ଦଶରଥପୁର,୫ା୧(ଡି.ଏନ୍.ଏ.):ଦଶରଥପୁର ପ୍ରେମୀଯୁଗଳଙ୍କ ଆତ୍ମହତ୍ୟା ଘଟଣାର ରହସ୍ୟ ସାମ୍ନାକୁ ଆସିବାରେ ଲାଗିଛି ା ସେମାନଙ୍କ ପ୍ରେମକୁ ଉଭୟ ପରିବାର ପକ୍ଷରୁ ସ୍ବୀକୃତି ମିଳି ନ ଥିଲା। ଅନ୍ୟ ଜଣେ ଯୁବକ ଏହି ପ୍ରେମୀଯୁଗଳଙ୍କୁ ବ୍ଲାକ୍ମେଲିଂ କରିବା ଯୋଗୁ ସେମାନେ ଆମତ୍ହତ୍ୟା ପନ୍ଥା ଆପଣେଇ ନେଇ ଥିଲେ ବୋଲି ମୃତ ଯୁବକଙ୍କ ମା’ ମଞ୍ଜୁଲତା ଦାସ ଥାନାରେ ଅଭିଯୋଗ କରିବା ପରେ ଏହି ଘଟଣା ଭିନ୍ନ ମୋଡ଼ ନେଇଛି। ପ୍ରେମୀଯୁଗଳଙ୍କ ସମସ୍ୟାର ଫାଇଦା ଉଠାଇବାକୁ ଚେଷ୍ଟା କରି ସେମାନଙ୍କୁ ବ୍ଲାକ୍ମେଲିଂ କରୁଥିବା ଯୁବକଙ୍କ ଗିରଫ ଦାବିରେ ଗ୍ରାମବାସୀ ଓ ମୃତ ଯୁବକଙ୍କ ପରିବାର ସଦସ୍ୟମାନେ ମଙ୍ଗଳବାର ଥାନା ଘେରାଉ କରିଥିଲେ ା ପୋଲିସ ଏ ସଂକ୍ରାନ୍ତରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ପ୍ରତିଶ୍ରୁତି ଦେଇଛି।
ସୂଚନାଯୋଗ୍ୟ, ମଙ୍ଗଳପୁର ଥାନା ଦୁଦୁରାଅନ୍ତା ପଞ୍ଚାୟତ ଗଣପତିପାଟଣା ଗ୍ରାମର ଜଣେ ନାବାଳିକାଙ୍କ ସହ ସେହି ଗ୍ରାମର ପ୍ରତାପ ଦାସ(୨୧)ଙ୍କ ପ୍ରେମ ସମ୍ପର୍କ ଥିଲା ା ଦୁହେଁ ପରସ୍ପରକୁ ଭଲପାଉଥିଲେ। ମାତ୍ର ଉକ୍ତ ଗ୍ରାମର ପିଣ୍ଟୁଆ ନାମକ ଜଣେ ଯୁବକ ପ୍ରତାପଙ୍କ ମେଲ୍ ଆଇଡି ହ୍ୟାକ୍ କରି ପ୍ରେମିଯୁଗଳଙ୍କ ଅନ୍ତରଙ୍ଗ ଫଟୋ ଏବଂ ନାବାଳିକା ପ୍ରେମିକା ପ୍ରତାପଙ୍କ ପାଖକୁ ପଠାଇଥିବା କିଛି ବିଶେଷ ମୂହୁର୍ତ୍ତର ଫଟୋକୁ ହ୍ୟାକ୍ କରି ସେହି ପ୍ରେମିଯୁଗଳଙ୍କୁ ବ୍ଲାକ୍ମେଲ୍ କରୁଥିଲେ। ସମ୍ପୃକ୍ତା ନାବାଳିକାଙ୍କୁ ତାଙ୍କ ସହିତ ଦୈହିକ ସମ୍ପର୍କ ରଖିବାକୁ ପିଣ୍ଟୁଆ ବାଧ୍ୟ କରୁଥିଲେ। ଯଦି ସମ୍ପର୍କ ନ ରଖିବ ମୋ ପାଖରେ ଥିବା ଫୋଟଗୁଡ଼ିକୁ ଭାଇରାଲ୍ କରିଦେବି ବୋଲି ସେ ଧମକ ଦେଇଆସୁଥିଲେ। ପ୍ରତାପ ଏ କଥା କିଛି ଦିନ ତଳେ ନିଜ ମାଆଙ୍କୁ କହିଥିଲେ ବୋଲି ମଞ୍ଜୁଲତା ମଙ୍ଗଳବାର ଏତାଲାରେ ଦର୍ଶାଇଛନ୍ତି ା ଭଏସ୍ ରେକର୍ଡରେ ସମ୍ପୃକ୍ତା ନାବାଳିକା ପିଣ୍ଟୁଆ ତାଙ୍କ ପ୍ରତି ଖରାପ ବ୍ୟବହାର କରିଥିବା କହିଥିଲେ ା ଏପରି କି ସେ ଆମ ଦୁହିଙ୍କ ମରିବା ପାଇଁ ଦାୟୀ ବୋଲି ପ୍ରତାପ ଏବଂ ତାଙ୍କ ପ୍ରେମିକା କହିଥିଲେ। ଆମ ଦୁହିଙ୍କ ସହ ଯାହାହେଲା ଆଉ କାହା ସହିତ ଏପରି ନ ହେଉ, ଆମ ସହ ପିଣ୍ଟୁଆ ଯେଉଁ କାମ କରିଛି ଏଥିପାଇଁ ତାଙ୍କୁ କଠୋର ଦଣ୍ଡ ମିଳୁ ବୋଲି ଭଏସ୍ ରେକର୍ଡରେ ଏହି ପ୍ରେମୀଯୁଗଳ ଆକୁଳ ନିବେଦନ କରିଛନ୍ତି। ପିଣ୍ଟୁଆ ବିରୋଧରେ ବୟାନ ପରେ ବି ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ଚୁପ୍ ରହିଥିଲା। ମାତ୍ର ମଙ୍ଗଳବାର ପ୍ରତାପଙ୍କ ମା’ଏତାଲା କରିବା ଏବଂ ଘଟଣା ଉପରେ ପିଣ୍ଟୁଆ ବିରୋଧରେ ଗ୍ରାମବାସୀଙ୍କ କାର୍ଯ୍ୟାନୁଷ୍ଠାନ ଦାବି ପରେ ପୋଲିସ ସମ୍ପୃକ୍ତ ଯୁବକଙ୍କୁ ନୋଟିସ୍ କରିବା ସହ ତଦନ୍ତ ପ୍ରକ୍ରିୟାକୁ ତ୍ୱରାନ୍ବିତ କରିଛି ା ଘଟଣା ସମ୍ପର୍କରେ ମଙ୍ଗଳପୁର ଥାନା ଅଧିକାରୀ କୌଣସି ପ୍ରତିକ୍ରିୟା ଦେଇ ନାହାନ୍ତି। ଯାଜପୁର ଏସ୍ଡିପିଓ ସରୋଜ କୁମାର ଉପାଧ୍ୟାୟ ଘଟଣାର ତଦନ୍ତ କରାଯାଇ ଖୁବ୍ଶୀଘ୍ର ସତ୍ୟାସତ୍ୟ ଉନ୍ମୋଚନ କରାଯିବ ବୋଲି କହିଛନ୍ତି।
