପାଇଥିବା ପ୍ୟାରିସ ସୋର୍ବନ୍ ୟୁନିଭର୍ସିଟିର ପ୍ରଫେସର ରବର୍ଟ ଭୌଟାର୍ଡ କହିଛନ୍ତି।
