କାବୁଲ,୩୦।୭: ଆଫଗାନିସ୍ତାନର ଶାପଗିଜା ଟି-୨୦ କ୍ରିକେଟ ଲିଗ୍ର ମ୍ୟାଚ ବେଳେ କାବୁଲ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଏକ ଆତ୍ମଘାତୀ ବିସ୍ଫୋରଣ ଘଟିଛି। ଏଥିରେ ୪ଜଣ ଦର୍ଶକ ଆହତ ହୋଇଛନ୍ତି। ଏହି ମ୍ୟାଚ ପାମିର ଜଲମି ଏବଂ ବ୍ୟାଣ୍ଡ-ଏ-ଆମିର ଡ୍ରାଗନ୍ସ ଦଳ ମଧ୍ୟରେ ଖେଳାଯାଉଥିଲା। ଆଫଗାନିସ୍ତାନ ପାଇଁ ବିଶ୍ୱକପ ଖେଳୁଥିବା ଅନେକ ଖେଳାଳି ମଧ୍ୟ ଏହି ମ୍ୟାଚରେ ଭାଗ ନେଇଥିଲେ। ତେବେ ଘଟଣାରେ ଆଫଗାନିସ୍ତାନର ପ୍ରମୁଖ ଖେଳାଳି ଆହତ ହୋଇ ନ ଥିବା ଜଣାପଡ଼ିଛି। ବିସ୍ଫୋରଣ ପରେ ଷ୍ଟାଡିୟମରେ କିଛି ସମୟ ପାଇଁ ଦର୍ଶକ ଭୟଭୀତ ହେବା ସହ ଏପଟ ସେପଟ ଦୌଡ଼ିବାକୁ ଲାଗିଥିଲେ। ଏପରିି କି ଉଭୟ ଦଳର ଖେଳାଳିଙ୍କୁ କିଛି ସମୟ ପାଇଁ ବଙ୍କର୍ ଭିତରକୁ ନିଆଯାଇଥିଲା। ଏହି ବିସ୍ଫୋରଣ ସମୟରେ ଷ୍ଟାଡିୟମରେ ମିଳିତ ଜାତିସଂଘର କେତେକ ଅଧିକାରୀ ମଧ୍ୟ ଉପସ୍ଥିତ ଥିବା ଜଣାପଡ଼ିଛି। ଅନ୍ୟପକ୍ଷେ ମ୍ୟାଚକୁ ୧ଘଣ୍ଟା ପାଇଁ ବନ୍ଦ କରିବାକୁ ପଡ଼ିଥିଲା। ତେବେ ପୋଲିସର ସବୁଜ ସଙ୍କେତ ପାଇବା ପରେ ମ୍ୟାଚ ପୁଣି ଆରମ୍ଭ ହୋଇଥିଲା। ସୂଚନାଯୋଗ୍ୟ, ବ୍ୟାଣ୍ଡ-ଇ-ଆମିର ଡ୍ରାଗନ୍ସ ଦଳ ଡକୱର୍ଥ-ଲୁଇସ ନିୟମ ଅନୁଯାୟୀ ପରିବର୍ତ୍ତିତ ୧୦ ଓଭରରେ ୯୪ ରନ୍ ହାସଲ କରିଥିଲେ। ଏହାପୂର୍ବରୁ ପାମିର ଜଲମି ଦଳ ୨୦ ଓଭରରେ ୫ଉଇକେଟ ହରାଇ ୧୫୯ ରନ ସଂଗ୍ରହ କରିବାକୁ ସକ୍ଷମ ହୋଇଥିଲେ।
